ଶ୍ରୀନଗର,୨୮।୧୨: ଜମ୍ମୁ-କଶ୍ମୀରର ଭାରତ-ପାକିସ୍ତାନ ନିୟନ୍ତ୍ରଣ ରେଖାରେ ଅସ୍ତ୍ରବିରତି ଉଲ୍ଲଂଘନ ଯୋଗୁ ଉତ୍ତେଜନା ବଢ଼ିବାରେ ଲାଗିଛି। ଚଳିତ ବର୍ଷ ବର୍ତ୍ତମାନ ସୁଦ୍ଧା ପାକିସ୍ତାନ ୨୦୦୩ ଚୁକ୍ତିର ଅବମାନନା କରି ୩୨ ଶହ ଥରରୁ ଅଧିକ ଅସ୍ତ୍ରବିରତି ଉଲ୍ଲଂଘନ କରିଛି। ଅନୁଚ୍ଛେଦ ୩୭୦ ଉଚ୍ଛେଦ ପରେ ଏଭଳି ଘଟଣାରେ ୨ ଗୁଣା ବୃଦ୍ଧି ହୋଇଛି। ଚଳିତ ଶୀତଋତୁରେ ପାକିସ୍ତାନ ପକ୍ଷରୁ ୭୭୮ କିମି ଦୀର୍ଘ ନିୟନ୍ତ୍ରଣ ରେଖାରେ ଏଭଳି ଘଟଣା ବଢ଼ିବାର ଆଶଙ୍କା ରହିଛି। ଏପରି କରି ଭାରତରେ ଆତଙ୍କବାଦୀଙ୍କୁ ଅନୁପ୍ରବେଶ କରାଇବା ପାକିସ୍ତାନର ମୁଖ୍ୟ ଲକ୍ଷ୍ୟ ବୋଲି ଭାରତୀୟ ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଛି। ଗତ ୫ ମାସ ମଧ୍ୟରେ ୧୬ ଶହ ଥର ଅସ୍ତ୍ରବିରତି ଉଲ୍ଲଂଘନ ହୋଇଛି। ସେଥିମଧ୍ୟରୁ ଅଗଷ୍ଟରେ ୩୦୭ ଥର, ସେପ୍ଟେମ୍ବରରେ ୨୯୨, ଅକ୍ଟୋବରରେ ୩୫୧, ନଭେମ୍ବରରେ ୩୦୪ ଏବଂ ଡିସେମ୍ବରରେ ବର୍ତ୍ତମାନ ସୁଦ୍ଧା ୩ ଶହରୁ ଅଧିକ ଥର ଅସ୍ତ୍ରବିରତି ଉଲ୍ଲଂଘନ ହୋଇଛି। ଏଥିରେ ୪୧ ଯବାନ ଶହୀଦ୍ ହୋଇଥିବାବେଳେ ୧୫୮ ଜଣ ଆତଙ୍କବାଦୀଙ୍କ ମୃତ୍ୟୁ ଘଟିଛି । ୨୦୧୭ରେ ଏଭଳି ୯୭୧ ଘଟଣା ଘଟିଥିବାବେଳେ ୨୦୧୮ରେ ୧,୬୨୯ ଥର ଅସ୍ତ୍ରବିରତି ଉଲ୍ଲଂଘନ ହୋଇଛି।
