ବରଗଡ଼,୧।୭(ପ୍ରେମାନନ୍ଦ ଖମାରୀ): ବରଗଡ଼ ଜିଲା ଘରୋଇ ବସ୍ ମାଲିକ ସଂଘ ଆହ୍ୱାନରେ ବୁଧବାର ବରଗଡ଼ ସହରସ୍ଥିତ ବିଜୁ ପଟ୍ଟନାୟକ ଟାଉନ ହଲରେ ୱେଷ୍ଟର୍ଣ୍ଣ ଆଣ୍ଡ୍ ସାଉଥ୍ ଇଷ୍ଟ ପ୍ରାଇଭେଟ୍ ବସ୍ ଓନର୍ସ ଏକତା ମଞ୍ଚର ସାଧାରଣ ପରିଷଦ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ବସ୍ ମାଲିକଙ୍କ ବିଭିନ୍ନ ସମସ୍ୟା ଉପରେ ଆଲୋଚନା ହୋଇଥିଲା । ରାଜ୍ୟ ସରକାରଙ୍କ ଇ.ଭି ବସ୍ ଚଳାଚଳ ଏବଂ ରେଶନାଇଲେଜଶନ ଟାଇମିଂ ଉପରେ ମୁଖ୍ୟତଃ ଆଲୋଚନା ହୋଇ ସରକାରଙ୍କ ଏଭଳି ନିଷ୍ପତ୍ତିକୁ ବୈଠକରେ ବିରୋଧ କରାଯାଇଥିଲା । ସରକାର ବରଗଡ଼-ସମ୍ବଲପୁର, ସମ୍ବଲପୁର -ବେଲପାହାଡ ଆଦି ରୁଟରେ ଇ.ଭି ବସ୍ ଚଳାଚଳକୁ ତୁରନ୍ତ ବନ୍ଦ କରାଯିବା ପାଇଁ ବୈଠକରେ ଦାବି ହୋଇଛି। ଦାବି ତୁରନ୍ତ ପୂରଣ ନ ହେଲେ ଆସନ୍ତା ୪ ଓ ୫ତାରିଖ ପଶ୍ଚିମ ଓଡ଼ିଶାର ବରଗଡ଼ ଏବଂ ସମ୍ବଲପୁର ଜିଲାରେ ହେବାକୁ ଥିବା କେନ୍ଦ୍ର ସ୍ଵରାଷ୍ଟ୍ର ମନ୍ତ୍ରୀ ଅମିତ୍ ଶାହାଙ୍କ କାର୍ଯ୍ୟକ୍ରମରେ ଘରୋଇ ବସ୍ ମାଲିକ ସଂଘ ସମ୍ପୂର୍ଣ୍ଣ ଅସହଯୋଗ କରିବ ଅର୍ଥାତ୍ ସଂଘ ସେହି କାର୍ଯ୍ୟକ୍ରମକୁ ବସ୍ ଯୋଗାଇବାରୁ ସମ୍ପୂର୍ଣ୍ଣ ନିବୃତ୍ତ ରହିବ ବୋଲି ବୈଠକରେ ନିଷ୍ପତ୍ତି ନିଆଯାଇଛି । ବୈଠକରେ ୧୧ଟି ବସ୍ ମାଲିକ ସଂଘର ପ୍ରତିନିଧିମାନେ ଉପସ୍ଥିତ ଥିଲେ।
Dharitri – Odisha’s No.1 Odia Daily
