ନୂଆଦିଲ୍ଲୀ,୧୭।୫ (ପି.ଟି.): ଏସିଆନ ଗେମ୍ସ ପଦକ ବିଜେତା ତଥା ଟେନିସ୍ ତାରକା ଅଙ୍କିତା ରାଇନା ଓ ଦିଭିଜ ଶରନଙ୍କ ନାମ ଅର୍ଜୁନ ପୁରସ୍କାର ପାଇଁ ସୁପାରିସ୍ କରାଯାଇଛି। ଅଲ ଇଣ୍ଡିଆ ଟେନିସ ଆସୋସିଏଶନ (ଏଆଇଟିଏ) ଏହି ଦୁଇ ଖେଳାଳିଙ୍କ ନାମ ଅର୍ଜୁନ ପୁରସ୍କାର ପାଇଁ ସୁପାରିସ କରିବାକୁ ନିଷ୍ପତ୍ତି ନେଇଛି। ସେହିପରି ପୂର୍ବତନ ଡେଭିସ୍ କପ୍ କୋଚ୍ ନନ୍ଦନ ବଲଙ୍କ ନାମ ଧ୍ୟାନଚାନ୍ଦ ପୁରସ୍କାର ପାଇଁ ଏଆଇଟିଏ ସୁପାରିସ କରିଛି।
୨୭ ବର୍ଷୀୟା ଅଙ୍କିତା ୨୦୧୮ ଏସିଆନ ଗେମ୍ସରେ ମହିଳା ସିଙ୍ଗଲ୍ସରେ ବ୍ରୋଞ୍ଜ୍ ପଦକ ଜିତିଥିଲେ। ଫେଡ୍ କପ୍ରେ ମଧ୍ୟ ସେ ଦମ୍ଦାର ପ୍ରଦର୍ଶନ କରି ଭାରତକୁ ପ୍ରଥମଥର ପାଇଁ ଓ୍ବାଲର୍ଡ ଗ୍ରୁପ୍ ପ୍ଲେ- ଅଫ୍ସରେ ପହଞ୍ଚାଇଥିଲେ। ସେହିପରି ଦିଲ୍ଳୀର ଶରନ ଜାକାର୍ତ୍ତରେ ଅନୁଷ୍ଠିତ ଏସିଆନ ଗେମ୍ସରେ ନିଜ ଦେଶରେ ରୋହନ ବୋପାନ୍ନାଙ୍କ ସହ ପୁରୁଷ ଡବଲ୍ସରେ ସ୍ବର୍ଣ୍ଣ ପଦକ ହାସଲ କରିଥିଲେ। ୩୪ ବର୍ଷୀୟ ଶରନ ୨୦୧୯ ସେସନରେ ଦୁଇଟି ଏଟିପି ଟାଇଟଲ ହାସଲ କରିଥିଲେ। ସେ ଓ ବୋପାନ୍ନା ପୁଣେରେ ଟାଟା ଓପନ୍ ମହାରାଷ୍ଟ୍ର ଓ ସେଣ୍ଟ ପିଟର୍ସବର୍ଗରେ ଆଇଗର ଜେଲେନେଙ୍କ ସହ ମିଶି ଏଟିପି ଟାଇଟଲ ଜିତିଥିଲେ। ଅର୍ଜୁନ ପୁରସ୍କାର ପାଇବା ପାଇଁ ଏହି ଦୁଇ ଖେଳାଳିଙ୍କର ହକ୍ ରହିଛି ଓ ଏମାନେ ଯୋଗ୍ୟ। ତେଣୁ ଆମେ ଏମାନଙ୍କ ନାମ ସୁପାରିସ କରିଛୁ ବୋଲି ଏଆଇଟିଏ ସାଧାରଣ ସମ୍ପାଦକ ହିରୋନମୟ ଚାଟାର୍ଜୀ କହିଛନ୍ତି।
୨୦୧୮ ଫେଡ୍ କପ୍ରେ ଅଙ୍କିତା ସିଙ୍ଗଲ୍ସରେ ଅପରାଜେୟ ରହିଥିଲେ। ସେବେଠାରୁ ସେ ଡବ୍ଲ୍ୟୁଟିଏ ଓ ଆଇଟିଏଫ୍ରେ ଭାରତର ଶ୍ରେଷ୍ଠ ଖେଳାଳି ବିବେଚିତ ହେଉଛନ୍ତି। ସେ ୬ଟି ୨୫ ହଜାର ଆମେରିକୀୟ ଡଲାର ଲିବେଲର ଟାଇଟଲ ମଧ୍ୟ ହାସଲ କରିଛନ୍ତି ଓ ଚଳିତ ବର୍ଷ ମାର୍ଚ୍ଚରେ ସିଙ୍ଗଲ୍ସ ର଼୍ୟାଙ୍କିଙ୍ଗ୍ରେ କ୍ୟାରିୟର ଶ୍ରେଷ୍ଠ ୧୬୦ତମ ସ୍ଥାନ ହାସଲ କରିଛନ୍ତି। ଶେଷଥର ପାଇଁ ବୋପାନ୍ନା ଟେନିସ ଖେଳାଳି ହିସାବରେ ୨୦୧୮ରେ ଅର୍ଜୁନ ପୁରସ୍କାର ଜିତିଥିଲେ।
ସେହିପରି ଜୀବନବ୍ୟାପୀ ଅବଦାନ ପାଇଁ ଧ୍ୟାନଚାନ୍ଦ ପୁରସ୍କାର ଲାଗି ନନ୍ଦନଙ୍କ ନାମ ସୁପାରିସ କରାଯିବ ବୋଲି ଏଆଇଟିଏ ତରଫରୁ କୁହାଯାଇଛି। ୬୦ ବର୍ଷୀୟ ନନ୍ଦନ ୧୯୮୦- ୮୩ରେ ଡେଭିସ କପ୍ରେ ଦୁଇଟି ଟାଇ ଖେଳିଥିଲେ। ସେ ଦୁଇଟି ମ୍ୟାଚ୍ରେ ବିଜୟୀ ହୋଇଥିବା ବେଳେ ଗୋଟିଏରେ ପରାଜୟ ବରଣ କରିଥିଲେ। ଦୀର୍ଘ ବର୍ଷ ଧରି ସେ ଡେଭିସ କପ୍ରେ ଭାରତୀୟ ଦଳରେ କୋଚ୍ ରହିଥିଲେ। ଏପର୍ଯ୍ୟନ୍ତ କେବଳ ୩ଟି ଖେଳାଳି ଧ୍ୟାନଚାନ୍ଦ ପୁରସ୍କାର ହାସଲ କରିଛନ୍ତି। ସେମାନେ ହେଲେ ଜିସାନ ଅଲି (୨୦୧୪), ଏସ୍.ପି. ମିଶ୍ରା (୨୦୧୫) ଓ ନୀତୀନ କୀର୍ତ୍ତନ (୨୦୧୯)। ଏପର୍ଯ୍ୟନ୍ତ କୌଣସି ଟେନିସ ଖେଳାଳିଙ୍କୁ ଦ୍ରୋଣାଚାର୍ଯ୍ୟ ପୁରସ୍କାର ପ୍ରଦାନ କରାଯାଇନାହିଁ।
