ଚୌଦ୍ୱାର,୨୩।୪(ଡି.ଏନ୍.ଏ.): କରୋନା ଭୁତାଣୁ ସଂକ୍ରମଣକୁ ପ୍ରତିହତ କରିବା ପାଇଁ ବାହାରୁ ଆସୁଥିବା ବ୍ୟକ୍ତିବିଶେଷଙ୍କ ଡାକ୍ତରୀ ପରୀକ୍ଷା କରାଇ ସ୍ଥାନୀୟ କ୍ୱାରେଣ୍ଟାଇନ ସେଣ୍ଟରରେ ରଖିବା ବ୍ୟବସ୍ଥା ସରକାରଙ୍କ ତରଫରୁ ସମସ୍ତ ପଞ୍ଚାୟତ ଓ ସହରାଞ୍ଚଳରେ କରାଯାଇଛି। ଏଥିସହିତ ସଂକ୍ରମଣକୁ ରୋକିବା ଦିଗରେ ସହରାଞ୍ଚଳ ବାସିନ୍ଦା ହୁଅନ୍ତୁ କି ଗ୍ରାମାଞ୍ଚଳ ସମସ୍ତେ ସଚେତନ ହେଉଥିବା ଦେଖିବାକୁ ମିଳିଛି। ଚୌଦ୍ୱାର ସହର ପାଇଁ ପୌରପାଳିକା ତରଫରୁ ସ୍ଥାନୀୟ ଗାନ୍ଧୀଛକ ସ୍ଥିତ ପୌର ଟାଉନହଲରେ ମାର୍ଚ୍ଚ ୨୩ ତାରିଖରୁ କ୍ୱାରେଣ୍ଟାଇନ କେନ୍ଦ୍ର ଖୋଲାଯାଇଛି। ସ୍ଥାନୀୟ ତେଲଗୁ ବସ୍ତିର ଜନୈକ ବ୍ୟକ୍ତି ଅନୁଗୋଳରେ ଶ୍ରମିକ ଭାବେ କାମକରୁଥିଲେ। ମଙ୍ଗଳବାର ବିଳମ୍ବିତ ରାତିରେ ଉକ୍ତ ବ୍ୟକ୍ତି ନିଜ ଘରକୁ ଫେରିଥିଲେ ହେଁ ଘରଲୋକେ ତଥା ସାହି ପଡିଶା ତାଙ୍କୁ ଘରେ ପୁରାଇ ନ ଥିଲେ। ପରେ ତାଙ୍କ ପରିବାରଲେକେ ଚୌଦ୍ୱାରସ୍ଥିତ ସରକାରଙ୍କ ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ତାଙ୍କୁ ପରୀକ୍ଷା କରିବା ପରେ ଡାକ୍ତର ତାଙ୍କୁ କ୍ୱାରେଣ୍ଟାଇନରେ ରହିବା ପାଇଁ ପରାମର୍ଶ ଦେଇଥିଲେ। ସେହିପରି ପରିଡା ସାହିର ଜନୈକ ଯୁବକ ବାଲେଶ୍ୱରରେ ରହି କାମ କରୁଥିବାବେଳେ ବୁଧବାର ସେ ନିଜ ଘରକୁ ଫେରିଥିଲେ। ସାହି ଲୋକଙ୍କ ପରାମର୍ଶ କ୍ରମେ ସେ ଚୌଦ୍ୱାର ପୋଲିସ ସହାୟତାରେ କ୍ୱାରେନଟାଇନରେ ଥିବା ଜଣାପଡିଛି।
