ଛତ୍ରପୁର,୨୧ା୯(ଡି.ଏନ.ଏ)- ଚମାଖଣ୍ଡି ଥାନା ଅଧୀନ ବନ୍ଦର ଗାଁକୁ ଯିବା ରାସ୍ତାରେ ଗତ ୧୭ ତାରିଖ ସ୍ପଷ୍ଟ ଦିବାଲୋକରେ ଏଲ୍. ଯୋଗେଶଙ୍କୁ ସଂଘବନ୍ଧ ଆକ୍ରମଣ କରାଯାଇଥିଲା। ତାଙ୍କଠାରୁ ୩୮ ହଜାର ଟଙ୍କା ଓ ବାଇକ୍ ଲୁଟ୍ ହୋଇଥିଲା। ଏହି ଘଟଣାରେ ଅଭିଯୁକ୍ତମାନଙ୍କ ମଧ୍ୟରୁ ୩ ଜଣଙ୍କୁ ଚମାଖଣ୍ଡି ପୋଲିସ ଗିରଫ କରିଛି। ସେମାନେ ହେଲେ କୂଅପଲ୍ଲୀର ସନ୍ତୋଷ ପ୍ରଧାନ, ନାରାୟଣପୁରର ଗିରିଧାରୀ ପ୍ରଧାନ ଓ ଦିବାକର ପ୍ରଧାନ। ଏମାନଙ୍କୁ ଶନିବାର କୋର୍ଟ ଚାଲାଣ କରାଯାଇଥିବା ଥାନା ଆଇଆଇସି ସହଦେବ ମହାପାତ୍ର ସୂଚନା ଦେଇଛନ୍ତି। ଏଥିସହ ଲୁଟ୍ ହୋଇଥିବା ବାଇକ୍ ଉଦ୍ଧାର ହୋଇଛି। ଘଟଣାରେ ସମ୍ପୃକ୍ତ ଅନ୍ୟ ୫ ଜଣଙ୍କୁ ଧରିବା ପାଇଁ ପୋଲିସ ଉଦ୍ୟମ ଚଳାଇଛି।
୧୭ ତାରିଖ ଅପରାହ୍ନରେ ବନ୍ଦର ଗାଁର ଯୋଗେଶ ବାଇକ ଯୋଗେ ଚମାଖଣ୍ଡିରୁ ଫେରୁଥିବା ବେଳେ ରାସ୍ତାରେ ତାଙ୍କୁ ୮ ଜଣ ଅଟକାଇ ୮ ହଜାର ଟଙ୍କା ଛଡାଇ ନେଇଥିଲେ। ସେମାନେ ଯୋଗେଶଙ୍କ ଏଟିଏମ୍ କାର୍ଡ ନେଇଯାଇ ପିନ୍ ନମ୍ବର ମାଗିଥିଲେ। ଯୋଗେଶ ସେ ସମୟରେ ଭୁଲ୍ ନମ୍ବର କହିଥିଲେ। ୨ ଅଭିଯୁକ୍ତ ଯୋଗେଶଙ୍କ ବାଇକ୍ ଓ ଏଟିଏମ କାର୍ଡ ନେଇ ଟଙ୍କା ଉଠାଇବାକୁ ଯାଇଥିଲେ। ଅନ୍ୟମାନେ ନିକଟସ୍ଥ ଏକ ଜଙ୍ଗଲରେ ଯୋଗେଶଙ୍କୁ କାବୁ କରି ରଖିଥିଲେ। ପିନ୍ ନମ୍ବର ଭୁଲ ଯୋଗୁ ୨ ଅଭିଯୁକ୍ତ ଏଟିଏମରୁ ଟଙ୍କା ଉଠାଇ ପାରୁ ନ ଥିବା ତାଙ୍କ ସହଯୋଗୀଙ୍କୁ ଫୋନରେ କହିଥିଲେ। ପରେ ମାଡ ମାରି ଯୋଗେଶଙ୍କଠାରୁ ଠିକ୍ ପିନ୍ ନେଇ ଅଭିଯୁକ୍ତମାନେ ତାଙ୍କ ଆକାଉଣ୍ଟରୁ ୩୦ ହଜାର ଟଙ୍କା ଉଠାଇ ନେଇଥିଲେ। ପରେ ଯୋଗେଶଙ୍କୁ ସେମାନେ ଛାଡି ଚାଲି ଯାଇଥିଲେ। ଏ ନେଇ ଚମାଖଣ୍ଡି ଥାନାରେ ଯୋଗେଶଙ୍କ ଏତଲା ପ୍ରକାରେ ପୋଲିସ ଏକ ମାମଲା (ନଂ.୧୧୧/୧୯) ରୁଜୁ କରି ତଦନ୍ତ ଚଳାଇଥିଲା।
