ଯାଜପୁର ରୋଡ,୧୪।୧୦(ନି.ପ୍ର)- ବ୍ୟାସନଗର ପବ୍ଲିକ ସ୍କୁଲରେ ଚାଲିଥିବା ଆନ୍ତଃରାଜ୍ୟ ସିବିଏସଇ କବାଡି ପ୍ରତିଯୋଗିତା ସୋମବାର ଶାନ୍ତିଶୃଙ୍ଖଳାର ସହ ଶେଷ ହୋଇଛି। ଓଡ଼ିଶା, ଛତିଶଗଡ଼ ଓ ପଶ୍ଚିମବଙ୍ଗ ୩ଟି ରାଜ୍ୟର ସିବିଏସ୍ଇ ବୋର୍ଡ ନିୟନ୍ତ୍ରଣାଧିନ ଇଂଲିଶ ମାଧ୍ୟମ ବିଦ୍ୟାଳୟସ୍ତରୀୟ ଭୁବନେଶ୍ୱର କ୍ଲଷ୍ଟର-୨ର ୩ଦିନ ବ୍ୟାପୀ ଟୁର୍ନାମେଣ୍ଟ ଅନୁଷ୍ଠିତ ହୋଇଥିଲା। ଅନ୍ତିମ ଦିବସରେ ୧୦ଟି ମ୍ୟାଚ୍ ଖେଳାଯାଇଥିଲା। ୧୭ବର୍ଷରୁ କମ ବର୍ଷ ବାଳିକା ବର୍ଗ, ୧୯ ବର୍ଷରୁ କମ ବାଳିକା ବର୍ଗ, ୧୭ ବର୍ଷରୁ କମ ବର୍ଷ ବାଳକ ବର୍ଗ ଓ ୧୯ ବର୍ଷରୁ କମ ବାଳକ ବର୍ଗ ମଧ୍ୟରେ ୪ଟି ଫାଇନାଲ ମ୍ୟାଚ୍ ଖେଳାଯାଇ ସେସବୁ ଗ୍ରୁପର ଚାମ୍ପିୟନ୍ ଓ ରନର୍ସ ଅପ୍ ଘୋଷଣା କରାଯାଇଥିଲା। ସନ୍ଧ୍ୟାରେ ଅନୁଷ୍ଠିତ ଉଦ୍ଯାପନୀ ଉସତ୍ବରେ ଅତିଥିମାନେ ବିଜୟୀ ଦଳକୁ ଟ୍ରଫି ଓ ପୁରସ୍କାର ପ୍ରଦାନ କରିଥିଲେ। ୧୯ବର୍ଷରୁ କମ୍ ବର୍ଷ ବାଳକ ବର୍ଗ ଫାଇନାଲରେ ଛତିଶଗଡ଼ର ବାଲସୀର ସରାଇପଲ୍ଲୀସ୍ଥିତ ପ୍ରତିଭା ପବ୍ଲିକ ସ୍କୁଲ ଚାମ୍ପିୟନ୍ ହୋଇଥିବାବେଳେ ସେହି ରାଜ୍ୟର ବିଳାସପୁରସ୍ଥିତ କ୍ୟାରିୟର ପଏଣ୍ଟ ୱାଲର୍ଡ ସ୍କୁଲ ରନର୍ସ ଅପ୍ ବିବେଚିତ ହୋଇଛି। ଓଡ଼ିଶାର ବଡ଼ବିଲସ୍ଥିତ ଜିନ୍ଦଲ ସ୍କୁଲ ୩ୟ ସ୍ଥାନ ଅଧିକାର କରିଛି। ସେହିପରି ୧୯ବର୍ଷରୁ କମ ବର୍ଷ ବାଳିକା ବର୍ଗରେ ପଶ୍ଚିମବଙ୍ଗର ପଶ୍ଚିମ ବର୍ଦ୍ଧମାନ ଜିଲାର ପଦଭେଶ୍ୱର ଡିଏଭି ସ୍କୁଲ ଚାମ୍ପିୟନ୍ ହୋଇ ଟ୍ରଫି ଗ୍ରହଣ କରିଥିବାବେଳେ ଭୁବନେଶ୍ୱରର ବିକାଶ ରେସିଡେନସିଆଲ ରନର୍ସ ଅପ୍ କପ ହାସଲ କରିଛି। ସମ୍ବଲପୁରର ସେଭେନ ହିଲ ରେସିଡେନସିଆଲ ୩ୟ ସ୍ଥାନରେ ସୀମିତ ରହିଥିଲା। ଛତିଶଗଡର ବିଳାସପୁର ସ୍ଥିତ ଲଏଲା ସ୍କୁଲ ୧୭ ବର୍ଷରୁ କମ୍ ବର୍ଷ ବାଳକ ବର୍ଗରେ ଚାମ୍ପିୟନ୍ ହୋଇଥିବାବେଳେ ବରଗଡସ୍ଥିତ ସଂସ୍କାର ଇଣ୍ଟରନ୍ୟାଶନାଲ ରନର୍ସ ଅପ୍ ଏବଂ ବରଗଡର ବିକାଶ ରେସିଡେନସିଆଲ ୩ୟ ସ୍ଥାନ ଅଧିକୃତ କରିଥିଲା। ପୁନଶ୍ଚ, ୧୭ବର୍ଷରୁ କମ୍ ବର୍ଷ ବାଳିକା ବର୍ଗର ଫାଇନାଲ ବିଜେତା ହୋଇଛି ଟିଟ୍ଲାଗଡର ଦାଦାଜୀ ମନ୍ଦିର ଟ୍ରଷ୍ଟ। ଛତିଶଗଡ଼ର ରାୟପୁରସ୍ଥିତ ଶିଭମ୍ ବିଦ୍ୟାପୀଠ। ଏହି ଗ୍ରୁପର ରନର୍ସ ଅପ କପ୍ ହାତେଇ ନେଇଥିବାବେଳେ ଛତିଶଗଡର ବିଳାସପୁରର ଏସଇସି ରେଲୱେ ଏଚ୍ଆର ସ୍କୁଲ ନଂ.୨ ତୃତୀୟ ସ୍ଥାନରେ ସନ୍ତୁଷ୍ଟ ରହିଥିଲା। ଉଦ୍ଯାପନୀ ଉସତ୍ବରେ କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ର ମୁଖ୍ୟ ଅତିଥି, ଟାଟାଷ୍ଟିଲ, କଳିଙ୍ଗନଗରର ଜିଏମ ଆର.ଆର. ଶତପଥି, ଯାଜପୁର ରୋଡ ଆଦର୍ଶ ଥାନା ଅଧିକାରୀ ଅନୀଲ କୁମାର ମହାନ୍ତି, ମନୋରମା ପବ୍ଲିକେଶନର ଡାଇରେକ୍ଟର ଦେବୀପ୍ରସନ୍ନ ମହାନ୍ତି, ଆଡଭୋକେଟ ଚନ୍ଦ୍ରଶେଖର ପଣ୍ଡା ଓ ବିବେକାନନ୍ଦ ମହାନ୍ତି, ଭିପିଏସ ସଭାପତି ଭାରତ ଭୂଷଣ ଦେଓ, ସମ୍ପାଦିକା ଦେବସ୍ମିତା ସାହୁ, ଟ୍ରଷ୍ଟି ଉଷାମଞ୍ଜରୀ ସାହୁ ପ୍ରମୁଖ ଅତିଥିଭାବେ ଯୋଗଦେଇ ପୁରସ୍କାର ବିତରଣ କରିଥିଲେ। ବିଦ୍ୟାଳୟର ଉପାଧ୍ୟକ୍ଷ ନାରାୟଣ ଚନ୍ଦ୍ର ରାଉଳ ଧନ୍ୟବାଦ ଦେଇଥିଲେ।
