ପୋଲସରା,୯|୩(ଡି.ଏନ.ଏ.) – ଗଞ୍ଜାମ ଜିଲା ପୋଲସରା ସହର ମଧ୍ୟରେ ରହିଥିବା ବସଷ୍ଟାଣ୍ଡର ଆଧୁନିକୀକରଣ ଲାଗି ରାଜ୍ୟ ସରକାର ୫ କୋଟି ଟଙ୍କା ବ୍ୟୟବରାଦ କରିଥିଲେ। ୨୦୧୭ରେ ଓଡ଼ିଶାର ତତ୍କାଳୀନ ଯୋଜନା ଓ ସମନ୍ବୟ, ବୈଷୟିକ ଶିକ୍ଷା ମନ୍ତ୍ରୀ ଉଷା ଦେବୀଙ୍କ ଦ୍ୱାରା ଏହାର ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ଭିତ୍ତିପ୍ରସ୍ତରକୁ ପ୍ରାୟ ୩ ବର୍ଷ ବିତିବାକୁ ବସିଲାଣି ହେଲେ ମାଟି ମୁଠାଏ ମଧ୍ୟ ପଡ଼ିଲାନି। ବସ୍ଷ୍ଟାଣ୍ଡ ନିର୍ମାଣ ଲାଗି କିଛି ଜବରଦଖଲକାରୀ ହୋଟେଲ ଓ ଅନୁକୂଳ ଚନ୍ଦ୍ରଙ୍କ ସତ୍ସଙ୍ଗ କେନ୍ଦ୍ରକୁ ଭଙ୍ଗାଗଲା। ବର୍ତ୍ତମାନ ସୁଦ୍ଧା ଆହୁରି ଜବରଦଖଲ ହୋଇରହିଛି। କିନ୍ତୁ କୌଣସି ନିର୍ମାଣ କାର୍ଯ୍ୟ ଆଗେଇପାରିଲାନି। ପୋଲସରା ବସଷ୍ଟାଣ୍ଡର ସ୍ବଳ୍ପ ଜାଗାରେ ବହୁ ସଂଖ୍ୟାରେ ଅଟୋ, କାର, ବୋଲେରୋ, ମିନିବସ, ଯାତ୍ରୀବାହୀ ବସ ଆଦି ରହିବା ଦ୍ୱାରା ଜାଗା ସଂକୀର୍ଣ୍ଣ ହେବାରେ ଲାଗିଛି। ଏହାକୁ ଆହୁରି ଜଟିଳ କରୁଛି ଠେଲାଗାଡି। ଏନ୍ଏସି ପ୍ରଶାସନ ସେମାନଙ୍କୁ ନା ଉଠାଇ ପାରୁଛି ନା ବସଷ୍ଟାଣ୍ଡ ନିର୍ମାଣ କରିପାରୁଛି। ପୋଲସରା ବସ୍ଷ୍ଟାଣ୍ଡର ସମସ୍ୟା ଦିନକୁ ଦିନ ବଢ଼ିବାରେ ଲାଗୁଛି। ଦୈନନ୍ଦିନ ବୁଗୁଡ଼ା-ଭୁବନେଶ୍ୱର, ସିଂହାସନୀ-ବ୍ରହ୍ମପୁର, ସିଂହାସନୀ-ଭୁବନେଶ୍ୱର, ବୁଗୁଡ଼ା, ବ୍ରହ୍ମପୁର, ପୋଲସରା, ଆସିକା, ଭଞ୍ଜନଗର ଆଦି ଅଞ୍ଚଳକୁ ଶହ ଶହ ବସ୍ ଯାତାୟାତ କରିଥାନ୍ତି। ଏନଏସି ପ୍ରଶାସନର ଯୋଜନା କେବଳ ଯୋଜନାରେ ଅଟକି ରହିଯାଉଛି ବୋଲି ମା’ ସିଂହାସନୀ ଘରୋଇ ବସ୍ ମାଲିକ ସଂଘର କର୍ମକର୍ତ୍ତାମାନେ କହିଛନ୍ତି। ଏ ନେଇ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ପ୍ରଶନ୍ନ ଦାସ କୁହନ୍ତି ଟେକ୍ନିକାଲ ଆପ୍ରୁଭାଲ ସରିଛି, ଟଙ୍କା ପାଇଁ ଗୃହ ଓ ନଗର ଉନ୍ନୟନ ବିଭାଗ ପାଖକୁ ପଠାଯାଇଛି ଟଙ୍କା ଆସିଲେ କାମ ହେବ।
