ବାରିପଦା ଅଫିସ, ୨୪ା୩- ଓଡ଼ିଶାରୁ ବିଏଡ ଟିଚିଙ୍ଗ୍ ପରୀକ୍ଷା ଦେବା ପାଇଁ ଆନ୍ଧ୍ରକୁ ଯାଇଥିବା ୪୨ ପରୀକ୍ଷାର୍ଥୀ ସେଠାରେ ଫଶି ରହିଛନ୍ତି। କରୋନା ଭାଇରସ୍ ସଂକ୍ରମଣକୁ ରୋକିବା ଲାଗି ଟ୍ରେନ୍ ବାତିଲ ହୋଇଯାଇଥିବାରୁ ପରୀକ୍ଷାର୍ଥୀମାନେ ସେଠାରୁ ଆସିପାରୁନାହାନ୍ତି। ଓଡ଼ିଶା ଆଣିବାକୁ ସେମାନେ ଏକ ଭିଡିଓ ପୋଷ୍ଟ କରି ଅନୁରୋଧ କରିଛନ୍ତି। ଫସି ରହିଥିବା ୪୨ ଜଣଙ୍କ ମଧ୍ୟରୁ ୧୮ ପୁରୁଷ ଓ ୨୪ ଜଣ ମହିଳା ଅଛନ୍ତି। ସେମାନଙ୍କ ମଧ୍ୟରୁ ୨ ଜଣ ମହିଳା ଗର୍ଭବତୀ ରହିଛନ୍ତି। ୪୨ ଜଣଙ୍କ ମଧ୍ୟରୁ ମୟୂରଭଞ୍ଜ ଜିଲାର ୫, ବାଲେଶ୍ୱର ଜିଲାର ୩୨ ଓ ଭଦ୍ରକ ଜିଲାର ୫ ଜଣ ରହିଛନ୍ତି। ପ୍ରକାଶ ଯେ, ପରୀକ୍ଷାର୍ଥୀମାନେ ଗତ ୧୬ ତାରିଖରୁ ୨୧ ତାରିଖ ପର୍ଯ୍ୟନ୍ତ ବିଏଡ ପରୀକ୍ଷା ଦେବା ପାଇଁ ଆନ୍ଧପ୍ରଦେଶ ରାଜ୍ୟ ପ୍ରକାଶନ ଜିଲା ମାର୍କାପୁର ଟାଉନକୁ ଯାଇଥିଲେ। ସେଠାରେ ଜଣେ ବ୍ୟକ୍ତିଙ୍କ ଭଡ଼ା ଘରେ ରହି ପରୀକ୍ଷା ଦେଉଥିଲେ। ପରୀକ୍ଷା ଶେଷ ହେବା ପରେ ୨୨ତାରିଖରେ ଟ୍ରେନ୍ ଟିକେଟ ହୋଇଥିଲା। ୨୨ ତାରିଖରେ ଜନତା କର୍ଫ୍ୟୁ ଲାଗି ଟ୍ରେନ ଟିକେଟ ବାତିଲ ହୋଇଯାଇଥିଲା। ପରେ ୨୩ ତାରିଖରେ ଟିକେଟ ହୋଇଥିବା ବେଳେ ତାହା ମଧ୍ୟ ବାତିଲ ହୋଇଥିଲା ୩୧ ତାରିଖ ପର୍ଯ୍ୟନ୍ତ କୌଣସି ଟିକେଟ ହୋଇପାରିବ ନାହିଁ। ବର୍ତ୍ତମାନ ସେମାନେ ଅସୁବିଧାରେ ଥିଲା ବେଳେ ତାଙ୍କ ପାଖରେ ଖର୍ଚ୍ଚ କରିବାକୁ ଟଙ୍କା ନାହିଁ। ସେଠାରେ ଫଶି ରହିଥିବା ମୟୂରଭଞ୍ଜର ଚିନ୍ମୟ ଦାସ ପ୍ରକାଶ କରିଛନ୍ତି। ସେହିଭଳି ସେଠାରେ ଲକ୍ଡାଉନ ପରିସ୍ଥିତ ହୋଇଥିବବାରୁ କିଛି ଖାଇବାକୁ ମିଳୁନାହିଁ। ମଙ୍ଗଳବାର ସକାଳେ ସେମାନେ ବିସ୍କୁଟ ଖାଇଥିବା କହିଛନ୍ତି। ଏଣୁ ସେମାନେ ରାଜ୍ୟ ସରକାରଙ୍କୁ ଓଡ଼ିଶାକୁ ଫେରାଇ ଆଣିବା ପାଇଁ ଅନୁରୋଧ କରିଛନ୍ତି। ଏନେଇ ସେମାନେ ଏକ ଭିଡିଓ ସୋସିଆଲ୍ ମିଡିଆରେ ପୋଷ୍ଟ କରିଛନ୍ତି।
