ଭବାନୀପାଟଣା,୧୫ା୭ (ଡି.ଏନ୍.ଏ.): ଆଧୁନିକତାର ଛାପ୍ରେ ଆମର ସଂସ୍କୃତି, ପରମ୍ପରାରେ ଅନେକ ପରିବରତନ ଦେଖ୍ବାକେ ମିଲୁଛେ। ଆଘ ଲୋକ୍ କୃଷି କାଯ୍ରେ ନଂଗଲ, ଶଗଡ଼ ଗାଡ଼ିର ବଡ଼ଭାରି ବେଭାର କରୁଥିଲେ। ହେଲେ ଆଧୁନିକ୍ ଯନ୍ତ୍ରପାତି ଆଏଲାଦିନୁ କୃଷି କାଯ୍ରେ ଖେତ୍ ଜୁତା, କାଦୋକରା, ଖତ୍ ବୁହା, ଧାନ୍ ଦୁହାରିବାରର ଲାଗି ଟ୍ରାକ୍ଟରର ବେଭାର ହେଉଛେ। ଆଘୋ ଚାଷୀ ଇ ସବୁ କାମ୍କାଯ୍ ଲାଗି ଶଗଡ଼ ଗାଡ଼ିର ବେଭାର କରୁଥିଲେ। ସେନ୍ତା ଲୋକ୍ କେହେନ୍ସି ସାମାନ ନେବାର ଆନ୍ବାର, ଝାର ଜଂଗ୍ଲୁ କାଠ୍ଖୁଁଠ୍, ବାଉଁଶ ଦୁହାରିବାର ଲାଗି ହଲଗାଡ଼ି(ଶଗଡ଼)ର ବେଭାର କରୁଥିଲେ। ଆଘ ଗାଡ଼ିମଟର, ରାସ୍ତାଘାଟ ଅଭାବୁ ଲୋକ୍ ଦୁରିଆ ଗାଁଗଁଡ଼ା ଗଲେ ହଲଗାଡ଼ିଥି ଘୂରନି ଖଁଜି ବସବାର ଜାଗାଥି ପୁଆଲ ପାରି ଉପରେ ମସନା, କଁଥା ପକେଇ ବସିକରି ଯାଉଥିଲେ। ସେନ୍ତା ବିହାବରପନରେ ବି ଶଗଡ଼ ଗାଡ଼ି ଲୁକ୍କର ଗୁଟେନ ଯିବାର ଆଏବାର ଜରିଆ ଥିଲା। ବିହା ଉତାରୁ ଭୁଆସେନ୍କେ ଶାଶ୍ ଘରକେ ବଟାବାର ଲାଗି ଘୂରନି ଖଁଜା ଶଗଡ଼ ଗାଡ଼ିକେ ସଜା ଯାଉଥିଲା। ଶଗଡ଼ଥି ଫଁଦା ଯାଉଥିବାର ବଲଦ୍ମାନକୁ ବି ବେଁକେ ଘଁଟି ଲଗା ଘାଗରା, ସିଂଘେ ଲାଲ୍ ଫିତା ବଁାଧି ସଜଉଥିଲେ। ଯେତେବେଲେ ଇ ହଲଗାଡ଼ି ଗଁାଖୁଲି କି କେନ୍ ରାସ୍ତା ଦେଇ ଯାଉଥିଲା ଲୋକ୍ କାବାଛାଡ଼ନୁ ଦେଖୁଥିଲେ। ବଲଦ୍କର ଦମ୍ଦମ୍ ଚାଲିକେ ଘଁଟି ଆର ଶଗଡ଼ ଗାଡ଼ିର କେଁକଟର ଶବଦ୍ ଚାଲ୍ତି ଲୁକ୍କର ମନ୍ ଘିନି ନେଉଥିଲା। ହେଲେ ଆଏଜକାଲି ଜଲସେଚିତ ଅଂଲରେ ଶଗଡ଼ ଗାଡ଼ିର ଭେଲି ବୁଡ଼ିଗଲାବେଲେ କଁା ଭଁା ଗାଁଗଁଡ଼ାରେ ହାତ୍ଗନ୍ତି ଶଗଡ଼ ଦେଖ୍ବାକେ ମିଲୁଛେ। ସେନ୍ତା କଳାହାଣ୍ଡି ଜିଲା ପାହାଡ଼ ଜଂଗଲ ଘେରା ଗୁଟେ ଆଦିବାସୀ ବହୁଲ ଜିଲା ହେଇଥିଲାବେଲେ ଇଠାନେ ଆଗରୁ ରାସ୍ତାଘାଟର ବଡ଼ଭାରି ଅସ୍ବିଧା ରହିଥିଲା। ଯେନ୍ଥିରଲାଗି ଜିଲାର ସବୁ ଗାଁଗଁଡ଼ାଥି ମାଲ ମାଲ ଶଗଡ଼ ଦେଖ୍ବାକେ ମିଲୁଥିଲା। ହେଲେ ଗାଡ଼ିମଟର, ଯନ୍ତ୍ରପାତିର ବେଭାର ଲାଗି ସମାଜରୁ ଶଗଡ଼ ଉଭି ଯିବାକେ ବସଲାନ। ସେନ୍ତା କଡ଼ାକଡ଼ି ଜଂଗଲ ଆଇନ୍ ଲାଗି ଗଛ୍ଖୁଁଟ ଅଭାବୁ ଚାଷୀ ଆର ଶଗଡ଼ ଗାଡ଼ି ବି ନାଇଁ ତିଆରିବାର। ହୁଏତ ବଛର କେତେଟା ଭିତରେ ଆମର ସମାଜରୁ ଶଗଡ଼ ଗାଡ଼ି ଉଭିଯିବା ଆର ଆମର ଆଗଲାପିଢ଼ି ଶଗଡ଼ ବାବ୍ଦେ ବହିଥି ଫଟୋ ଦେଖି ପାଠ୍ ପଢ଼ବେ। ଇ ବାବ୍ଦେ ଭବାନୀପାଟଣା ବ୍ଲକ ରିଷିଗଁାର ଚାଷୀ ଶାନ୍ତନୁ କୁମାର ବେହେରାକୁଁ ପଚରାଲାରୁ ଶଗଡ଼ ଗାଡ଼ି ଏହେଦେ ଇତିହାସ ହେଇଗଲାନ। ଅତୀତରେ ଆମର ଜୀବନ୍ ଜୀବ୍କା ସଂଗେ ଯୁଡ଼ି ହେଇ ରହିଥିଲା। ଇ ଯନ୍ତ୍ରପାତି ଯୁଗରେ ଶଗଡ଼ଟା ଲୁକ୍କର ଲାଗି ଅଦରକାରୀ ପାଲଟିଯାଇଛେ। ଆଘ ଗାଁଗଁଡ଼ା ଯିବାରନୁ ମୂଲ କରି ଝି’ବଟାବାର ତକ୍ ସବୁଥି ଶଗଡ଼ ଗାଡ଼ି ଖୁଜାପଡ଼ୁଥିଲା। ସେନ୍ତା ଭବାନୀପାଟଣା ବ୍ଲକ ବାନ୍ଦୋପଲା ଗାଁର ଆରଝନେ ଚାଷୀ ବଟକୃଷ୍ଣ ଠାକୁରକୁଁ ପଚରାଲାରୁ ଆଘ ଚାଷ୍ବାସ ଆରମ୍ରୁ ଶେଷ୍ ତକ୍ ଶଗଡ଼ ଆର ବଲଦ୍ମାନକର ବେଭାର ହେଉଥିଲା। ହେଲେ ଟ୍ରାକ୍ଟର ଆର ଭିନେ ଭିନେ କୃଷି ଯନ୍ତ୍ରପାତି ଆଏଲା ଦିନୁ ହଲଗାଡ଼ି, ବଲଦ୍ର ଦରକାର ନାଇଁପଡ଼ବାର। ଚାଷୀ ଟ୍ରାକ୍ଟରରେ କମ୍ ସମିଆରେ ଅଧ୍କା କାମ୍ କରିପାରୁଛେ। ସେଥିରଲାଗି ଶଗଡ଼ ଗାଡ଼ି ଅଦରକାରୀ ହେବାର ସଂଗେ ସମାଜରୁ ବି ଉଭି ଯିବାକେ ବସଲାନ ବଲି ସେ କହିଥିଲେ।