କପ୍ତିପଦା,୧୩ା୬(ଡି.ଏନ.ଏ)- କପ୍ତିପଦା ବ୍ଲକ୍ରେ ଅନ୍ତ୍ୟୋଦୟ କାର୍ଡ ବଣ୍ଟନରେ ଅନିୟମିତତା ହୋଇଥିବା ଅଭିଯୋଗ ହୋଇଛି । ପ୍ରକୃତ ହିତାଧିକାରୀ ଏହି କାର୍ଡ ପାଇବାରୁ ବଞ୍ଚିତ ହେଉଥିବା ବେଳେ ଥିଲାବାଲା କାର୍ଡ ହାତେଇବାରେ ସଫଳ ହୋଇଛନ୍ତି । ଫଳରେ ବହୁ ବିଧବା, ଗରିବ ଓ ଅସହାୟ ଲୋକ ସରକାରଙ୍କ ଏହି ଯୋଜନାରୁ ବଞ୍ଚିତ ହେଉଛନ୍ତି। କେତେଜଣ ନିର୍ଦ୍ଦିଷ୍ଟ ଦଲାଲ ଧନୀକ ଶ୍ରେଣୀର ଲୋକଙ୍କଠାରୁ ଟଙ୍କା ଆଦାୟ କରି ଏହି କାର୍ଡ ପ୍ରଦାନରେ ସହାୟତା କରୁଥିବା ଅଭିଯୋଗକାରୀମାନେ ପ୍ରକାଶ କରିଛନ୍ତି। ଏହାର ପ୍ରତିବାଦରେ ଶୁକ୍ରବାର କପ୍ତିପଦା ଭିନ୍ନକ୍ଷମ ମଞ୍ଚ ପକ୍ଷରୁ ଏକ ଦାବିପତ୍ର ଜିଲାପାଳଙ୍କ ଉଦ୍ଦେଶ୍ୟରେ କପ୍ତିପଦା ବିଡିଓଙ୍କୁ ପ୍ରଦାନ କରାଯାଇଛି। ଏହାର ନକଲ ଜିଲା ଯୋଗାଣ ଅଧିକାରୀ, ଭିଜିଲାନ୍ସ ଡିଏସପି, ବାରିପଦା ଓ କପ୍ତିପଦା ଉପଜିଲାପାଳଙ୍କୁ ପ୍ରଦାନ କରାଯାଇଛି। ଏହାର ବିଧିବଦ୍ଧ ତଦନ୍ତ କରାଯାଇ କାଯର୍ୟାନୁଷ୍ଠାନ ଗ୍ରହଣ କରା ନ ଗଲେ ଆଗାମୀ ଦିନରେ ଭିନ୍ନକ୍ଷମ ମଞ୍ଚ ଓ ଡିଏଲସି ସଦସ୍ୟମାନେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି। ଏ ସମ୍ପର୍କରେ କପ୍ତିପଦା ଯୋଗାଣ ଅଧିକାରୀ ଭାସ୍କର ବାରିକ୍ଙ୍କୁ ପଚାରିବାରୁ ୩୦ଟା ପାଖାପାଖି ରାଶନକାର୍ଡ ଧରି ସେମାନେ ମୋ ପାଖକୁ ଆସି ଏ ସବୁକୁ ଅନ୍ତ୍ୟୋଦୟ କାର୍ଡ କରିବାକୁ କହିଥିଲେ। ଟାର୍ଗେଟ ଆସିଲେ ଏସବୁକୁ ପଞ୍ଚାୟତସ୍ତରରେ ତଦନ୍ତ କରାଯାଇ ଯୋଗ୍ୟ ହିତାଧିକାରୀଙ୍କୁ ପ୍ରଦାନ କରାଯିବ ବୋଲି ମୁଁ ସେମାନଙ୍କୁ କହିଥିଲି ା ମାତ୍ର ସେମାନେ ଗାଳିଗୁଲଜ କରିବା ସହିତ ମୋତେ ଧମକ ଦେଇଥିଲେ। ଏ ନେଇ ମୁଁ ଥାନାରେ ଅଭିଯୋଗ କରିଛି ବୋଲି କହିଛନ୍ତି।
