ରାୟପୁର: ଉପାନ୍ତ ଅଞ୍ଚଳରେ ସରକାରୀ ସୁବିଧା ସୁଯୋଗ ଲୋକମାନେ ପାଇବା କାଠିକର ପାଠ। ବର୍ଷ ବର୍ଷ ବିତିଯାଉଥିଲେ ବି ଭଲ ସଡ଼କ କିମ୍ବା ପିଇବା ପାଣି ସେମାନଙ୍କ ଲାଗି ସାତ ସପନ ପାଲଟିଥାଏ। ମାଓବାଦୀ ଅଧ୍ୟୁଷିତ ଛତିଶଗଡ଼ର ଦାନ୍ତଓ୍ବୋଡ଼ାରେ ଲୋକମାନେ ବାହାରକୁ ବାହାରିବା କଷ୍ଟକର ହୋଇପଡ଼ିଥିବା ବେଳେ ସେଠାକାର ଆଦିବାସୀଙ୍କ ଲାଗି ହାତପାହାନ୍ତାରେ ବ୍ୟାଙ୍କସେବା ଏବେ ଉପଲବ୍ଧ। ଦାନ୍ତଓ୍ବୋଡ଼ା ଜିଲା ପ୍ରଶାସନ ପକ୍ଷରୁ ଏବେ ‘ବ୍ୟାଙ୍କ ସଙ୍ଗ୍ଓ୍ବାରି ତୁମ୍ଚୋ ଦ୍ୱାର’ ନାମକ ଏକ ଯୋଜନା ପ୍ରଣୟନ କରାଯାଇଛି। ବସ୍ତର ସଂସଦୀୟ ଆସନ ଅନ୍ତର୍ଗତ ଏହି ଅଞ୍ଚଳରେ ଆଦିବାସୀମାନେ ହାତପାହାନ୍ତାରେ ବ୍ୟାଙ୍କସେବା ପାଇବାକୁ ସମର୍ଥ ହୋଇଛନ୍ତି। ବର୍ତ୍ତମାନ ସୁଦ୍ଧା ୨୨ ଗ୍ରାମର ୧୮,୯୦୦ ଲୋକଙ୍କ ମଧ୍ୟରୁ ୨,୫୪୧ ବୃଦ୍ଧ ଓ ବିଧବାଙ୍କୁ ଏହି ଯୋଜନା ମାଧ୍ୟମରେ ଟଙ୍କା ଯୋଗାଇ ଦିଆଯାଇସାରିଛି। ରାଜ୍ୟ ସାମାଜିକ କଲ୍ୟାଣ ବିଭାଗ ପକ୍ଷରୁ ଆଦିବାସୀଙ୍କ ସୁବିଧା ଲାଗି ଏଭଳି ପଦକ୍ଷେପ ଗ୍ରହଣ କରାଯାଇଛି। ମହାମାରୀ କରୋନାର ତାଣ୍ଡବ ଚାଲିଥିଲେ ବି ସେଠାରେ ଏହି ସେବାକୁ ବନ୍ଦ କରାଯାଇ ନାହିଁ। ଏମ୍ଜିଏନ୍ଆର୍ଇଜିଏରେ ସମ୍ପୃକ୍ତ ବ୍ୟକ୍ତିଙ୍କ ଲାଗି ଏଭଳି ସୁବିଧା ଯୋଗାଇଦେବାକୁ ପ୍ରଶାସନ ଚିନ୍ତା କରୁଛି।
ଆଦିବାସୀବହୁଳ ଦାନ୍ତଓ୍ବୋଡ଼ା ଅଞ୍ଚଳର ଲୋକମାନେ ଅନେକ ବାଟ ଚାଲି ଚାଲି ଯାଇ ଏହି ସୁବଧା ପାଉଥିଲେ। ଏମିତିକି ୧୦ କି.ମି. ପର୍ଯ୍ୟନ୍ତ ସେମାନଙ୍କୁ ଚାଲିଚାଲି ଯିବାକୁ ପଡ଼ୁଥିଲା। ବେେବେଳେ ସେମାନେ ମାଓବାଦୀଙ୍କ ଶିକାର ବି ପାଲଟୁଥିଲେ। ସେମାନଙ୍କ ସୁରକ୍ଷା ଓ ବଞ୍ଚିବାର ରାହା ଯୋଗାଇଦେବା ଲାଗି ଏଭଳି ପଦକ୍ଷେପ ଗ୍ରହଣ କରାଯାଇଥିବା କହିଛନ୍ତି ଜିଲାପାଳ ଦୀପକ ସୋନି। ବିକଶିତ କାରିଗରି ବିଦ୍ୟା ଏଭଳି ସୁବିଧା ଆଦିବାସୀଙ୍କୁ ଯୋଗାଇଦେବାରେ ସଫଳ ହୋଇଥିବା ସେ ପ୍ରକାଶ କରିଛନ୍ତି। କେତେଜଣ ସ୍ବେଚ୍ଛାସେବୀ ଏକ୍ଷେତ୍ରରେ ସହଯୋଗର ହାତ ବଢ଼ାଇଥିବା ସେ କହିଛନ୍ତି। ଏମିତିକି କେତେକ ସ୍ଥାନରେ ମାନୁଆଲ ପେମେଣ୍ଟ ପ୍ରଦାନ କରାଯାଇଛି। ଲକ୍ଡାଉନ୍ ବେଳେ ଏହି ବ୍ୟାଙ୍କସେବା ସେମାନଙ୍କ ଲାଗି ବରଦାନ ପାଲଟିଛି। ଏହା ଗରିବ ଆଦିବାସୀଙ୍କ ମୁହଁରେ ହସ ଫୁଟାଇବାରେ ସହାୟକ ହୋଇପାରିଥିବା ସୋନି କହିଛନ୍ତି।
