ଭଦ୍ରକ ଅଫିସ, ୨୧ା୮- ଭଦ୍ରକ ଜିଲା ବାସୁଦେବପୁର ବ୍ଲକ ଇରମ ପଞ୍ଚାୟତ ରଥପଦା ଗାଁର ଦିବ୍ୟାଙ୍ଗ ଯୁବକ ଉମାକାନ୍ତ ଦାସ(୩୧) ଟୁଇଟ କରି ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ ଓ ଭଦ୍ରକ ଜିଲାପାଳଙ୍କୁ ଇଚ୍ଛାମୃତ୍ୟୁ ଆଦେଶ ମାଗିଛନ୍ତି। ବି.କମ୍. ପାସ କରିବା ସତ୍ତ୍ୱେ ତାଙ୍କୁ ଚାକିରି ମିଳିନି କି ଭିନ୍ନକ୍ଷମ ଭତ୍ତା ମିଳି ନାହିଁ । ଏପରି ସ୍ଥଳେ ନିଜ ଭବିଷ୍ୟତ ନେଇ ସଂଶୟରେ ପଡିଛନ୍ତି ଉମାକାନ୍ତ । ସେ ମା’ ବାପାଙ୍କର ଏକମାତ୍ର ସନ୍ତାନ ହୋଇଥିବାରୁ ସେମାନଙ୍କ ଅନ୍ତେ ତାଙ୍କୁ ଭିକ ମାଗିବାକୁ ପଡିବ ବୋଲି ସାହିପଡିଶା ଲୋକେ କହି ଟାହିଟାପରା କରୁଥିବାରୁ ଏହା ତାଙ୍କ ଲାଗି ଅସହ୍ୟ ହୋଇ ପଡିଛି ବୋଲି ସେ ଦର୍ଶାଇଛନ୍ତି।
ଏ ସମ୍ପର୍କରେ ଉମାକାନ୍ତ ଗତ ୧୪ ତାରିଖରେ ସୋସିଆଲ ମିଡିଆରେ ଟୁଇଟ୍ କରି ଇଚ୍ଛାମୃତ୍ୟୁ ମାଗିବା ପରେ ଏହା ଭଦ୍ରକ ଜିଲାପାଳ ଜ୍ଞାନରଞ୍ଜନ ଦାସଙ୍କ ଦୃଷ୍ଟିକୁ ଆସିଥିଲା। ସେ ରି-ଟୁଇଟ୍ କରି ଜିଲା ପ୍ରଶାସନକୁ ଆସି ଦେଖା କରନ୍ତୁ ବୋଲି ତାଙ୍କୁ ପରାମର୍ଶ ଦେଇଥିଲେ। ତଦନୁଯାୟୀ ଦିବ୍ୟାଙ୍ଗ ଉମାକାନ୍ତ ମଙ୍ଗଳବାର ଜିଲାପାଳଙ୍କ କାର୍ଯ୍ୟାଳୟ ନିକଟରେ ଆସି ପହଞ୍ଚିଥିଲେ। ଜିଲାପାଳ ଦାସଙ୍କ ନିର୍ଦ୍ଦେଶ କ୍ରମେ ଜିଲା ସାମାଜିକ ସୁରକ୍ଷା ଅଧିକାରୀ ହରେନ୍ଦ୍ର କୁମାର ଦେହୁରୀ, ଅତିରିକ୍ତ ଉପଜିଲାପାଳ ମନୋରମା ଭୂୟାଁ, ଅବସରପ୍ରାପ୍ତ ସାମାଜିକ ସୁରକ୍ଷା ଅଧିକାରୀ ପଦ୍ମନ ରାୟ ପ୍ରମୁଖ ଉମାକାନ୍ତଙ୍କ ସହ ଆଲୋଚନା କରିଥିଲେ। ପ୍ରଶାସନ ପକ୍ଷରୁ ଆବଶ୍ୟକ ସହାୟତା ସାଙ୍ଗକୁ ଭତ୍ତା ପ୍ରଦାନ ଏବଂ ମୁଖ୍ୟସ୍ରୋତରେ ତାଙ୍କୁ ସାମିଲ କରିବା ସକାଶେ ଯଥାସମ୍ଭବ ପଦକ୍ଷେପ ନିଆଯିବ ବୋଲି ଆଶ୍ୱାସନା ଦିଆଯାଇଥିଲା। ଏଭଳି ପ୍ରତିଶ୍ରୁତି ପାଇ ସେ ଘରକୁ ଫେରିଯାଇଛନ୍ତି। ଉମାକାନ୍ତ ୬ ବର୍ଷର ହୋଇଥିବା ବେଳେ ପୋଲିଓରେ ଆକ୍ରାନ୍ତ ହେବା ଯୋଗୁ ତାଙ୍କ ବାମ ଗୋଡ ସରୁ ହୋଇଯାଇଛି। ସେ ଭଲରେ ଚଲାବୁଲା କରି ପାରନ୍ତି ନାହିଁ କି କଥାବାର୍ତ୍ତା କହି ପାରନ୍ତି ନାହିଁ ା ସେ ପ୍ରଶାସନଠାରୁ ପାଇଥିବା ଭିନ୍ନକ୍ଷମ ପ୍ରମାଣପତ୍ରକୁ କେବଳ ଘରେ ସାଇତି ରଖିଥିବା କହିଛନ୍ତି।
