ଜଳେଶ୍ୱର, ୪।୧(ସ୍ବ.ପ୍ର.)-ଜଳେଶ୍ୱର ବ୍ଲକର ବିଛିନ୍ନାଞ୍ଚଳ ଭାବେ ପରିଚିତ ରାଇବଣିଆ ଥାନା କାଳିକଠାରେ ଆଦର୍ଶ ବିଦ୍ୟାଳୟ ନିର୍ମାଣ ଲାଗି ଜମି ହସ୍ତାନ୍ତର ପ୍ରକ୍ରିୟା ଶେଷ ହୋଇଛି । ଆସନ୍ତା ଶିକ୍ଷାବର୍ଷରୁ ଶିକ୍ଷାଦାନ ହେବା ଲାଗି ଅଭିଭାବକମାନେ ଆଶା ପୋଷଣ କରିଛନ୍ତି।
୨୦୧୪ ସାଧାରଣ ନିର୍ବାଚନ ପରେ ରାଇବଣିଆର କାଳିକଠାରେ ଏକ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା ଲାଗି ତତ୍କାଳୀନ ଏମ୍ପି ଇଂ. ରବୀନ୍ଦ୍ର କୁମାର ଜେନା ଓ ବିଧାୟକ ଅଶ୍ୱିନୀ କୁମାର ପାତ୍ର ଘୋଷଣା କରିଥିଲେ। ପରବର୍ତ୍ତୀ ସମୟରେ ଜେନା କାଳିକ ପଞ୍ଚାୟତକୁ ପୋଷ୍ୟଗ୍ରାମ ଭାବେ ଗ୍ରହଣ କରି ଏହାର ରାସ୍ତାଘାଟ, ସ୍ବାସ୍ଥ୍ୟ, ପରିଷ୍କାର ପରିଛନ୍ନତା, ପିଇବାପାଣି ବ୍ୟବସ୍ଥା, ବିଦ୍ୟୁତ୍ ଯୋଗାଣର ବ୍ୟବସ୍ଥା କରିବା ସହ ଏକ ଟିମ୍କୁ ସେଠାରେ କାଯର୍ୟରେ ଲଗାଇଥିଲେ। କିନ୍ତୁ ଏଥିଲାଗି ଆବଶ୍ୟକ ଅନୁମୋଦନ ନ ମିଳିବାରୁ ମୁଖ୍ୟମନ୍ତ୍ରୀ ଘୋଷଣା କରିଥିବା ଆଦର୍ଶ ବିଦ୍ୟାଳୟ ସେଠାରେ ପ୍ରତିଷ୍ଠା କରିବା ଲାଗି ଇଂ. ଜେନା ଓ ପାତ୍ର ଉଦ୍ୟମ କରିଥିଲେ । କିନ୍ତୁ ସରକାରୀ ଫାଇଲ୍ ମନ୍ଥର ଗତିରେ ଚାଲୁଥିବାରୁ ଗତ ୧୬ା୧୨ା୧୯ରେ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଅନୁମୋଦନ କରିଛନ୍ତି । ଏହାପୂର୍ବରୁ ଏକ କମିଟି ଗଠନ ହୋଇ କାଳିକ ଗ୍ରାମର ଖାତା ନଂ ୯୮୨, ପ୍ଲଟ ୮୨୮, ୮୨୯, ୮୩୦ ଓ ୯୧୫ର ମୋଟ ୪ଏକର ୮୦ ଡିସିମିଲ ସ୍ଥାନ ଆଦର୍ଶ ବିଦ୍ୟାଳୟ ଲାଗି ସ୍ଥାନ ନିରୂପଣ କରିଥିଲେ। ଶୁକ୍ରବାର ଏହି କାର୍ଯ୍ୟ ସମାପନ ଲାଗି ଜଳେଶ୍ୱର ତହସିଲଦାର କ୍ଷୀରୋଦ କୁମାର ପଣ୍ଡା, ବିଇଓ ବିଜୟ କୁମାର ନାଥ, ଗ୍ରାମ୍ୟ ଉନ୍ନୟନ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ଇଂ ଲମ୍ବୋଦର କର, ଓଲମରା ଆର୍ଆଇ ଓ ଅମିନ ପ୍ରମୁଖ ଯାଇଥିଲେ। ପୂର୍ବତନ ସରପଞ୍ଚ ଗଙ୍ଗାଧର ଦାସ ଉପସ୍ଥିତ ରହି କାର୍ଯ୍ୟକ୍ରମ ସମ୍ପର୍କରେ ଗ୍ରାମବାସୀଙ୍କୁ ବୁଝାଇଥିଲେ ା ମୋଟ ୩କୋଟି ୨୫ଲକ୍ଷ ୫୨ ହଜାର ୬୬୬ ଟଙ୍କା ଗ୍ରାମ୍ୟ ଉନ୍ନୟନ ବିଭାଗକୁ ଅର୍ଥ ମଞ୍ଜୁର ହୋଇଥିବା ଜଣାଯାଇଛି ା
