ଭୁବନେଶ୍ୱର,୧୫ା୬(ବ୍ୟୁରୋ): ସାତକୋଶିଆରେ ଥିବା ବାଘୁଣୀ ‘ସୁନ୍ଦରୀ’ ମାସକ ଭିତରେ ମଧ୍ୟପ୍ରଦେଶ ଫେରିଯିବ। ଏଥିପାଇଁ ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ(ଏନ୍ଟିସିଏ) ରାଜ୍ୟ ସରକାରଙ୍କୁ ତୃତୀୟ ଚିଠି ଲେଖିଛନ୍ତି। ଗତ ଡିସେମ୍ବରରେ ବାଘୁଣୀକୁ ଫେରାଇ ଦେବାକୁ ଏନ୍ଟିସିଏ ଓଡ଼ିଶା ସରକାରଙ୍କୁ ପ୍ରଥମେ ଚିଠି ଦେଇଥିଲେ। ପରେ ରାଜ୍ୟ ସରକାର ମଧ୍ୟପ୍ରଦେଶ ସରକାରଙ୍କୁ ଚିଠି ଲେଖି ସାତକୋଶିଆରୁ ବାଘୁଣୀକୁ ନେଇଯିବା ପାଇଁ କହିଥିଲେ। ଏବେ ବାନ୍ଧବଗଡ଼କୁ ଫେରିଯିବ ସୁନ୍ଦରୀ। ଫଳରେ ‘ସୁନ୍ଦରୀ’କୁ ଆଣି ସାତକୋଶିଆରେ ବ୍ୟାଘ୍ର ପ୍ରକଳ୍ପର ଯେଉଁ ସ୍ବପ୍ନ ଥିଲା ତାହା ବିଫଳ ହୋଇଯାଇଛି। ଏଥିପାଇଁ ସାତକୋଶିଆ କର୍ତ୍ତୃପକ୍ଷଙ୍କ ଅପାରଗତାକୁ ଦାୟୀ କରାଯାଉଥିବାବେଳେ ଏଥିପାଇଁ ପ୍ରାୟ ୧୦କୋଟି ଟଙ୍କା ପାଣିରେ ପଡ଼ିଥିବା ବନ୍ୟପ୍ରାଣୀ ବିଶେଷଜ୍ଞ କହିଛନ୍ତି। ସେପଟେ ବାନ୍ଧବଗଡ଼କୁ ଫେରିଲେ ମଧ୍ୟ ସେ ଆଉ ଜଙ୍ଗଲରେ ରହିପାରିବ ନାହିଁ ବୋଲି ବନ୍ୟପ୍ରାଣୀ ବିଶେଷଜ୍ଞମାନେ ଆଶଙ୍କା ପ୍ରକାଶ କରୁଛନ୍ତି। ସେମାନଙ୍କ କହିବାନୁଯାୟୀ, ଗତ ଦେଢ଼ବର୍ଷ ହେବ ସୁନ୍ଦରୀ ଏନ୍କ୍ଲୋଜରରେ ରହିବା ଫଳରେ ତା’ର ଜଙ୍ଗଲୀ ପ୍ରକୃତି ହରାଇ ପୋଷା ଭଳି ହୋଇଗଲାଣି। ଶିକାର କରିବା ଖାଇବା ଭୁଲି ଯାଇଥିବ। ଜଙ୍ଗଲରେ ଛାଡ଼ି ଦେଲେ ସେ ଖୁବ୍ଶୀଘ୍ର ମରିଯାଇପାରେ। ତେଣୁ ସେ ବାନ୍ଧବଗଡ଼ ଗଲେ ମଧ୍ୟ ତାକୁ ସେହିଭଳି ଏନ୍କ୍ଲୋଜରରେ ରଖାଯାଇ ଅନୁଧ୍ୟାନ କରିବା ଉଚିତ୍।
ସୂଚନାଯୋଗ୍ୟ, ରାଜ୍ୟରେ ବ୍ୟାଘ ସଂଖ୍ୟା ବୃଦ୍ଧି କରିବା ପାଇଁ ଆନ୍ତଃରାଜ୍ୟ ବ୍ୟାଘ୍ର ସ୍ଥାନାନ୍ତର ପ୍ରକଳ୍ପ ଆରମ୍ଭ କରିବାକୁ ଯୋଜନା ହୋଇଥିଲା। ସାତକୋଶିଆରେ ବାଘ ଛାଡ଼ିବା ପାଇଁ ୨୦୧୭ ସେପ୍ଟେମ୍ବର ୧ରେ ଏନ୍ଟିସିଏ ବୈଠକରେ ନିଷ୍ପତ୍ତି ହୋଇଥିଲା। ଏଥିପାଇଁ ପର୍ଯ୍ୟାୟକ୍ରମେ ୬ଟି ବାଘ ଅଣାଯିବ ବୋଲି ଯୋଜନା ହୋଇଥିଲା। ୨୦୧୮ ଜୁଲାଇ ୬ରେ ପ୍ରଥମେ ମଧ୍ୟପ୍ରଦେଶର କାହ୍ନା ଟାଇଗର ରିଜର୍ଭରୁ ୩ବର୍ଷର ‘ମହାବୀର’ ନାମକ ମହାବଳ ବାଘକୁ ଅଣାଯାଇ ସାତକୋଶିଆରେ ଛଡ଼ା ଯାଇଥିଲା। ସେହିବର୍ଷ ଅଗଷ୍ଟ ୧୭ରେ ମଧ୍ୟପ୍ରଦେଶର ବାନ୍ଦବଗଡ଼ରୁ ବାଘୁଣୀ ‘ସୁନ୍ଦରୀ’କୁ ସାତକୋଶିଆ ଅଣାଯାଇଥିଲା। ସୁନ୍ଦରୀ ମଣିଷ ମାରିବା ଅଭିଯୋଗ ଆସିବା ପରେ ତାକୁ ୨୦୧୮ ନଭେମ୍ବର ୬ରେ ଜଙ୍ଗଲରୁ ଏନ୍କ୍ଲୋଜରରେ ରଖାଗଲା। ସେପଟେ ସୁନ୍ଦରୀର ଚର୍ଚ୍ଚା ଥମି ନ ଥିବା ବେଳେ ‘ମହାବୀର’ର ମୃତ୍ୟୁ ହୋଇଗଲା। ସୁନ୍ଦରୀକୁ ଧରାଯିବାର ୮ଦିନ ପରେ ଅର୍ଥାତ୍ ନଭେମ୍ବର ୧୪ରେ ସାତକୋଶିଆର କୋର୍ ଏରିଆରରେ ‘ମହାବୀର’ର ମୃତ ଶରୀର ଠାବ କରାଯାଇଥିଲା। ପ୍ରଥମେ ମହାବୀର ଝିଙ୍କ ଦ୍ୱାରା ମରିଥିବା ବନ ବିଭାଗ କହିଥିଲା। କିନ୍ତୁ ପରବର୍ତ୍ତୀ ସମୟରେ ମହାବୀରକୁ ଶିକାର କରାଯାଇଥିବା ଜଣାପଡ଼ିଥିଲା। ଏହାପରେ ବନବିଭାଗର କାର୍ଯ୍ୟକଳାପ ଉପରେ ଅନେକ ପ୍ରଶ୍ନ ଉଠିଥିଲା। ଦୁଇ ଦୁଇଟି ବାଘକୁ ସୁରକ୍ଷା ଦେଇ ନ ପାରିବାରୁ ଏତେବଡ଼ ପ୍ରକଳ୍ପ ଅନ୍ଧାର ଘେରକୁ ଚାଲିଗଲା ବୋଲି ବନ୍ୟପ୍ରାଣୀ ବିଶେଷଜ୍ଞମାନେ ମତପ୍ରକାଶ କରୁଛନ୍ତି।
