କଟକ ଅଫିସ,୧।୭ : ଅସରାଏ ବର୍ଷାରେ କଟକ ସହର ବେହାଲ ହୋଇପଡିଛି। ଗତ ଶନିବାର ହୋଇଥିବା ବର୍ଷାରେ ସହରର ବିଭିନ୍ନ ସ୍ଥାନରେ ପାଣି ଜମି ରହିଥିଲା। ଫଳରେ ସହରବାସୀ ନାନା ଅସୁବିଧାର ସମ୍ମୁଖୀନ ହୋଇଥିଲେ। କଟକ ମହାନଗର ନିଗମ(ସିଏମ୍ସି) ପକ୍ଷରୁ ନଭେମ୍ବର ପୂର୍ବରୁ ଡ୍ରେନେଜ ସଫେଇ କାର୍ଯ୍ୟ ଆରମ୍ଭ ହୋଇଥିବା ନେଇ ବାରମ୍ବାର କୁହାଯାଉଛି। ହେଲେ ଏ ପର୍ଯ୍ୟନ୍ତ ଡ୍ରେନେଜ ସଫେଇ ଶେଷ ହୋଇନାହିଁ। ଫଳରେ ସାମାନ୍ୟ ବର୍ଷା ହେଲେ ଡ୍ରେନ୍ରେ ପାଣି ନିଷ୍କାସନ ହୋଇ ନ ପାରି ରାସ୍ତା ଉପରେ ଜମି ରହୁଛି। ରବିବାର ସିଏମ୍ସି କମିଶନର ଅନନ୍ୟା ଦାସ ସହରର ରକ୍ସିଲେନ୍, ଦୋଳମୁଣ୍ଡାଇ, ଖାନ୍ନଗର ସ୍ଲୁଇସ ଗେଟ୍, ସଙ୍ଗମ ସିନେମା ହଲ୍ ରୋଡ୍, ମହତାବ ରୋଡ ସମେତ ଅନ୍ୟାନ୍ୟ ଅଞ୍ଚଳ ପରିଦର୍ଶନ କରି ବର୍ଷାଜଳ ନିଷ୍କାସନ ହେବା ପାଇଁ କେଉଁ ଜାଗାରେ ସମସ୍ୟା ଉପୁଜୁଛି ତାହା ଦେଖିଥିଲେ। ସହରରେ ଡ୍ରେନେଜ ସମସ୍ୟା ଯୋଗୁ ବର୍ଷାଜଳ ନିଷ୍କାସନରେ ବାଧା ସୃଷ୍ଟି ହେଉଛି। ଏ ନେଇ ଅଭିଯୋଗ ହେବା ପରେ ସିଏମ୍ସି କମିଶନର ବିଭିନ୍ନ ଅଞ୍ଚଳ ବୁଲି ଦେଖିବା ସହ ଡ୍ରେନେଜର କେଉଁ ଜାଗାରେ ପାଣି ଜମି ରହୁଛି, ଆବର୍ଜନା କଢା ହୋଇଛି କି ନାହିଁ ତାହାର ତଦାରଖ କରିବା ସହ ଏହାର ସମାଧାନ ପାଇଁ କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ। ଡ୍ରେନେଜର ଯେଉଁ ସ୍ଥାନରେ ସ୍ଲାବ ଭାଙ୍ଗି ଯାଇଛି ସେଠାରେ ନୂତନ ସ୍ଲାବ ପକାଇବା ପାଇଁ ନିର୍ଦ୍ଦେଶ ଦେଇଥିଲେ। ଏ ନେଇ ଅନନ୍ୟା କହିଛନ୍ତି, ତୁରନ୍ତ ଡ୍ରେନେଜ ସମସ୍ୟାକୁ ଦୂର କରି ଲୋକଙ୍କୁ ଜଳ ସମସ୍ୟାରୁ ମୁକ୍ତ କରିବା ନିମନ୍ତେ ସିଏମ୍ସି ସମସ୍ତ ପ୍ରକାର ପ୍ରସ୍ତୁତି ଜାରି ରଖିଛି। ଆଗାମୀ ବର୍ଷାକୁ ଯେପରି ମୁକାବିଲା କରାଯାଇପାରିବ ସେ ନେଇ ସିଏମ୍ସି ପ୍ରସ୍ତୁତ ରହିଛି। ଡ୍ରେନେଜର ଯେଉଁ ଛୋଟ ମୋଟ ସମସ୍ୟା ଲାଗି ରହିଛି ତାହା ତୁରନ୍ତ ସମାଧାନ କରାଯିବ। ବର୍ଷାଦିନରେ ଯେପରି ଲୋକେ ପାଣି ସମସ୍ୟାରୁ ନିବୃତ୍ତ ରହିବେ ସେ ନେଇ ଚେଷ୍ଟା ଜାରି ରହିଛି। ରବିବାର ବିଭିନ୍ନ ଅଞ୍ଚଳ ପରିଦର୍ଶନବେଳେ କମିଶନରଙ୍କ ସମେତ ସିଏମ୍ସି ଡେପୁଟି କମିଶନର ଦେବାଶିଷ ମହାନ୍ତି, ଇଞ୍ଜିନିୟର ଡି.ଆର୍. ତ୍ରିପାଠୀ, ସ୍ବାସ୍ଥ୍ୟ ବିଭାଗ ଟିମ୍ ଏବଂ ଅନ୍ୟାନ୍ୟ କର୍ମଚାରୀ ଉପସ୍ଥିତ ଥିଲେ।
