ନୂଆଦିଲ୍ଲୀ,୧୦।୪: ଇଏମ୍ଆଇ ମୋରାଟୋରିୟମ ସ୍କିମରେ ବ୍ୟାଙ୍କ ଗ୍ରାହକଙ୍କୁ ଠକେଇ ହେବା ନେଇ ଆଶଙ୍କା କରାଯାଇଛି। ଏଭଳି ସ୍ଥିତିରେ ମୋରାଟୋୟମ ଦ୍ୱାରା ଇଏମ୍ଆଇ ସ୍ଥଗିତ କରିବା ଲାଗି କେହି ଅଜଣା ବ୍ୟକ୍ତି କଲ୍ କରି ଓଟିପି ନମ୍ବର ଗ୍ରାହକଙ୍କୁ ମାଗୁଥିବା ଘଟଣା ସାମ୍ନାକୁ ଆସିଛି। ଏଭଳି ସ୍ଥିତିରେ କାହାକୁ ଓଟିପି ନମ୍ବର ନ ଦେବା ଲାଗି ବ୍ୟାଙ୍କଗୁଡିକ ଗ୍ରାହକଙ୍କୁ ନିବେଦନ କରିଛନ୍ତି। ଅଜଣା କଲ୍ରେ ଓଟିପି କିମ୍ବା ପିନ୍ ନମ୍ବର ଶେୟାର ନ କରିବାକୁ ଗ୍ରାହକଙ୍କୁ କୁହାଯାଇଛି। ଗତ କିଛି ଦିନ ଧରି ଆକ୍ସିସ ବ୍ୟାଙ୍କ, ଷ୍ଟେଟ ବ୍ୟାଙ୍କ ଭଳି ବ୍ୟାଙ୍କଗୁଡିକ ଗ୍ରାହକଙ୍କୁ ଏ ସଂକ୍ରାନ୍ତରେ ସଚେତନ କରାଇବା ଲାଗି ମୋବାଇଲକୁ ଏସ୍ଏମ୍ଏସ୍ ପଠାଉଛନ୍ତି। ଏଭଳି ସାଇବର ଠକେଇରୁ ଗ୍ରାହକଙ୍କୁ କିଭଳି ସୁରକ୍ଷା ପ୍ରଦାନ କରାଯାଇ ପାରିବ ସେ ଦିଗରେ ବ୍ୟାଙ୍କଗୁଡିକ ଏବେ ପଦକ୍ଷେପ ଗ୍ରହଣ କରୁଛନ୍ତି। ଏହାବାଦ ଗ୍ରାହକଙ୍କୁ ମେଲ୍ ଯୋଗେ ମଧ୍ୟ ସଚେତନ କରାଯାଉଥିବା ଦେଖାଯାଇଛି।
ବ୍ୟାଙ୍କିଙ୍ଗ ତଥ୍ୟ ପାଇବା ଲାଗି ସାଇବର ଅପରାଧୀମାନେ ଏବେ ଅଭିନବ ପନ୍ଥା ଗ୍ରହଣ କରୁଛନ୍ତି। ଏହା ବିରୋଧରେ ଗ୍ରାହକଙ୍କୁ ସଚେତନ ରହିବାକୁ ହେବ ବୋଲି ଆକ୍ସିସ ବ୍ୟାଙ୍କ ପକ୍ଷରୁ ସୂଚନା ରହିଛି। ଇଏମ୍ଆଇ ପେମେଣ୍ଟ ଟାଳିବା ଲାଗି କଲ୍ ଯୋଗେ କେହି ଯଦି ଓଟିପି, ସିଭିଭି, ପାସଓ୍ବାର୍ଡ, ପିନ୍ ସଂକ୍ରାନ୍ତ ତଥ୍ୟ ମାଗିଲେ ତାହା ନ ଦେବାକୁ ବ୍ୟାଙ୍କ ଏହାର ଗ୍ରାହକଙ୍କୁ ସୂଚନା ଦେଇଛି। ଏ ନେଇ ସତର୍କ ରହିବାକୁ ଏସ୍ବିଆଇ ମଧ୍ୟ ବି ଆଲର୍ଟ ବି ଆଓ୍ବାର ନାମରେ ପଦକ୍ଷେପ ଗ୍ରହଣ କରିଛି। ସେହିଭଳି ଏଚ୍ଡିଏଫ୍ସି ବ୍ୟାଙ୍କ ପକ୍ଷରୁ ମଧ୍ୟ ସମାନ ପ୍ରକାରର ପଦକ୍ଷେପ ହାତକୁ ନିଆଯାଇଛି। ମିଥ୍ୟା ୟୁପିଆଇ ଆଇଡିରେ ପିଏମ୍ କେୟାର୍ସ ପାଣ୍ଠିକୁ ଦାନରେ ହେଉଥିବା ଠକେଇ ନେଇ କିଛି ଦିନ ତଳେ ଲୋକଙ୍କୁ ସଚେତନ କରାଯାଇଥିଲା।
