ଗୋପ,୨।୬(ଡି.ଏନ୍.ଏ.): କରୋନା ଯୋଗୁ ଶିକ୍ଷାନୁଷ୍ଠାନଗୁଡ଼ିକ ବନ୍ଦ ରହିଥିବାବେଳେ ଛାତ୍ରୀଛାତ୍ରୀଙ୍କ ଭବିଷ୍ୟତକୁ ଦୃଷ୍ଟିରେ ରଖି ସରକାର ଅନଲାଇନ ମାଧ୍ୟମରେ ପାଠ ପଢ଼ାଇବାକୁ ନିର୍ଦ୍ଦେଶ ଦେଇଥିଲେ। ସରକାରଙ୍କ ଏହି ନିର୍ଦ୍ଦେଶ ଅନୁଯାୟୀ ଗୋପ ବ୍ଲକ ଜଗନ୍ନାଥ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟ ଶିକ୍ଷକ ଲଲାଟ ଚନ୍ଦ୍ର ବେହେରା ଅନଲାଇନରେ ଗଣିତ ଶିକ୍ଷାଦାନ ଜାରି ରଖିଛନ୍ତି। ସବୁ ବିଷୟ ମଧ୍ୟରୁ ଗଣିତ ଅଧିକ କଷ୍ଟ ହେଉଥିବା ଛାତ୍ରୀଛାତ୍ରମାନେ ଅନୁଭବ କରୁଥିବାବେଳେ ଲଲାଟ ସାରଙ୍କ ଏହି ଅନଲାଇନ ଶିକ୍ଷା ସେମାନଙ୍କୁ ବେଶ ସୁହାଉଥିବା ଜଣାପଡ଼ିଛି। ଏପରିକି ଗଣିତର ପ୍ରତିଟି ସମସ୍ୟାକୁ ଅତି ସରଳ ଭାବେ ଲଲାଟ ସାର ସମାଧାନ କରିଦେଉଥିବାରୁ ଛାତ୍ରୀଛାତ୍ରମାନଙ୍କ ପ୍ରିୟ ପାଲଟିଯାଇଛନ୍ତି। ଏହାସହ ଏହି ଶିକ୍ଷକ ଜଣଙ୍କ ବିଭିନ୍ନ ସମୟରେ ଅନ୍ଲାଇନ୍ ଶିକ୍ଷାକୁ ନେଇ ରାଜ୍ୟରୁ ପ୍ରତିନିଧି ଭାବରେ ମୁମ୍ବାଇ, କର୍ନାଟକ, ବାଙ୍ଗାଲୋର ଓ ଅନ୍ୟ କେତେକ ସ୍ଥାନରେ ମଧ୍ୟ ଯୋଗଦେଇ କିପରି ଛାତ୍ରୀଛାତ୍ରଙ୍କୁ ଅନ୍ଲାଇନ୍ ମାଧ୍ୟମରେ ପାଠ ପଢ଼ାଇବେ ସେନେଇ ବାର୍ତ୍ତା ଦେଇଛନ୍ତି। ସେହିପରି ସେ ଓଡ଼ିଶା ସ୍କୁଲ୍ ଏଜୁକେଶନ ପ୍ରୋଗ୍ରାମ ଅଥୋରିଟି (ଓସେପା) ଏବଂ ବିଦ୍ୟାଳୟ ଗଣଶିକ୍ଷା ବିଭାଗ ମିଳିତ ଆନୁକୂଲ୍ୟରେ ପ୍ରତି ଶିକ୍ଷାବର୍ଷ ଆରମ୍ଭରେ ସରକାରଙ୍କ ତରଫରୁ ପ୍ରକାଶିତ ଉଜ୍ଜ୍ୱଳ ଉତ୍ଥାନ ପୁସ୍ତିକାରେ ଗଣିତ ଲେଖକ ଭାବେ ଛାତ୍ରଛାତ୍ରୀଙ୍କ ଦକ୍ଷତା ବୃଦ୍ଧି ପାଇଁ ଚେଷ୍ଟା ଜାରି ରଖିଛନ୍ତି। ସଂପ୍ରତି କରୋନା ସମୟରେ ଶିକ୍ଷାନୁଷ୍ଠାନ ବନ୍ଦ ରହିଥିବା ଯୋଗୁଁ ଛାତ୍ରୀଛାତ୍ରଙ୍କ ଶିକ୍ଷା ବେଶ ଗୁରୁତ୍ୱ ରହିଛି। ସରକାରଙ୍କ ଏହି ଅନଲାଇନ ଶିକ୍ଷାଦାନ ଛାତ୍ରୀଛାତ୍ରଙ୍କ ପାଠପଢ଼ାରେ ବେଶ ସହାୟକ ହେଉଥିବାବେଳେ ଶିକ୍ଷକମାନେ ସହଯୋଗ କରିଛନ୍ତି। ହ୍ବାଟ୍ସ୍ଆପ୍, ଭିଡିଓ କନ୍ଫରେନ୍ସ ସମେତ ବିଭିନ୍ନ ଆପ୍ ଭଳି ଉନ୍ନତମାନର ଜ୍ଞାନ କୌଶଳ ଯୋଗୁ ଏବେ ଘରେ ବସି ମଧ୍ୟ ଅନ୍ଲାଇନ୍ ମାଧ୍ୟମରେ ଛାତ୍ରଛାତ୍ରୀଙ୍କୁ ପାଠ ପଢ଼ାଇବା ସହଜ ହୋଇପାରିଛି ବୋଲି ଶିକ୍ଷକ ବେହେରା କହିଛନ୍ତି। ତାଙ୍କର ଏପରି ଅନ୍ଲାଇନ୍ ମାଧ୍ୟମରେ ପାଠପଢ଼ାର ଦକ୍ଷତାକୁ ନେଇ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ସାଧୁବାଦ ଜଣାଇଛନ୍ତି।
