ମେଲବୋର୍ନ,୨୨।୧(ଏଏଫ୍ପି): ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟୁନାମେଣ୍ଟ ଅଷ୍ଟ୍ରେଲିଆନ ଓପନ ବୁଧବାର ତୃତୀୟ ଦିନରେ ପହଞ୍ଚିଛି। ସିଡେଡ ଖେଳାଳିମାନେ ଦ୍ୱିତୀୟ ରାଉଣ୍ଡରେ ବିଜୟୀ ହୋଇ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ପୁରୁଷ ସିଙ୍ଗଲ୍ସରେ ଦ୍ୱିତୀୟ ସିଡ ମାନ୍ୟତା ପାଇଥିବା ସର୍ବିୟାର ନୋଭାକ ଜୋକୋଭିଚ୍ ଜାପାନ କ୍ୱାଲିଫାୟର ତାତ୍ସୁମା ଇଟୋଙ୍କୁ ୬-୧, ୬-୪, ୬-୨ ସେଟ୍ରେ ହରାଇ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ଏଥର ସଫଳ ହେଲେ ଜୋକୋଭିଚ୍ କ୍ୟାରିୟରର ଅଷ୍ଟମ ଅଷ୍ଟ୍ରେଲିଆନ ଓପନ୍ ଟାଇଟଲ ହାସଲ କରିବେ। ତୃତୀୟ ରାଉଣ୍ଡରେ ସେ ଅନ୍ୟତମ ଜାପାନ ଖେଳାଳି ୟୋସିହିଟୋ ନିଶିଓକାଙ୍କୁ ଭେଟିବେ। ତୃତୀୟ ସିଡ ଅଭିଜ୍ଞ ସୁଇଜରଲାଣ୍ଡର ରୋଜର ଫେଡେରର ସର୍ବିୟାର ଫିଲିପ୍ କ୍ରାଜିନୋଭିକଙ୍କୁ ୬-୧,୬-୪,୬-୧ ସେଟରେ ହରାଇ ତୃତୀୟ ରାଉଣ୍ଡକୁ ଉଠିଛନ୍ତି। ସେ ଏଥିସହିତ ଏହି ଟୁର୍ନାମେଣ୍ଟରେ ୯୯ତମ ବିଜୟ ହାସଲ କରିଛନ୍ତି। ଏବେ ସେ ଅଷ୍ଟ୍ରେଲିଆର ଜନ୍ ମିଲମ୍ୟାନଙ୍କୁ ଭେଟିବେ। ସେହିପରି କ୍ରୋଏସିଆର ମାରିନ୍ ସିଲିକ୍ ତୃତୀୟ ରାଉଣ୍ଡରେ ନବମ ସିଡ ରୋବେର୍ଟୋ ବତିସ୍ତା ଅଗୁଟଙ୍କୁ ଭେଟିବା ସ୍ପଷ୍ଟ ହୋଇଛି। ସିଲିକ୍ ୬-୨ ୬-୭, ୩-୬, ୬-୧, ୭-୬ ସେଟ୍ରେ ୨୧ତମ ସିଡ ଫ୍ରନ୍ସର ବୋନୋଇଟ ପାଇରେଙ୍କୁ ହରାଇ ତୃତୀୟ ରାଉଣ୍ଡକୁ ଉଠିଛନ୍ତି। ସେହିପରି ଅଗୁଟ ଆମେରିକା କ୍ୱାଲିଫାୟର ମାଇକେଟ ମୋଙ୍କୁ ୫-୭, ୬-୨, ୬-୪, ୬-୧ ସେଟ୍ରେ ହରାଇ ଅଗ୍ରଗତି କରିଛନ୍ତି। ୩୨ତମ ସିଡ କାନାଡ଼ାର ମିଲୋସ ରାଓନିକ ୬-୩, ୬-୪, ୬-୨ ସେଟରେ ଚିଲିର କ୍ରିଷ୍ଟିଆନ ଗାରିନଙ୍କୁ ହରାଇ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ସେ ଏବେ ଗ୍ରୀସ୍ର ଷଷ୍ଠ ସିଡ ଖେଳାଳି ଷ୍ଟିଫାନୋସ ସିତିସପାସଙ୍କୁ ଭେଟିବେ। ସିତିସପାସ ଫିଲିପ କୋହେଲସ୍କ୍ରେଇବରଙ୍କ ବିପକ୍ଷ ଦ୍ୱିତୀୟ ରାଉଣ୍ଡ ମ୍ୟାଚ୍ରେ ଓ୍ବାକ୍ ଓଭର ପାଇ ତୃତୀୟ ରାଉଣ୍ଡକୁ ଉଠିଛନ୍ତି। ଅନ୍ୟଏକ ତୃତୀୟ ରାଉଣ୍ଡ ମ୍ୟାଚ୍ରେ ଦୁଇ ଆମେରିକୀୟ ଖେଳାଳି ସାମ କ୍ୟୁରେ ଓ ଟେନିସ ସାଣ୍ଡଗ୍ରୀନ ପରସ୍ପରକୁ ଭେଟିବେ। କ୍ୟୁରେ ଓ ସାଣ୍ଡଗ୍ରୀନ ସେମାନଙ୍କ ଦ୍ୱିତୀୟ ରାଉଣ୍ଡ ମ୍ୟାଚ୍ ଜିତି ଅଗ୍ରଗତି କରିଛନ୍ତି।
