ନୂଆଦିଲ୍ଲୀ,୨୩ା୬: ଦେଶରେ ଇ-ବର୍ଜ୍ୟ ବିପଜ୍ଜନକ ଭାବେ ବୃଦ୍ଧି ପାଉଥିବା ଜାତିସଂଘ ରିପୋର୍ଟରେ ସତର୍କ କରାଇଦିଆଯିବା ସତ୍ତ୍ୱେ ଏହାର ଆକଳନ ପାଇଁ କେନ୍ଦ୍ର ସରକାର ଏପର୍ଯ୍ୟନ୍ତ କୌଣସି ବ୍ୟବସ୍ଥା ଗ୍ରହଣ କରିନାହାନ୍ତି। ଲୋକ ସଭାରେ ଶନିବାର ବିଜେଡି ଏମ୍ପି ଭର୍ତ୍ତୃହରି ମହତାବ ଦେଶରେ ବର୍ଷକୁ କେତେ ପରିମାଣର ଇ-ବର୍ଜ୍ୟ ସୃଷ୍ଟି ହେଉଛି ଏବଂ ତାହାର ପୁନଃଚକ୍ରଣ (ରିସାଇକ୍ଲିଂ) ସମ୍ପର୍କରେ ପ୍ରଶ୍ନ କରିଥିଲେ। ଏହାର ଉତ୍ତରରେ ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ କହିଥିଲେ, ଇ-ବର୍ଜ୍ୟ କେତେ ସୃଷ୍ଟି ହେଉଛି ତାହା ଆକଳନ କରିବା ଲାଗି ସରକାର ଏପର୍ଯ୍ୟନ୍ତ କୌଣସି ବ୍ୟବସ୍ଥା ଗ୍ରହଣ କରିନାହାନ୍ତି। ତେବେ ଦେଶରେ ୧.୪୭ ଲକ୍ଷ ଟନ୍ ଇ-ବର୍ଜ୍ୟ ସୃଷ୍ଟି ହେଉଥିବା ୨୦୦୫ରେ କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ଆକଳନ କରିଥିଲେ ବୋଲି ମନ୍ତ୍ରୀ କହିଥିଲେ। ୨୦୧୦ରେ ୮ ଲକ୍ଷ ଟନ୍ ଇ-ଓ୍ବେଷ୍ଟ ସୃଷ୍ଟି ହେବ ବୋଲି ସେତେବେଳେ ସିପିସିବି ପୂର୍ବାନୁମାନ କରିଥିଲା। ଜାତିସଂଘ ବିଶ୍ୱବିଦ୍ୟାଳୟର ଅନ୍ତର୍ଜାତୀୟ ଇ-ବର୍ଜ୍ୟ ତଦାରଖ ୨୦୧୭ ରିପୋର୍ଟ ଅନୁଯାୟୀ ୨୦୧୬ରେ ଭାରତରେ ୨୦ ଲକ୍ଷ ଟନ୍ ଇ-ବର୍ଜ୍ୟ ସୃଷ୍ଟି ହୋଇଥିଲା। ସେହିବର୍ଷ ଓଡ଼ିଶା ୧୨୩୬.୫୦ ଟନ୍ ଇ-ବର୍ଜ୍ୟ ଫିଙ୍ଗିଥିବା ଏମ୍ଏଆଇଟି ପକ୍ଷରୁ କୁହାଯାଇଛି। ଦେଶରେ ମୋଟ ୩୦୪ଟି ବିଘଟନକାରୀ ଓ ପୁନଃଚକ୍ରଣ ସଂସ୍ଥାକୁ ସ୍ବୀକୃତି ପ୍ରଦାନ କରାଯାଇଛି। ଓଡିଶାରେ ବର୍ଷକୁ ୩୬୮୦ ଟନ୍ ବର୍ଜ୍ୟ ପୁନଃଚକ୍ରଣ କ୍ଷମତା ଥିବା ଏଭଳି ୩ଟି ସଂସ୍ଥାକୁ ସ୍ବୀକୃତି ପ୍ରଦାନ କରାଯାଇଥିବା ମନ୍ତ୍ରୀ କହିଥିଲେ।
