ବେଜିଂ,୫।୧୧: ଭୁଲାପଣ ସମସ୍ୟା ଅଲ୍ଜାଇମର୍ ପାଇଁ ଚାଇନା ଔଷଧ ପ୍ରସ୍ତୁତ କରିଛି। ସାଙ୍ଘାଇର ଏକ କମ୍ପାନୀ ଏହି ଔଷଧ ପ୍ରସ୍ତୁତ କରିଥିବା ଚାଇନାର ଜାତୀୟ ମେଡିକାଲ ଉତ୍ପାଦ ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ୧୭ ବର୍ଷର ଦୀର୍ଘ ଗବେଷଣା ପରେ ଚାଇନା କମ୍ପାନୀ ଗ୍ରୀନ୍ ଭ୍ୟାଲିକୁ ଏଥିରେ ସଫଳତା ମିଳିଛି। ଏହା ଦ୍ୱାରା ପୃଥିବୀର ୫ କୋଟିରୁ ଅଧିକ ଲୋକ ଉପକୃତ ହେବେ ବୋଲି କୁହାଯାଉଛି। ଏହି ଔଷଧ ବଜାରରେ ଡିସେମ୍ବର ମାସ ସୁଦ୍ଧା ଓଲିଗୋମେନେଟ୍ ନାମରେ ଉପଲବ୍ଧ ହେବ। ପ୍ରଥମେ ଏହାକୁ ଘରୋଇ ବଜାରରେ ବିକ୍ରି କରାଯିବ। ପରେ ଏହି ଔଷଧ ଆମେରିକା, ୟୁରୋପ, ଏସିଆର ବିଭିନ୍ନ ରାଷ୍ଟ୍ରରେ ମିଳିବ ବୋଲି ଗ୍ରୀନ୍ ଭ୍ୟାଲି ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ବର୍ତ୍ତମାନ ସୁଦ୍ଧା ଅଲ୍ଜାଇମର୍ ପାଇଁ କୌଣସି ଔଷଧ ପ୍ରସ୍ତୁତି ହୋଇ ନ ଥିବାବେଳେ ଚାଇନାର ଗବେଷକ ଏଥିରେ ସଫଳତା ହାସଲ କରିଛନ୍ତି। ସମ୍ପ୍ରତି ଚାଇନାରେ ଏକ କୋଟି ଅଲ୍ଜାଇମର ରୋଗୀ ଅଛନ୍ତି। ସେହିପରି ପୃଥିବୀରେ ୫ କୋଟିରୁ ଅଧିକ ଅଲ୍ଜାଇମର ସମସ୍ୟା ଭୋଗୁଥିବା ଲୋକ ଅଛନ୍ତି। ପରୀକ୍ଷା ମୂଳକ ଭାବେ କମ୍ପାନୀ ପକ୍ଷରୁ ୮୧୮ ଲୋକଙ୍କ ଉପରେ ଏହି ଔଷଧର ପ୍ରୟୋଗ କରାଯାଇଥିଲା। ୪ ସପ୍ତାହ ମଧ୍ୟରେ ଏହାର ସକାରାତ୍ମକ ପ୍ରଭାବ ରୋଗୀଙ୍କଠାରେ ଦେଖିବାକୁ ମିଳିଥିଲା।
