ନୂଆଦିଲ୍ଲୀ,୧୭।୧ : ମଙ୍ଗଳବାର ଏକ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି। ଜଷ୍ଟିସ ଏସ.କେ କୌଲ, ଜଷ୍ଟିସ ଏସ ଓକା ଏବଂ ଜେ.ବି ପାରଦୀୱାଲାଙ୍କ ନେତୃତ୍ୱରେ ଏକ ବେଞ୍ଚ କହିଛନ୍ତି, ଅନାବଶ୍ୟକ ଭାବେ ଲୋକଙ୍କୁ ଜେଲରେ ରଖିବାରେ ଆମେ ବିଶ୍ୱାସ କରୁନାହୁଁ। ୨୦୨୦ ଦିଲ୍ଲୀ ଦଙ୍ଗା ମାମଲାରେ ତିନିଜଣ ଛାତ୍ର କାର୍ଯ୍ୟକର୍ତ୍ତାଙ୍କୁ ଦିଆଯାଇଥିବା ଜାମିନ ବିରୋଧରେ ଦିଲ୍ଲୀ ପୋଲିସର ଆବେଦନ ଶୁଣାଣି ବେଳେ ସର୍ବୋଚ୍ଚ ନ୍ୟାୟାଳୟ ଏହି ମନ୍ତବ୍ୟ ଦେଇଛନ୍ତି। ଏହି ସମୟରେ କୋର୍ଟ ଏହା ମଧ୍ୟ କହିଛନ୍ତି ଯେ ଏହି ମାମଲାରେ ଘଣ୍ଟା ଘଣ୍ଟା ଧରି ଜାମିନ ଆବେଦନ ଶୁଣିବାରେ କେବଳ ଦିଲ୍ଲୀ ହାଇକୋର୍ଟଙ୍କର ସମୟ ନଷ୍ଟ ହୋଇଛି।
ସୂଚନାଯୋଗ୍ୟ, ନାଗରିକତା ସଂଶୋଧନ ଆଇନ (ସିଏଏ)କୁ ବିରୋଧ ସମୟରେ ଗିରଫ ହୋଇଥିବା ଛାତ୍ର କାର୍ଯ୍ୟକର୍ତ୍ତା ନତାଶା ନରୱାଲ, ଦେବଙ୍ଗନା କାଲିତା ଏବଂ ଆସିଫ ଇକବାଲ ତନହାଙ୍କୁ ସାମ୍ପ୍ରଦାୟିକ ହିଂସା ମାମଲାରେ ଦିଲ୍ଲୀ ହାଇକୋର୍ଟ ଜାମିନ ପ୍ରଦାନ କରିଥିଲେ। ୧୫ ଜୁନ 1୨୦୨୧ ରେ ହାଇକୋର୍ଟ ଦେଇଥିବା ନିଷ୍ପତ୍ତି ବିରୋଧରେ ଦିଲ୍ଲୀ ପୋଲିସ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ଶୁଣାଣି ସମୟରେ ପ୍ରଥମେ ପୋଲିସ ପକ୍ଷରୁ ହାଜର ହୋଇଥିବା ଆଇନଜୀବୀ ରଜତ ନାୟାର, ଦୁଇ ସପ୍ତାହ ପରେ ଶୁଣାଣି ପାଇଁ ଆବେଦନକୁ ସ୍ଥଗିତ ରଖିବାକୁ ବେଞ୍ଚଙ୍କୁ ଅନୁରୋଧ କରିଥିଲେ। ବେଞ୍ଚ କହିଛନ୍ତି ଯେ ସମ୍ବିଧାନ ଖଣ୍ଡନୀଠରେ ପୂର୍ବରୁ ସୋଲିସିଟର ଜେନେରାଲ ମଧ୍ୟ ସମାନ ପ୍ରସଙ୍ଗ ଉପରେ ଯୁକ୍ତି ଜାରି ରଖିଛନ୍ତି। ଜାନୁଆରୀ ୩୧ ରେ ଏହି ମାମଲାର ଶୁଣାଣି ପାଇଁ ତାଲିକାଭୁକ୍ତ କରାଯାଇଛି ।
ଜାମିନ ମାମଲାରେ ଆତଙ୍କବାଦ ବିରୋଧୀ ଆଇନ ୟୁଏପିଏ ଉପରେ ଆଲୋଚନା କରି ହାଇକୋର୍ଟ ପୂର୍ବରୁ ଅସନ୍ତୋଷ ପ୍ରକାଶ କରିଥିଲେ। ଏହା ମଧ୍ୟ ସ୍ପଷ୍ଟ କରାଯାଇଛି ଯେ ଏହାର ନିଷ୍ପତ୍ତି କୌଣସି ପ୍ରକ୍ରିୟାରେ ଏକ ଉଦାହରଣ ଭାବରେ ବିବେଚନା କରାଯିବ ନାହିଁ ଏବଂ ଉଭୟ ପକ୍ଷଙ୍କ ଉପରେ ଭରସା କରାଯାଇପାରିବ ନାହିଁ।
