ଆରଡି, ୧୮ା୫ (ଡି.ଏନ.ଏ.)-ଲକଡାଉନ ଯୋଗୁ ଭଦ୍ରକ ଜିଲାର ବାବା ଆଖଣ୍ଡଳମଣିଙ୍କ ମନ୍ଦିର ଶ୍ରଦ୍ଧାଳୁଙ୍କ ପାଇଁ ପ୍ରାୟ ୨ ମାସ ହେଲା ବନ୍ଦ ରହିଛି। ଚଳିତ ମାସ ୨୭ ତାରିଖରେ ଶିବ ବିବାହ ଅନୁଷ୍ଠିତ ହେବ। ଏହି ଉପଲକ୍ଷେ ସୋମବାର ମନ୍ଦିର କାର୍ଯ୍ୟାଳୟ ପରିସରରେ ଅନୌପଚାରିକ ଭାବେ ଶୁଭଲଗ୍ନ ସମ୍ପନ୍ନ ହୋଇଛି। ଅପରାହ୍ନରେ ମାତା ପାର୍ବତୀଙ୍କ ପିତା ସାଜିଥିବା ଚନ୍ଦ୍ରମଣି ପାଢୀଙ୍କ ଉପସ୍ଥିତିରେ ଲଗ୍ନ ଚିଟାଉ ଲେଖାଯାଇଥିଲା। ଏହି ଲଗ୍ନକୁ ଏକ ଚାନ୍ଦି ନିର୍ମିତ ରେକାବୀରେ ରଖି ମଙ୍ଗଳପ୍ରତୀକ ଲାଲ କପଡା ଦ୍ୱାରା ଆବଦ୍ଧ କରାଯାଇଥିଲା। ପରେ ଅନ୍ୟ ଲଗ୍ନ ସାମଗ୍ରୀ ଯଥା ରତ୍ନହାର, ରତ୍ନମୁଦ୍ରିକା, ପାଟ ଯୋଡ ଆଦିକୁ ନେଇ ବାରିକ, ପୁରୋହିତ, ଜ୍ୟୋତିଷ ବାବା ଆଖଣ୍ଡଳମଣିଙ୍କ ପିତା ସାଜିଥିବା ତପନ କୁମାର ପାଢୀଙ୍କ ବାସଗୃହକୁ ଗମନ କରିଥିଲେ। ସେଠାରେ ବିଧିପୂର୍ବକ ଲଗ୍ନ ପାଠ କରାଯାଇଥିଲା। ସାମାଜିକ ଦୂରତ୍ୱ ବଜାୟ ରଖି ଲଗ୍ନ ମହୋତ୍ସବ ସଙ୍ଗଠିତ ହୋଇଥିବା ଜଣାପଡିଛି। ସେବାୟତ ଅଧ୍ୟାପକ ବିଜୟ ଦାଶ, ଭୀମସେନ ପଣ୍ଡା, ଆଶିଷ ପାଢୀ, ବାବାଜୀ ଶଙ୍କର ପାଢୀ, ମନ୍ଦିର ସହ ପରିଚାଳକ ସୁଧାକର ବିଶ୍ୱାଳ ଲଗ୍ନ ଲେଖା ବେଳେ ଉପସ୍ଥିତ ଥିଲେ।
