ନୂଆଦିଲ୍ଲୀ,୬।୩(ପି.ଟି.)- ଭାରତୀୟ ବ୍ୟାଡ୍ମିଣ୍ଟନ ଖେଳାଳି କରୋନା ଭାଇରସ ଭୟରେ ଆସନ୍ତା ସପ୍ତାହରେ ହେବାକୁ ଥିବା ଅଲ ଇଂଲଣ୍ଡ ଚାମ୍ପିୟନଶିପ୍ ଇଭେଣ୍ଟରୁ ଓହରି ଯାଇଛନ୍ତି। ଏଚ୍ଏସ୍ ପ୍ରଣୟଙ୍କ ସମେତ ବିଶ୍ୱର ୧୦ମ ମାନ୍ୟତା ପ୍ରାପ୍ତ ପୁରୁଷ ଡବଲ୍ସ ଚିରାଗ ଶେଟି ଓ ସାତ୍ୱିକ ସାଇରାଜଙ୍କ ଯୋଡ଼ି ସମ୍ମାନଜନକ ଇଭେଣ୍ଟରେ ଖେଳିବେ ନାହିଁ। ଚଳିତ ସିଜନର ପ୍ରଥମ ସୁପର ୧୦୦୦ ଟୁର୍ନାମେଣ୍ଟ ଟୋକିଓ ଅଲିମ୍ପିକ୍ସ ଯୋଗ୍ୟତା ପାଇଁ ଗୁରୁତ୍ୱପୂର୍ଣ୍ଣ। ଏହା ଚଳିତ ମାସ ୧୧ ତାରିଖଠାରୁ ଆରମ୍ଭ ହେବ। କିଛି ଖେଳାଳି ନିଜ ନିଷ୍ପତ୍ତି ସମ୍ପର୍କରେ ବାଇ (ବ୍ୟାଡ୍ମିଣ୍ଟନ ଆସୋସିଏଶନ ଅଫ୍ ଇଣ୍ଡିଆ)କୁ ଲିଖିତ ଭାବେ ଜଣାଇ ଦେଇଛନ୍ତି। ଏପର୍ଯ୍ୟନ୍ତ ଡବଲ୍ସ ଖେଳାଳି ଚିରାଗ ଶେଟି ଓ ସାତ୍ୱିକ ସାଇରାଜ ରାଙ୍କିରେଡ୍ଡୀ, ମନୁ ଅତ୍ରୀ ଓ ବି. ସୁମିଥ ରେଡ୍ଡୀ, ଏଚ୍ଏସ୍ ପ୍ରଣୟ, ସମୀର ବର୍ମା ଓ ସୌରଭ ବର୍ମା ଇଭେଣ୍ଟରୁ ଓହରି ଯାଇଛନ୍ତି। ଦେଶର ଟପ ସିଙ୍ଗଲ୍ସ ଖେଳାଳି ସାଇନା ନେହ୍ବାଲ, ପିଭି ସିନ୍ଧୁ, କିଡାମ୍ବି ଶ୍ରୀକାନ୍ତ, ଅଶ୍ୱିନୀ ପୋନାପ୍ପା ଓ ଏନ୍. ସିକି ରେଡ୍ଡୀ-ପ୍ରଣବ ଜେରୀ ଚୋପ୍ରା ଅଂଶଗ୍ରହଣ କରିବେ। କରୋନା ଭାଇରସ ଯୋଗୁ ୩,୧୦୦ ଲୋକେ ପ୍ରାଣ ହରାଇ ସାରିଥିବାବେଳେ ପ୍ରାୟ ୯୧ହଜାର ଲୋକ ଆକ୍ରାନ୍ତ ହୋଇସାରିଛନ୍ତି। ୟୁନାଇଟେଡ୍ କିଙ୍ଗ୍ଡମରେ ଆକ୍ରାନ୍ତ ସଂଖ୍ୟା ୯୦ରେ ପହଞ୍ଚିଛି। ସମସ୍ତ ଖେଳାଳି ଦୁବାଇ ଦେଇ ଇଂଲଣ୍ଡ ଗସ୍ତ କରିବାକୁ ଡରୁଛନ୍ତି। କାରଣ ଦୁବାଇ ବିଶ୍ୱର ଅନ୍ୟତମ ବ୍ୟସ୍ତ ବହୁଳ ବିମାନ ବନ୍ଦର। ଏଣୁ ସମ୍ଭାବନା ଅଧିକ ରହିଛି। କାନ୍ଧଜନିତ ଆହତ ସମସ୍ୟା ଯୋଗୁ ଚିରାଗ ଓ ସାତ୍ୱିକ ଗତ ୨୦୧୯ ସଂସ୍କରଣରେ ମଧ୍ୟ ଖେଳି ନ ଥିଲେ। ସମୀର, ପ୍ରଣୟ, ମନୁ-ସୁମିଥ ପ୍ରଥମ ରାଉଣ୍ଡରେ ପରାସ୍ତ ହୋଇଥିଲେ। ସେହିଭଳି ସୌରଭ ମୁଖ୍ୟ ପର୍ଯ୍ୟାୟକୁ ଉନ୍ନୀତ ହୋଇପାରି ନ ଥିଲେ।
