ମୁମ୍ବାଇ: ଏବେ ସାରା ବିଶ୍ୱରେ କରୋନା ବିରୋଧରେ ଲଢ଼େଇ ଚାଲିଛି। କରୋନା ଯୋଗୁ ସବୁଠୁ ଅଧିକ ପ୍ରଭାବିତ ହୋଇଛି ଆମେରିକା। ଏଠାରେ ଏଯାବତ୍ ୧୧ଲକ୍ଷରୁ ଅଧିକ ଲୋକ କରୋନାରେ ସଂକ୍ରମିତ ହୋଇଥିବା ବେଳେ ୭୦,୦୦୦ରୁ ଊର୍ଦ୍ଧ୍ୱ ପ୍ରାଣ ହରାଇ ସାରିଛନ୍ତି। ସେଠାରେ ବି ଏହି ଲକ୍ଡାଉନ୍ ଘୋଷଣା କରାଯାଇଛି। କରୋନାରୁ ରକ୍ଷା ପାଇବା ପାଇଁ ଲୋକେ ଘରେ ରହୁଥିବା ବେଳେ ବିଭିନ୍ନ ଉପାୟରେ ସମୟ ଅତିବାହିତ କରୁଛନ୍ତି। ଅନେକ ଲୋକ ଟିଭି ଦେଖି ସମୟ ବିତାଉଛନ୍ତି। ତେବେ ଲକ୍ଡାଉନ୍ ବେଳେ ସେଠାକାର ଲୋକେ ହଲିଉଡ୍ ଅପେକ୍ଷା ବଲିଉଡ୍ର ଗୋଟିଏ ଫିଲ୍ମକୁ ସବୁଠାରୁ ଅଧିକ ଥର ଦେଖିସାରିଥିବା ଏକ ରିପୋର୍ଟରୁ ଜଣାପଡ଼ିଛି। ସୂଚନା ଅନୁଯାୟୀ, ଆମିରଙ୍କ ସୁପରହିଟ୍ ଫିଲ୍ମ ‘ଥ୍ରି ଇଡିୟଟ୍ସ’କୁ ଆମେରିକା ଲୋକେ ସବୁଠୁ ଅଧିକ ଥର ଦେଖିଛନ୍ତି। ଆଉ ଏହି ଖବର ପାଇବା ପରେ ଫିଲ୍ମର ନିର୍ଦ୍ଦେଶକ ରାଜକୁମାର ହିରାନୀ କୁଆଡେ ବେଶ୍ ଖୁସି ହୋଇଯାଇଛନ୍ତି। ତେବେ ଏହି ମୁଭିଟି ବେଶ୍ ସଫଳ ହୋଇଥିଲା। ୨୦୦୯ରେ ଏହି ମୁଭି ରିଲିଜ ହୋଇଥିଲା। ଆମିରଙ୍କ ସହିତ ଏଥିରେ କରୀନା କପୁର, ଆର. ମାଧବନ, ଶରମନ୍ ଯୋଶୀ,ବୋମନ ଇରାନୀ ପ୍ରମୁଖ ଅଭିନୟ କରିଥିଲେ।
