ବ୍ରହ୍ମଗିରି,୨୨ା୮(ଡି.ଏନ.ଏ): ବ୍ରହ୍ମଗିରି ବ୍ଲକରେ ଶିକ୍ଷା ବ୍ୟବସ୍ଥା ଏକପ୍ରକାର ବିପର୍ଯ୍ୟସ୍ତ ହୋଇପଡିଛି। ଏହିି ବ୍ଲକ ଅନ୍ତର୍ଗତ କାଣ୍ଡୋଗଦା ପଞ୍ଚାୟତର ମୁଣ୍ଡାଳ ଗ୍ରାମସ୍ଥିତ ମୁଣ୍ଡାଳ ଜାଡିପୁର ପ୍ରାଥମିକ ବିଦ୍ୟାଳୟ ଓ ଯୁଗୋଜ୍ୟୋତି ୟୁପି ଏମଇ ବିଦ୍ୟାଳୟ ଦେଖିଲେ ଭିତ୍ତିଭୂମି ଓ ଏହାର ଶିକ୍ଷା ବ୍ୟବସ୍ଥାରୁ ସବୁ ଅନୁମେୟ ହୋଇଯିବ। ମୁଣ୍ଡାଳ ଜାଡିପୁର ପ୍ରାଥମିକ ବିଦ୍ୟାଳୟଟି ୧୯୫୮ରେ ସ୍ଥାପିତ ହୋଇଥିବାବେଳେ ଏଠାରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଶିକ୍ଷାଦାନ ବ୍ୟବସ୍ଥା ରହିଛି। ଏହି ୫ଟି ଶ୍ରେଣୀରେ ବର୍ତ୍ତମାନ ୭୭ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଏମାନଙ୍କ ପାଇଁ ୩ଜଣ ଶିକ୍ଷକ ନିଯୁକ୍ତି ହୋଇଛନ୍ତି। କିନ୍ତୁ ଏହି ବିଦ୍ୟାଳୟରେ ଥିବା ଏକ ପୁରୁଣା ଶ୍ରେଣୀଗୃହ ୫ବର୍ଷ ତଳୁ ବିପଦସଙ୍କୁଳ ଘୋଷଣା କରାଯାଇଥିଲା। ତାହା ଫନୀ ବାତ୍ୟାରେ ସମ୍ପୂର୍ଣ୍ଣ ମାଟିରେ ମିଶିଯିବା ପରେ ଏବେ ଗୋଟିଏ ଶ୍ରେଣୀଗୃହରେ ୫ଟି ଶ୍ରେଣୀର ଛାତ୍ରୀଛାତ୍ର ବସିପାଠ ପଢୁଛନ୍ତି। ଏ ନେଇ ଶିକ୍ଷକ ଶରତ ସେଠୀ କୁହନ୍ତି, ସରକାରଙ୍କ କୁଠାରୀ ନିୟମାନୁଯାୟୀ ଯେତିକି ଶ୍ରେଣୀକୁ ସେତିକି ଗୃହ ରହିବା ଆବଶ୍ୟକ, କିନ୍ତୁ ଆମ ବିଦ୍ୟାଳୟରେ ୫ଟି ଶ୍ରେଣୀ ଥିବାବେଳେ ଗୋଟିଏ ଶ୍ରେଣୀଗୃହ ଅଛି। ଅନ୍ୟ ଗୋଟିଏ ଗୃହ ଫନୀରେ ଭାଙ୍ଗିଯିବାପରେ ଆମେ ପ୍ରଶାସନ ନିକଟରେ ଆବଶ୍ୟକୀୟ ଶ୍ରେଣୀଗୃହ ପାଇଁ ଅଭିଯୋଗ କରିଛୁ। ସେହିଭଳି ଯୁଗୋଜ୍ୟୋତି ୟୁପି ଏମଇ ବିଦ୍ୟାଳୟରେ ୬ଷ୍ଠ ଓ ୭ମ ଶ୍ରେଣୀ ରହିଛି। ଏହାର ପରିବେଶ ବିପଦପୂର୍ଣ୍ଣ ଭାବେ ରହିଥିବାବେଳେ ଚାରିପଟେ ପାଣି ଜମିରହିଛି। ଫଳରେ ସରୀସୃପଙ୍କ ଭୟ ସର୍ବଦା ଲାଗିରହିଛି। ବିଦ୍ୟାଳୟଟି ରୋଡ ପାର୍ଶ୍ୱରେ ଥିବାରୁ ଏହାର ସୁରକ୍ଷା ପ୍ରାଚୀର ମଧ୍ୟ ନାହିଁ। ଏହାସହ ବିଦ୍ୟାଳୟ ନିକଟରେ ରହିଛି ଦୁଇଟି ପୋଖରୀ। ବିଦ୍ୟାଳୟରେ ପାନୀୟ ଜଳ ବ୍ୟବସ୍ଥା ନ ଥିବାରୁ ଛାତ୍ରୀଛାତ୍ରମାନେ ମଧ୍ୟାହ୍ନଭୋଜନ ସମୟରେ ପୋଖରୀ ଉପରେ ନିର୍ଭର କରନ୍ତି। ଫଳରେ ଛୋଟ ପିଲାମାନେ ପୋଖରୀକୁ ଯିବା ନିରାପଦ ନୁହେଁ ବୋଲି ଗ୍ରାମବାସୀ ଅଭିଯୋଗ କରନ୍ତି । ତୁରନ୍ତ ଏହାର ଭିତ୍ତିଭୂମି ସଜାଡ଼ିବାକୁ ଦାବି ହେଉଛି।
