ଭୁବନେଶ୍ୱର,୨ା୯(ବ୍ୟୁରୋ) : ଓଡ଼ିଶାରେ ଆରମ୍ଭ ହୋଇଛି ‘ଓ୍ବାନ୍ ନେଶନ ଓ୍ବାନ୍ ରାଶନ’ ବ୍ୟବସ୍ଥା। ପ୍ରଥମ ପାଇଲଟ୍ ପ୍ରକଳ୍ପ ଭାବେ ଭୁବନେଶ୍ୱର ମହାନଗର ନିଗମ (ବିଏମ୍ସି) ଅଞ୍ଚଳରେ ରବିବାରଠାରୁ ଲାଗୁ କରାଯାଇଛି। ଏହି ନୂଆ ବ୍ୟବସ୍ଥା ଅନୁଯାୟୀ, ଜାତୀୟ ଖାଦ୍ୟ ସୁରକ୍ଷା ଆଇନ (ଏନ୍ଏଫ୍ଏସ୍ଏ) ଓ ରାଜ୍ୟ ଖାଦ୍ୟ ସୁରକ୍ଷା ଯୋଜନା (ଓଏଫ୍ଏସ୍ଏସ୍)ରେ ଅନ୍ତର୍ଭୁକ୍ତ ହିତାଧିକାରୀମାନେ ଦେଶର ଯେକୌଣସି ସ୍ଥାନରୁ ସରକାରୀ ଚାଉଳ, ଗହମ, କିରୋସିନ ଆଦି ରାଶନ ସାମଗ୍ରୀ ପାଇପାରିବେ। ଏଥିପାଇଁ ରାଶନ କାର୍ଡ ସହ ଆଧାର ଲିଙ୍କ୍କୁ ବାଧ୍ୟତାମୂଳକ କରାଯାଇଛି। ଏବେ ରାଜ୍ୟରେ ୯୭.୩ ପ୍ରତିଶତ ରାଶନ କାର୍ଡ ସହ ଆଧାର ଲିଙ୍କ୍ ହୋଇପାରିଛି। ଆହୁରି ୨ଲକ୍ଷ ପରିବାର ଏ ପର୍ଯ୍ୟନ୍ତ ଆଧାର ଲିଙ୍କ୍ କରି ନ ଥିବା ଜଣାପଡିଛି। ତେଣୁ ରାଜ୍ୟରେ ଏହି ବ୍ୟବସ୍ଥାକୁ ସଫଳ ଭାବେ କାର୍ଯ୍ୟକାରୀ କରିବା ପାଇଁ ଆଧାର ଲିଙ୍କ୍ ପ୍ରକ୍ରିୟାକୁ ଆହୁରି ୧୫ ଦିନ ପର୍ଯ୍ୟନ୍ତ ବୃଦ୍ଧି କରାଯାଇଛି।
୨୦୨୦ ଜୁଲାଇରୁ ଦେଶରେ ଓ୍ବାନ୍ ନେଶନ ଓ୍ବାନ୍ ରାଶନ ବ୍ୟବସ୍ଥା ଆରମ୍ଭ ହେବାକୁ ଯାଉଛି। ଏହାପୂର୍ବରୁ ବିଏମ୍ସିରେ ଆରମ୍ଭ ହୋଇଥିବା ଏହି ଯୋଜନାରେ ଏଣିକି ଯେକୌଣସି ଖାଉଟି ବଣ୍ଟନ କେନ୍ଦ୍ରରୁ ହିତାଧିକାରୀମାନେ ସେମାନଙ୍କ ରାଶନ ସାମଗ୍ରୀ ନେଇପାରିବେ। ଏହାକୁ ସଫଳ କରିବାକୁ ପଦକ୍ଷେପ ଆରମ୍ଭ ହୋଇଥିବାବେଳେ ପରବର୍ତ୍ତୀ ସମୟରେ ରାଜ୍ୟବ୍ୟାପୀ କାର୍ଯ୍ୟକାରୀ କରାଯିବ। ଏଥିପାଇଁ ବିଏମ୍ସି ପକ୍ଷରୁ ୧୧୮ କେନ୍ଦ୍ର ଖୋଲାଯାଇଛି। ପ୍ରାଥମିକ ପର୍ଯ୍ୟାୟରେ ହିତାଧିକାରୀମାନେ କାର୍ଡ ପୋର୍ଟାବିଲିଟି କରୁଛନ୍ତି। ଆସନ୍ତା ୨୫ତାରିଖ ପର୍ଯ୍ୟନ୍ତ ଏହା ଚାଲିବ। ଏହାପରେ ବିଏମ୍ସି ଅଞ୍ଚଳର ହିତାଧିକାରୀମାନେ ସୁବିଧା ମୁତାବକ ଯେକୌଣସି ରାଶନ କେନ୍ଦ୍ରରୁ ସାମଗ୍ରୀ ନେଇପାରିବେ। ଏହି ବ୍ୟବସ୍ଥା ପୂର୍ଣ୍ଣ କାର୍ଯ୍ୟକାରୀ ହେବା ପରେ ଭୂତ ହିତାଧିକାରୀ ଓ ଏକାଧିକ ସ୍ଥାନରୁ ରାଶନ କାର୍ଡ କରି ସାମଗ୍ରୀ ଉଠାଉଥିବା ହିତାଧିକାରୀ ବାଦ୍ ପଡ଼ିବେ। ଫଳରେ ଏହି ଯୋଜନାରେ ସାମଗ୍ରୀ ବାଟମାରଣା ରୋକାଯିବା ସହ ସ୍ବଚ୍ଛତା ବଜାୟ ରହିବ।
କାର୍ଯ୍ୟକ୍ରମ ଶୁଭାରମ୍ଭ ଅବସରରେ ଖାଦ୍ୟ ଓ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି, ବିଏମ୍ସିରେ ଏହି ବ୍ୟବସ୍ଥାକୁ ପରୀକ୍ଷାମୂଳକ ଭାବେ ଆରମ୍ଭ କରାଯାଇଛି। ଖୁବ୍ଶୀଘ୍ର ଏହାକୁ ସାରା ରାଜ୍ୟରେ ଲାଗୁ କରାଯିବ। ଏହାପରେ ଅନ୍ୟ ରାଜ୍ୟ ସହିତ ମଧ୍ୟ କାର୍ଡଗୁଡ଼ିକୁ ସଂଯୋଗ କରାଯିବ। ହିତାଧିକାରୀମାନେ ଏଣିକି ରାଜ୍ୟର ଯେକୌଣସି ସାଧାରଣ ଖାଉଟି ବଣ୍ଟନ କେନ୍ଦ୍ରରୁ ପିଡିଏସ୍ ସାମଗ୍ରୀ ନେଇପାରିବେ। ସେମାନଙ୍କୁ ନିର୍ଦ୍ଦିଷ୍ଟ ଡିଲର ଉପରେ ନିର୍ଭର କରିବାକୁ ପଡ଼ିବ ନାହିଁ। ଏଥିନିମନ୍ତେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଉଛି ବୋଲି ମନ୍ତ୍ରୀ ସ୍ବାଇଁ କହିଛନ୍ତି।