ଅମରାବତୀ,୨୪-୫:ଆନ୍ଧ୍ରପ୍ରଦେଶ ବିଧାନସଭା ନିର୍ବାଚନରେ ଓ୍ବାଇଏସ୍ଆର୍ ଜଗନ୍ମୋହନ ରେଡ୍ଡୀଙ୍କ ଦଳ ଓ୍ବାଇଏସ୍ଆର୍ କଂଗ୍ରେସ ପାର୍ଟି ନିରଙ୍କୁଶ ସଂଖ୍ୟାଗରିଷ୍ଠତା ସହ ସରକାର ଗଢ଼ିବାକୁ ଯାଉଛି। ଜଗନ୍ମୋହନ ଆସନ୍ତା ୩୦ ତାରିଖରେ ମନ୍ଦିର ସହର ତିରୁପତିରେ ନୂତନ ମୁଖ୍ୟମନ୍ତ୍ରୀ ଭାବେ ଶପଥ ନେବେ ବୋଲି ଦଳର ଜଣେ ନେତା କହିଛନ୍ତି। ଆସନ୍ତା ଶନିବାର ନବନିର୍ବାଚିତ ଓ୍ବାଇଏସ୍ଆରସିପି ବିଧାୟକମାନଙ୍କ ବୈଠକ ବସି ଜଗନ୍ମୋହନଙ୍କୁ ସେମାନଙ୍କ ନେତା ନିର୍ବାଚିତ କରାଯିବ ବୋଲି ବରିଷ୍ଠ ନେତା ଉମାରେଡ୍ଡୀ ଭେଙ୍କଟେଶ୍ୱରଲୁ ଖବରଦାତାମାନଙ୍କୁ ସୂଚନା ଦେଇଛନ୍ତି।
ଉଭୟ ଲୋକ ସଭା ଓ ରାଜ୍ୟ ବିଧାନସଭାରେ ଓ୍ବାଇଏସ୍ଆର କଂଗ୍ରେସ ପାର୍ଟି (ଓ୍ବାଇଏସ୍ଆରସିପି) ପୂର୍ଣ୍ଣ ବହୁମତ ହାସଲ କରିବାକୁ ଯାଉଛି। ଫଳରେ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରାବାବୁ ନାଇଡୁଙ୍କ ତେଲୁଗୁଦେଶମ୍ ପାର୍ଟି (ଟିଡିପି)କୁ ଶକ୍ତ ଝଟ୍କା ଲାଗିଛି। ରାତି ୮ଟା ସୁଦ୍ଧା ଟ୍ରେଣ୍ଡ୍ ଅନୁଯାୟୀ ଆନ୍ଧ୍ର ବିଧାନସଭାର ୧୭୫ ଆସନ ମଧ୍ୟରୁ ୧୪୪ଟିରେ ଓ୍ବାଇଏସ୍ଆର୍ କଂଗ୍ରେସ ଆଗରେ ଥିଲାବେଳେ ଶାସକ ଟିଡିପି ମାତ୍ର ୨୯ ଆସନରେ ଆଗରେ ରହିଛି। ସେହିପରି ରାଜ୍ୟର ୨୫ଟି ଲୋକ ସଭା ଆସନରୁ ୨୩ଟିରେ ଓ୍ବାଇଏସ୍ଆରସିପି ଆଗରେ ଥିବା ଜଣାପଡିଛି। ଦଳର ଏହି ସଫଳତାକୁ ନେଇ ଜଗନଙ୍କ ଶିବିରରେ ଉତ୍ସବର ମାହୋଲ ସୃଷ୍ଟି ହୋଇଥିବାବେଳେ ଚନ୍ଦ୍ରାବାବୁ ନାଇଡୁଙ୍କ କ୍ୟାମ୍ପ ଏପର୍ଯ୍ୟନ୍ତ ପରାଜୟ ସ୍ବୀକାର କରିନାହିଁ।
ଆନ୍ଧ୍ରପ୍ରଦେଶ ଦୁଇଭାଗ ହୋଇ ତେଲେଙ୍ଗାନା ଗଠନ ହୋଇଥିବାବେଳେ ସେବେଠାରୁ ଚନ୍ଦ୍ରାବାବୁ ଆନ୍ଧ୍ରରେ ଶାସନ କରିଆସୁଥିଲେ। ଏଥର ତାଙ୍କ ଦଳ ଗୋଟିଏ ବି ଲୋକ ସଭା ଆସନ ଜିତିବା ସମ୍ଭାବନା ନ ଥିବାବେଳେ ବିଧାନସଭାରେ ଶୋଚନୀୟ ପରାଜୟବରଣ କରିବାକୁ ଯାଉଛି। କେନ୍ଦ୍ରରେ ବିରୋଧୀ ଦଳଗୁଡିକୁ ଏକାଠି କରି ସରକାର ଗଠନ ଲାଗି ଚନ୍ଦ୍ରାବାବୁ ଯେଉଁ ଉଦ୍ୟମ ଚଳାଇଥିଲେ ତାହା ଫସର ଫାଟି ଯାଇଛି।
୨୦୦୯ରେ ଆନ୍ଧ୍ରର ସବୁଠୁ ଲୋକପ୍ରିୟ ମୁଖ୍ୟମନ୍ତ୍ରୀ ଓ୍ବାଇଏସ୍ ରାଜଶେଖର ରେଡ୍ଡୀଙ୍କର ହେଲିକପ୍ଟର ଦୁର୍ଘଟଣାରେ ପରଲୋକ ହେବା ପରେ ତାଙ୍କ ପୁଅ ଜଗନ୍ମୋହନ (୪୬) ୨୦୧୧ରେ ନୂଆ ଦଳ ଓ୍ବାଇଏସ୍ଆର କଂଗ୍ରେସ ପାର୍ଟି ଗଠନ କରିଥିଲେ। ସେ ରାଜ୍ୟବ୍ୟାପୀ ଦୁଇଥର ପଦଯାତ୍ରା କରି ନିଜର ଲୋକପ୍ରିୟତା ବଢ଼ାଇଥିଲେ। ୩୬୪୮ କିଲୋମିଟର ପଦଯାତ୍ରା କରି ସେ କୋଟିଏରୁ ଊର୍ଦ୍ଧ୍ୱ ଲୋକଙ୍କ ସହ ମିଶିଥିଲେ। ଆନ୍ଧ୍ରକୁ ସ୍ବତନ୍ତ୍ର ମାନ୍ୟତା ଦାବି ନେଇ ସେ ଆନ୍ଦୋଳନ ଚଳାଇଥିଲେ। ଅନ୍ୟପକ୍ଷରେ ଭାଜପା ମେଣ୍ଟରୁ ଦୂରେଇ ଯାଇ ଚନ୍ଦ୍ରାବାବୁଙ୍କ ଦଳ ବିରୋଧୀ ଶିବିରରେ ସାମିଲ ହେବା ତାଙ୍କ ପାଇଁ ଭୁଲ୍ ନିଷ୍ପତ୍ତି ଥିଲା ବୋଲି କୁହାଯାଉଛି। ଉଭୟ ଲୋକ ସଭା ଓ ରାଜ୍ୟ ବିଧାନସଭାରେ ଓ୍ବାଇଏସ୍ଆର୍ସିପି ଆଶାତୀତ ସଫଳତା ହାସଲ କରିବାକୁ ଯାଉଥିବାବେଳେ ଏହା ଜନସାଧାରଣଙ୍କର ବିଜୟ ବୋଲି ଜଗନ୍ କହିଛନ୍ତି। ଏଭଳି ବୃହତ୍ ବିଜୟ ପାଇଁ ସେ ରାଜ୍ୟବାସୀଙ୍କୁ ଧନ୍ୟବାଦ ଜଣାଇଛନ୍ତି। ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ଫୋନ୍ ଯୋଗେ ଜଗନଙ୍କୁ ଅଭିନନ୍ଦନ ଜଣାଇଛନ୍ତି। ସେହିପରି ଲୋକ ସଭାରେ ଭାଜପାର ବଡ଼ ବିଜୟ ଲାଗି ଜଗନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅଭିନନ୍ଦନ ଜଣାଇଛନ୍ତି। ଆନ୍ଧ୍ରକୁ ସ୍ବତନ୍ତ୍ର ରାଜ୍ୟ ମାନ୍ୟତା ନ ମିଳିବା ପର୍ଯ୍ୟନ୍ତ ତାଙ୍କର ଲଢ଼େଇ ଜାରି ରହିବ ବୋଲି ଜଗନ କହିଛନ୍ତି।
୨୦୦୪ରେ କଡ଼ାପା ଜିଲାରୁ କଂଗ୍ରେସ ପାଇଁ ନିର୍ବାଚନ ପ୍ରଚାରରୁ ଜଗନ୍ ତାଙ୍କ ରାଜନୈତିକ କ୍ୟାରିୟର ଆରମ୍ଭ କରି ଉକ୍ତ ନିର୍ବାଚନମଣ୍ଡଳୀରୁ ୨୦୦୯ରେ କଂଗ୍ରେସ ଟିକେଟରେ ଲୋକ ସଭାକୁ ଜିତିଥିଲେ।
