ବ୍ରିସ୍ବେନ୍,୨୨।୫(ଏପି): ଅଷ୍ଟ୍ରେଲୀୟ ଟେନିସ କିମ୍ବଦନ୍ତୀ ଆଶଲେ କୁପର ୮୩ ବର୍ଷରେ ପରଲୋକ ଗମନ କରିଛନ୍ତି। ୪ଟି ଗ୍ରାଣ୍ଡସ୍ଲାମ ଟାଇଟଲ ଜିତିଥିବା କୁପର ଦୀର୍ଘଦିନ ଧରି ଅସୁସ୍ଥ ରହିବା ପରେ ମୃତ୍ୟୁବରଣ କରିଛନ୍ତି ବୋଲି ଟେନିସ୍ ଅଷ୍ଟ୍ରେଲିଆ ତରଫରୁ କୁହାଯାଇଛି। ପୂର୍ବତନ ୧ ନମ୍ବର ଖେଳାଳି କୁପର ୧୯୫୮ରେ ଅଷ୍ଟେଲିଆନ୍, ଓ୍ବିମ୍ବେଲଡନ ଓ ୟୁଏସ୍ ଓପନ ଟାଇଟଲ ହାସଲ କରିଥିଲେ। ୧୯୫୭ରେ କୁପରଙ୍କ ନେତୃତ୍ୱରେ ଅଷ୍ଟ୍ରେଲିଆଂ ଆମେରିକାକୁ ହରାଇ ଡେଭିସ୍ କପ୍ ଟାଇଟଲ ବଜାୟ ରଖିଥିଲା। ତେବେ ଏହା ପରବର୍ଷ ଆମେରିକାଠାରୁ ଅଷ୍ଟ୍ରେଲିଆ ପରାସ୍ତ ହେବା ପରେ ସେ ଆସନ୍ତୋଷ ଜାହିର କରିଥିଲେ। ଫଳରେ ସେ ପେସାଦାର ଚୁକ୍ତିରୁ ଓହରିଯାଇଥିଲେ। ୧୯୫୯ରେ ପିଠିରେ ଆଘାତ ପାଇଥିଲେ। ଏହି ବ୍ୟାକ୍ ଇଞ୍ଜୁରୀ ପାଇବା ପରେ ତାଙ୍କ ପେସାଦାର କ୍ୟାରିୟର ଶେଷ ହୋଇଥିଲା। ଏହାପରେ ବ୍ରିସ୍ବେନ ପ୍ରତ୍ୟାବର୍ତ୍ତନ କରି ତାଙ୍କ ବ୍ୟବସାୟକୁ ଆଗକୁ ବଢାଇଥିଲେ ଓ ଜଣେ କ୍ରୀଡ଼ା ପ୍ରଶାସକ ଭାବେ କାର୍ଯ୍ୟ କରିଥିଲେ। ସେ ଜଣେ ଉଚ୍ଚକୋଟୀର ଖେଳାଳି ବୋ ସହିତ ଜଣେ ଦକ୍ଷ କ୍ରୀଡ଼ା ପ୍ରଶାସକ ମଧ୍ୟ ଥିଲେ ଟେନିସ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ କ୍ରେଗ୍ ଟିଲେ କହିଛନ୍ତି।
ତାଙ୍କ ଦେହାନ୍ତରେ ଅଷ୍ଟ୍ରେଲିଆର ଅନ୍ୟତମ କିମ୍ବଦନ୍ତୀ ଟେନିସ ଖେଳାଳି ରୋଡ ଲିଭର ଶୋକ ବ୍ୟକ୍ତ କରିଛନ୍ତି। କୋର୍ଟ ଭିତରେ ଓ ବାହାରେ ସେ ଜଣେ ଜବରଦସ୍ତ ଚାମ୍ପିୟନ ଥିଲେ ବୋଲି ସେ କହିଛନ୍ତି। ଡାହାଣହାତୀ ସର୍ଭ ଓ ଭଲି ପ୍ଲେୟାର ଭାବେ କୁପର ତାଙ୍କ ସମୟରେ ସଫଳତାର ଶୀର୍ଷକୁ ଛୁଇଁ ଥିଲେ। ସେ ୪ଟି ସିଙ୍ଗଲ୍ସ ଗ୍ରାଣ୍ଡସ୍ଲାମ ଜିତିବା ସହିତ ୪ଟି ଗ୍ରାଣ୍ଡସ୍ଲାମ ଡବଲ୍ସ ଟାଇଟଲ ମଧ୍ୟ ଜିତିଥିଲେ। ସେ ଗ୍ରାଣ୍ଡସ୍ଲାମରେ ଥରେ ମାତ୍ର ପରାଜୟ ବରଣ କରିଥିଲେ। ୧୯୫୮ରେ ସେ ଫ୍ରେଞ୍ଚ୍ ଓପନ୍ ସେମିଫାଇନାଲରେ ପରାସ୍ତ ହୋଇଥିଲେ।
