ସିଡ୍ନୀ,୭।୫(ଏଏଫ୍ପି): ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଅଷ୍ଟ୍ରେଲିଆନ ଓପନ ଆୟୋଜନ ନେଇ ଆଶଙ୍କା ପ୍ରକାଶ ପାଇଛି। ଏପରିକି ଅଷ୍ଟ୍ରେଲିଆ ଓପନ ବାତିଲ ହେବା ସମ୍ଭାବନା ରହିଛି ବୋଲି ଟେନିସ ଅଷ୍ଟ୍ରେଲିଆ ସ୍ବୀକାର କରିଛି। ଯଦି କୋଭିଡ୍-୧୯ ସଂକ୍ରମଣ ନିୟନ୍ତ୍ରଣକୁ ନ ଆସିଥାଏ ତା’ହେଲେ ଏହି ଟୁର୍ନାମେଣ୍ଟ ବାତିଲ ହେବାର ଯଥେଷ୍ଟ ସମ୍ଭାବନା ରହିଛି ବୋଲି ଆୟୋଜକମାନେ ସୂଚନା ଦେଇଛନ୍ତି।
ଚଳିତବର୍ଷ ଜୁଲାଇ ୧୩ତାରିଖ ପର୍ଯ୍ୟନ୍ତ ଟେନିସ କ୍ୟାଲେଣ୍ଡରକୁ ସସ୍ପେଣ୍ଡ କରାଯାଇଛି। ପୁଣି ସବୁଦେଶ ସେମାନଙ୍କ ସୀମା ସିଲ୍ କରିଥିବାରୁ ଅନ୍ତର୍ଜାତୀୟସ୍ତରରେ କୌଣସି ଟୁର୍ନାମେଣ୍ଟ ଆୟୋଜନ ନେଇ ଅନିଶ୍ଚିତତା ସୃଷ୍ଟି ହୋଇଛି। ଅଷ୍ଟ୍ରେଲିଆନ ଓପନ ମେଲବୋର୍ନରେ ଜାନୁୟାରୀ ୧୮ରୁ ୩୧ ତାରିଖ ମଧ୍ୟରେ ଆୟୋଜନ ହୋଇଥାଏ। ଆହୁରି ୮ ମାସ ବାକିଥିଲେ ମଧ୍ୟ ଏହି ଟୁର୍ନାମେଣ୍ଟ ଆୟୋଜନ ନେଇ ଆଶଙ୍କା ପ୍ରକାଶ ପାଇଛି। ତେବେ ଟୁର୍ନାମେଣ୍ଟ ଆୟୋଜନ ନେଇ ଆମେ ଆଶାବାଦୀ ଅଛୁ ଓ ସବୁ ପ୍ରକାର ପରିସ୍ଥିତି ପାଇଁ ଯୋଜନା କରୁଛୁ ବୋଲି କ୍ରିକେଟ ଟେନିସର ଜଣେ ମୁଖପାତ୍ର କହିଛନ୍ତି। ସବୁ ବିକଳ୍ପ ନେଇ ଆମେ ଚିନ୍ତା କରୁଛୁ। ବହୁତ କିଛି ନିଷ୍ପତ୍ତି ଆମ ହାତରେ ନାହିଁ। ସରକାରଙ୍କ ଦ୍ୱାରା ଧାର୍ଯ୍ୟ କରାଯାଇଥିବା ନିର୍ଦ୍ଦେଶାବଳୀ ଓ କଟକଣା ଉପରେ ମଧ୍ୟ ସବୁକିଛି ନିର୍ଭର କରେ ବୋଲି ସେ କହିଛନ୍ତି।
କୋଭିଡ୍-୧୯ ମହାମାରୀ କାରଣରୁ ଚଳିତବର୍ଷ ଓ୍ବିମ୍ବେଲଡନ ଟୁର୍ନାମେଣ୍ଟକୁ ବାତିଲ କରାଯାଇଛି। ଦ୍ୱିତୀୟ ବିଶ୍ୱଯୁଦ୍ଧ ପରେ ପ୍ରଥମଥର ପାଇଁ ଓ୍ବିମ୍ବେଲଡନକୁ ବାତିଲ କରାଯାଇଛି। ପୁଣି ଫ୍ରେଞ୍ଚ୍ ଓପନ୍କୁ ମଧ୍ୟ ସେପ୍ଟେମ୍ବର ପର୍ଯ୍ୟନ୍ତ ସ୍ଥଗିତ ରଖାଯାଇଛି। ସେହିପରି ଅଗଷ୍ଟରେ ନ୍ୟୁୟର୍କରେ ୟୁଏସ୍ ଓପନ୍ ଆୟୋଜନ କରାଯିବା ନେଇ ୟୁନାଇଟେଡ୍ ଷ୍ଟେଟ୍ସ ଟେନିସ ଆସୋସିଏଶନ ଜୁନ୍ ମାସ ମଝିରେ ନିଷ୍ପତ୍ତି ନେବ। ଅଷ୍ଟ୍ରେଲିଆ ମଧ୍ୟ ତା’ର ସୀମା ସିଲ୍ କରିଛି।
