ଢେଙ୍କାନାଳ ଅଫିସ, ୧।୫ – କରୋନା ସଙ୍କଟ ସମୟରେ ଢେଙ୍କାନାଳ ଜିଲାରେ ରାଶନ ସାମଗ୍ରୀ ବଣ୍ଟନରେ ବ୍ୟାପକ ଅବ୍ୟବସ୍ଥା ହେଉଥିବା ଭାଜପା ପକ୍ଷରୁ ଅଭିଯୋଗ କରାଯାଇଛି। ଗରିବ, ଅସହାୟ ଏବଂ ଅଙ୍ଗନଓ୍ବାଡି ଶିଶୁଙ୍କ ପାଇଁ ଆସିଥିବା ଅତ୍ୟାବଶ୍ୟକ ସାମଗ୍ରୀର ବାଟମାରଣା କରାଯାଉଥିବା ଦଳୀୟ କର୍ମକର୍ତ୍ତା କହିଛନ୍ତି। ଏ ନେଇ ଭାଜପାର ଏକ ୪ଜଣିଆ ପ୍ରତିନିଧିମଣ୍ଡଳୀ ଗୁରୁବାର ପୂର୍ବାହ୍ନରେ ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ସହ ଆଲୋଚନା କରିଛନ୍ତି।
ଆସନ୍ତା ମେ’ ୩ରେ ଲକ୍ଡାଉନ୍ ଅବଧି ଶେଷ ହେଉଛି। ଏହାପରେ ରାଜ୍ୟ ସରକାରଙ୍କ ନିଷ୍ପତ୍ତି ଅନୁଯାୟୀ ନିୟମ ବଦଳିବା ସମ୍ଭାବନା ରହିଛି। ଏହାକୁ ନେଇ ଅନେକ ସମସ୍ୟା ଉପୁଜିବା ଆଶଙ୍କା ଦେଖାଦେଇଛି। ଏଥିଲାଗି ପ୍ରଶାସନ ପକ୍ଷରୁ ଗ୍ରହଣ କରାଯାଇଥିବା ପ୍ରସ୍ତୁତି ସମ୍ପର୍କରେ ପ୍ରତିନିଧିମଣ୍ଡଳୀ ବିସ୍ତୃତ ଭାବେ ଆଲୋଚନା କରିଥିଲେ। ଜିଲାର କେତେକ ସ୍ଥାନରେ ଗରିବ ଜନସାଧାରଣ ଓ ଅଙ୍ଗନଓ୍ବାଡି ଶିଶୁଙ୍କୁ ଡାଲି, ଚାଉଳ, ରାଶନ ସାମଗ୍ରୀ ଧାର୍ଯ୍ୟ ପରିମାଣରୁ କମ୍ ଦିଆଯାଉଛି। ବଣ୍ଟନ ବ୍ୟବସ୍ଥାକୁ ବ୍ୟବସ୍ଥିତ କରିବା ଏବଂ ଖିଲାପକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଜିଲାପାଳଙ୍କୁ ନିବେଦନ କରିଛନ୍ତି। ସେହିପରି ଲକ୍ଡାଉନ୍ ଯୋଗୁ ଫସି ରହିଥିବା ପ୍ରବାସୀ ଜିଲାକୁ ଆସିବେ। ସେମାନେ କ୍ୱାରାଣ୍ଟାଇନ୍ରେ ରହିବା ବାଧ୍ୟତାମୂଳକ କରାଯାଇଛି। ତେଣୁ ଉଚିତ ସଙ୍ଗରୋଧ ବ୍ୟବସ୍ଥା ଉପରେ ଗୁରୁତ୍ୱ ଦେବା, ମହିଳା ଏବଂ ପୁରୁଷଙ୍କ ପାଇଁ ପୃଥକ୍ କ୍ୱାରାଣ୍ଟାଇନ ଗୃହ, ଶୌଚାଳୟ, ଜଳ, ବିଦ୍ୟୁତ୍ ଯୋଗାଣ ସହ କଡ଼ା ସୁରକ୍ଷା ବ୍ୟବସ୍ଥା କରିବା ପାଇଁ ଜିଲାପାଳଙ୍କୁ ଅନୁରୋଧ କରାଯାଇଛି। କରୋନା ଲଢ଼େଇରେ ଜିଲା ପ୍ରଶାସନ, ପୋଲିସ ପକ୍ଷରୁ ନିଆଯାଇଥିବା ପଦକ୍ଷେପ ପ୍ରଶଂସନୀୟ। ଏଥିରେ ଦଳୀୟ କର୍ମକର୍ତ୍ତା ସମସ୍ତ ପ୍ରକାର ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦିଆଯାଇଛି। ଜିଲା ସଭାପତି ନରେଶ ଚନ୍ଦ୍ର ମହାପାତ୍ର, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର, ଜିଲା ଉପସଭାପତି ନବକିଶୋର ଗୁରୁ, ସମ୍ପାଦକ ମାତୃପ୍ରସାଦ ନନ୍ଦ ଆଲୋଚନାରେ ଭାଗ ନେଇଥିଲେ।
