କଲମ୍ବୋ, ୨୩ା୭ (ଏଏଫ୍ପି)-ଶ୍ରୀଲଙ୍କାର ଭେଟେରାନ ପେସ୍ ବୋଲର ଲସିଥ ମାଲିଙ୍ଗା ଅନ୍ତର୍ଜାତୀୟ ଦିନିକିଆ କ୍ରିକେଟରୁ ଅବସର ନେବେ। ବାଂଲାଦେଶ ବିପକ୍ଷରେ ଖେଳାଯିବାକୁଥିବା ୩ମ୍ୟାଚ ବିଶିଷ୍ଟ ସିରିଜ ଅନ୍ତର୍ଗତ ପ୍ରଥମ ମ୍ୟାଚ ଖେଳି ସାରିବାପରେ ସେ ଦିନିକିଆ କ୍ରିକେଟ ଛାଡ଼ିବେ। ଶ୍ରୀଲଙ୍କା ଅଧିନାୟକ ଦିମୁଥ କରୁଣାରତ୍ନେ ସୋମବାର ଏହି ସୂଚନା ଦେଇଛନ୍ତି। ଦିନିକିଆ ସିରିଜର ମ୍ୟାଚଗୁଡ଼ିକ ଜୁଲାଇ ୨୬, ୨୮ ଓ ୩୧ରେ ଆର୍. ପ୍ରେମାଦାସା ଷ୍ଟାଡିୟମରେ ଖେଳାଯିବ। ଏଥିପାଇଁ ଶ୍ରୀଲଙ୍କାର ୨୨ଜଣିଆ ସମ୍ଭାବ୍ୟ ଖେଳାଳି ତାଲିକା ପ୍ରକାଶ ପାଇଛି। ଅନ୍ତର୍ଜାତୀୟ ଦିନିକିଆ କ୍ରିକେଟରେ ୩୫ ବର୍ଷୀୟ ମାଲିଙ୍ଗା ହେଉଛନ୍ତି ଶ୍ରୀଲଙ୍କାର ତୃତୀୟ ସର୍ବାଧିକ ଉଇକେଟ ହାସଲକରୀ ବୋଲର। ସେ ୨୧୯ ଇନିଂସରୁ ୩୩୫ ଉଇକେଟ ଅକ୍ତିଆର କରିଛନ୍ତି। ଶ୍ରୀଲଙ୍କାର ଅନ୍ୟ ଦୁଇ ଶ୍ରେଷ୍ଠ ବୋଲର ହେଲେ ମୁଥୟା ମୁରଲୀଧରନ (୫୨୩) ଏବଂ ଚାମିଣ୍ଡା ଭାସ (୩୯୯)। ମାଲିଙ୍ଗା ଆହୁରିମଧ୍ୟ ଗତ ଆଇସିସି ବିଶ୍ୱକପ୍ରେ ଶ୍ରୀଲଙ୍କାର ସବୁଠାରୁ ସଫଳ ବୋଲର ଭାବେ ୧୩ ଉଇକେଟ ଅକ୍ତିଆର କରିଥିଲେ। ମାଲିଙ୍ଗା ୨୦୧୧ରେ ଟେଷ୍ଟ କ୍ରିକେଟରୁ ଅବସର ନେଇଥିଲେ। କିନ୍ତୁ ଏହାପରଠାରୁ ସେ ଅନ୍ୟ ଫର୍ମାଟ ପାଇଁ ଉପଲବ୍ଧ ଥିଲେ।
