ସେଞ୍ଚୁରିୟନ,୨୬।୧୨(ଏଏଫ୍ପି)- ସ୍ଥାନୀୟ ସୁପରସ୍ପୋର୍ଟ ପାର୍କ ଗ୍ରାଉଣ୍ଡରେ ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ ଆରମ୍ଭ ହେବା ପୂର୍ବରୁ ଇଂଲଣ୍ଡ ତାରକା ଅଲରାଉଣ୍ଡର ବେନ୍ ଷ୍ଟୋକ୍ସ ଇଂଲଣ୍ଡ ଦଳରେ ଯୋଗ ଦେଇଛନ୍ତି। ଏହି ମ୍ୟାଚ୍ ଗୁରୁବାରଠାରୁ ଆରମ୍ଭ ହେବ। ଷ୍ଟୋକ୍ସଙ୍କ ପିତା ଗେଡ୍ ଷ୍ଟୋକ୍ସ ଅସୁସ୍ଥ ହୋଇ ଜୋହାନ୍ସବର୍ଗର ଏକ ହସ୍ପିଟାଲରେ ଭର୍ତ୍ତି ହୋଇଛନ୍ତି। ତାଙ୍କ ସ୍ବାସ୍ଥ୍ୟାବସ୍ଥାରେ ମଧ୍ୟ ଉନ୍ନତି ପରିଲକ୍ଷିତ ହୋଇଛି। ଫଳରେ ଷ୍ଟୋକ୍ସ ବୁଧବାର ଇଂଲଣ୍ଡ ଶିବିରରେ ଯୋଗଦେବା ସହ ଅଭ୍ୟାସ କରିଛନ୍ତି। ଗେଡ୍ କ୍ରିକେଟ ଦେଖିବା ପାଇଁ ଦକ୍ଷିଣ ଆଫ୍ରିକା ଗସ୍ତ କରିଥିଲେ। ତେବେ ସେ ଗୁରୁତରଭାବେ ଅସୁସ୍ଥ ହୋଇପଡି ହସ୍ପିଟାଲରେ ଭର୍ତ୍ତି ହୋଇଥିଲେ। ପିତାଙ୍କ ପାଖରେ ରହିବା କାରଣରୁ ଷ୍ଟୋକ୍ସ ଅଭ୍ୟାସରେ ଯୋଗ ଦେଇପାରି ନ ଥିଲେ। ଡାକ୍ତରଙ୍କ ଚିକିତ୍ସା ଓ ଲୋକମାନଙ୍କର ସମର୍ଥନ ପାଇଁ ଷ୍ଟୋକ୍ସଙ୍କ ପରିବାର କୃତଜ୍ଞତା ଜଣାଇଛନ୍ତି।
ତାରକା ଦ୍ରୁତ ବୋଲର ଷ୍ଟୁଆର୍ଟ ବ୍ରଡ ଓ ଜୋଫ୍ରା ଆର୍ଚର ଇତିମଧ୍ୟରେ ଆରୋଗ୍ୟ ଲାଭ କରିଛନ୍ତି। ଅସୁସ୍ଥତା କାରଣରୁ ଏହି ଦୁଇ ବୋଲର ଇଂଲଣ୍ଡର ଦୁଇଟି ଅଭ୍ୟାସ ମ୍ୟାଚ୍ ଖେଳିପାରି ନ ଥିଲେ। ସେହିପିରି ଜ୍ୟାକ ଲିଚ୍, ଓଲି ପୋପ୍ ଓ କ୍ରିସ୍ ଓ୍ବକ୍ସ ମଧ୍ୟ ଅସୁସ୍ଥତା କାରଣରୁ ଅନ୍ତିମ ଅଭ୍ୟାସ ମ୍ୟାଚ୍ ଖେଳିପାରି ନ ଥିଲେ। ତେବେ ଏହି ୩ ବୋଲର ପ୍ରଥମ ଟେଷ୍ଟ ମ୍ୟାଚ୍ ପାଇଁ ଚୟନରୁ ବାଦ୍ ପଡିନାହନ୍ତି ବୋଲି କୁହାଯାଇଛି।
