ଠାକୁରମୁଣ୍ଡା, ୨୪।୪(ଡି.ଏନ୍.ଏ.): ମୟୂରଭଞ୍ଜ କରଞ୍ଜିଆ ବନଖଣ୍ଡ ସାତକୋଶିଆ ରେଞ୍ଜ ଅନ୍ତର୍ଗତ ବାଲିଘାଟ ସଂରକ୍ଷିତ ଜଙ୍ଗଲର କମ୍ପାର୍ମେଣ୍ଟ ନଂ ୧୨ ତଳବନ୍ଧ ନାଳ ନିକଟରେ ଗୁରବାର ରାତିରେ ସାତକୋଶିଆ ବନ କର୍ମଚାରୀ ୩ ଜଣ ଶିକାରୀଙ୍କୁ ଗିରଫ କରିଛନ୍ତି। ସେମାନଙ୍କ ନିକଟରୁ ୧ କେଜି ଓଜନର ମାଂସ ସହ ଶିକାରରେ ବ୍ୟବହୃତ କଟୁରି, କୁରାଢ଼ୀ ଗୋଟିଏ ଲେଖାଏ ସହ ଏକ ଠେଙ୍ଗାକୁ ବନ ବିଭାଗ ଜବତ କରିଛି। ଗିରଫ ଶିକାରିମାନେ ହେଲେ ସାତକୋଶିଆ ଗ୍ରାମପଞ୍ଚାୟତ ର ବାଲିଘାଟ ଗ୍ରାମର ଯଦୁ ଦେହୁରୀ(୨୨), ତପନ ନାୟକ(୨୩), ରତିରଞ୍ଜନ ନାୟକ(୨୯) ବୋଲି ଜଣାପଡିଛି। ଅନ୍ୟ ପକ୍ଷରେ କେତକ ଶିକାରୀ ଘଟଣାସ୍ଥଳରୁ ଖସି ପଳାଇ ଯାଇଥିବା ସୂଚନା ମିଳିଛି।
କୌଣସି ସୂତ୍ରରୁ ଖବର ପାଇ ସାତକୋଶିଆ ରେଞ୍ଜର ରେଞ୍ଜ ଅଧିକାରୀ ପିତାମ୍ବର ସେଠୀ, ଫୋରେଷ୍ଟର ପରମେଶ୍ୱର ମହାନ୍ତ, ନାଲିନିକାନ୍ତ ମହାନ୍ତ, ଫରେଷ୍ଟ ଗାର୍ଡ ରଶ୍ମୀରେଖା ନାୟକ, ସମୀର ମହାନ୍ତ, ସନତ ମହାନ୍ତ, ଗଦାଧର ମହାନ୍ତ, ମକ୍ରଧୁଜ ନାୟକ ପ୍ରମୁଖ ବନ କର୍ମଚାରୀମାନେ ଅଚାନକ ଚଢ଼ାଉ କରିଥିଲେ। ଶିକାରୀ ମାନେ ଶିକାର କରିଥିବା କୁଟରାର ମାଂସ ଭାଗ କରୁଥିବା ବେଳେ ହଠାତ୍ ବନକର୍ମଚାରିଙ୍କୁ ଦେଖି ଖସି ପଳାଇ ଯାଇଥିବା ବେଳେ ସେଥିମଧ୍ୟରୁ ୩ ଜଣ ଶିକାରୀ କୁ ବନ ବିଭାଗ ଧରିବାରେ ସଫଳ ହୋଇଥିଲା। ଶୁକ୍ରବାର ଗିରଫ ୩ ଶିକାରୀଙ୍କର ସ୍ବାସ୍ଥ୍ୟ ପରୀକ୍ଷା ପରେ ସାତକୋଶିଆ ରେଞ୍ଜ କେଶ ନଂ ୧୨ ଅନୁଯାୟୀ ସେମାନଙ୍କୁ କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି।
