ନୂଆଦିଲ୍ଲୀ,୧୪।୫: ଆର୍ଥତ୍କ ବର୍ଷ ୨୦୧୯-୨୦ ଲାଗି ସରକାର ଆୟକର ରିଟର୍ନ ପ୍ରଦାନ କରିବା ସୀମାକୁ ଚଳିତ ବର୍ଷ ୩୦ ନଭେମ୍ବର ଯାଏ ବୃଦ୍ଧି କରିଛନ୍ତି। ବର୍ତ୍ତମାନ ଦେଶର ଅର୍ଥ ବ୍ୟବସ୍ଥା ପ୍ରଭାବିତ ସ୍ଥିତିରେ ରହିଥିବାରୁ ଉଭୟ ବାଣିଜ୍ୟ ଏବଂ ବ୍ୟକ୍ତି ବିଶେଷଙ୍କୁ ଫାଇଦା ଦେବା ଲାଗି ଅର୍ଥମନ୍ତ୍ରୀ ବିଭିନ୍ନ ଘୋଷଣା କରିଛନ୍ତି। ଟ୍ୟାକ୍ସ ଡିଡକସନ ଆଟ୍ ସୋର୍ସ(ଟିଡିଏସ୍) ଏବଂ ଟ୍ୟାକ୍ସ କଲେକଟେଡ୍ ଆଟ୍ ସୋର୍ସ(ଟିସିଏସ୍)୨୫% ହ୍ରାସ କରାଯାଇଛି। ନନ୍ ସାଲାରି ପେମେଣ୍ଟ ଟୁ ରେସିଡେଣ୍ଟ କ୍ଷେତ୍ରରେ ଏହା ଲାଗୁ ହେବ। କଣ୍ଟ୍ରାକ୍ଟ, ଇଣ୍ଟରେଷ୍ଟ, ଡିଭିଡେଣ୍ଡ, କିମଶନ ଏବଂ ବ୍ରୋକ୍ରେଜ ଭଳି କ୍ଷେତ୍ରରେ ୨୫% ଟିଡିଏସ୍ ହ୍ରାସ ହେବ ବୋଲି ଜଣାପଡ଼ିଛି। ଏଭଳି ପଦକ୍ଷେପ ଦ୍ୱାରା ଲୋକଙ୍କ ନିକଟକୁ ପ୍ରାୟ ୫୦ ହଜାର କୋଟି ଟଙ୍କାର ନଗଦ ଅର୍ଥ ଆସିପାରିବ। ଟିକସ ସମାଧାନ ସ୍କିମ୍ ବିବାଦ ସେ ବିଶ୍ୱାସର ଅବଧିକୁ ଚଳିତ ବର୍ଷ ଡିସେମ୍ବର ୩୧ ଯାଏ ବୃଦ୍ଧି କରାଯାଇଛି। ସୀତାରାମନ କହିଛନ୍ତି ଯେ, ଆୟକର ବିଭାଗ ପଡି ରହିଥିବା ଟିକସ ରିଫଣ୍ଡକୁ ତୁରନ୍ତ ସମାଧାନ କରିବ। ଏହି ଧାରାରେ ଦାତବ୍ୟ ଅନୁଷ୍ଠାନ, ଏଲ୍ଏଲ୍ପି, ଅଣ କର୍ପୋରେଟ ବାଣିଜ୍ୟ, ସ୍ବତ୍ୱାଧିକାରୀ ଫାର୍ମ ଏବଂ ଅନ୍ୟ ସଂସ୍ଥାଗୁଡିକ ଲାଭବାନ ହୋଇପାରିବେ। ଏହି ସମୟ ମଧ୍ୟରେ ଆୟକର ବିଭାଗ ପକ୍ଷରୁ ୧୮,୦୦୦ କୋଟି ଟଙ୍କାର ରିଫଣ୍ଡ ଜାରି କରାଯାଇଛି। ଅଣ ବେତନ ପେମେଣ୍ଟରେ ଟିସିଏସ୍, ଟିଡିଏସ୍ ୨୫% ହ୍ରାସ ହେବା ଦ୍ୱାରା ଭେଣ୍ଡରଙ୍କ ନିକଟକୁ ଅଧିକ ଅର୍ଥ ଆସିପାରିବ। ଲୋକଙ୍କ ନିକଟକୁ ଲିକ୍ୟୁଡିଟି ଆସିବା ଦ୍ୱାରା ଅର୍ଥ ବ୍ୟବସ୍ଥାକୁ ଏହା ସହାୟତା କରିବ ବୋଲି ନାଞ୍ଜିଆ ଆଣ୍ଡରସନ ଏଲ୍ଏଲ୍ପିର ନିର୍ଦ୍ଦେଶକ ସନ୍ଦୀପ ଝୁନ୍ଝୁନ୍ଓ୍ବାଲା କହିଛନ୍ତି।
