ନୂଆଦିଲ୍ଲୀ,୨୬-୮: ଭାରତୀୟ ଅଟୋ ଉଦ୍ୟୋଗ ଏବେ ଅନେକ ପ୍ରକାର ସଙ୍କଟର ସାମ୍ନା କରୁଛି। ମାନ୍ଦାବସ୍ଥାର ପ୍ରଭାବ ଏଭଳି ଛାଇ ଯାଇଛି ଯେ, ଅଟୋ ସେକ୍ଟରରେ ପ୍ରାୟ ସାଢ଼େ ୩ ଲକ୍ଷ କର୍ମଚାରୀଙ୍କୁ ଛଟେଇ କରାଯାଇସାରିଛି। ଆହୁରି ବହୁ କର୍ମଚାରୀ ବେକାର ହୋଇଯିବାର ଦ୍ୱାରଦେଶରେ ରହିଛନ୍ତି। ତେବେ ଅଟୋ ଉଦ୍ୟୋଗରେ ଦେଖାଦେଇଥିବା ମାନ୍ଦାବସ୍ଥାର ପ୍ରଭାବ ଏବେ ପାର୍ଟସ ନିର୍ମାତାଙ୍କ ଉପରେ ଦେଖାଯାଇଛି। ପ୍ରାୟ ୪୦୦ ଛୋଟ ବଡ଼ ପାଟର୍ସ ନିର୍ମାତା କମ୍ପାନୀ ଚଳିତବର୍ଷ ୧୦ ହଜାର କୋଟି ଟଙ୍କା କ୍ଷତି ସହିବାକୁ ଯାଉଛନ୍ତି।
ଆସୋସିଏଶନ ଅଫ୍ ଇଣ୍ଡିଆ ଫୋର୍ଜିଙ୍ଗ୍ ଇଣ୍ଡଷ୍ଟ୍ରି(ଏଆଇଏଫ୍ଆଇ) ପକ୍ଷରୁ ତଥ୍ୟ ପ୍ରଦାନ କରି ଜଣେ ବରିଷ୍ଠ ସଦସ୍ୟ କହିଛନ୍ତି ଯେ, ଅଟୋ ଉଦ୍ୟୋଗରେ ଆସିଥିବା ଧିମା ସ୍ଥିତିର ପ୍ରଭାବ ଏବେ ୪୦୦ କମ୍ପାନୀଙ୍କ ଉପରେ ପଡିଛି। ସେମାନଙ୍କ ମଧ୍ୟରେ ୧୮୦ରୁ ୨୦୦ ପାଟର୍ସ ଉତ୍ପାଦନକାରୀ, ୮୩% ଛୋଟ,୯% ମଧ୍ୟମ ଓ ଅବଶିଷ୍ଟ ବଡ଼ ଉଦ୍ୟୋଗ ରହିଛି। ମାନ୍ଦାବସ୍ଥାର ପ୍ରଭାବରେ ସବୁଠାରୁ ଅଧିକ କ୍ଷତି ସହୁଛନ୍ତି ଲଘୁ ଉଦ୍ୟୋଗ। ଆର୍ଥିକ ବର୍ଷ ୨୦୧୮-୧୯ରେ ଉତ୍ପାଦନ କାରଣରୁ ଫୋଜିଙ୍ଗ୍ ଉଦ୍ୟୋଗ ପ୍ରାୟ ୫୦ ହଜାର କୋଟି ଟଙ୍କାର ରାଜସ୍ବ ହାସଲ କରିଥିଲେ। କିନ୍ତୁ ଚଳିତବର୍ଷ ପ୍ରାୟ ୯ରୁ ୧୦ ହଜାର କୋଟି ଟଙ୍କା କ୍ଷତି ସହିବାକୁ ପଡିବ। ଗାଡ଼ି ବିକ୍ରି କମିବା କାରଣରୁ କ୍ଷୁଦ୍ର ଉଦ୍ୟୋଗଗୁଡ଼ିକ ସବୁଠାରୁ ଅଧିକ ପ୍ରଭାବିତ ହୋଇଛନ୍ତି। ତୁଳନାମତ୍କ ରୂପରେ ଦେଖିଲେ ମଧ୍ୟମ ଓ ବଡ଼ ଫୋର୍ଜିଙ୍ଗ୍ ଉଦ୍ୟୋଗ ମୁକାବିଲା ଛୋଟ କମ୍ପାନୀ ଅଧିକ କ୍ଷତି ସହିବେ। ଉଦ୍ୟୋଗ କାର୍ଯ୍ୟକଳାପ ଅଟକି ଯିବାକୁ ପ୍ରତିକୂଳ ପ୍ରଭାବ କୁହାଯାଇଥାଏ। ଏହି ସମୟରେ ପାଣ୍ଠି ପ୍ରବାହକୁ ରୋକି ଦିଆଯାଏ ଅଥବା ନଗଦ ପ୍ରବାହ ଦୟନୀୟ ସ୍ଥିତିରେ ରହିଥାଏ। ବର୍ତ୍ତମାନ ଅଟୋ ସେକ୍ଟର ବିଏସ୍-୪ରୁ ବିଏସ୍-୬କୁ ପରିବର୍ତ୍ତିତ ହେବାକୁ ଯାଉଥିବା କାରଣରୁ ସଙ୍କଟ ସୃଷ୍ଟି ହୋଇଛି। ବିଏସ୍-୬ ଅପେକ୍ଷାରେ କାର୍ ବିକ୍ରି ଧିମା ହୋଇଗଲାଣି। ଅଟୋ ସେକ୍ଟରରେ ବିକ୍ରି କମିଯିବା କାରଣରୁ ଛୋଟ ଉଦ୍ୟୋଗରେ ହୋଇଥିବା ଉତ୍ପାଦିତ ସାମଗ୍ରୀ ଏବେ ଜମାହେବାରେ ଲାଗିଛି। ଅଟୋ ପାଟର୍ସ ବିକ୍ରି ନ ହେବା କାରଣରୁ ଛୋଟ ଉଦ୍ୟୋଗଗୁଡ଼ିକୁ କ୍ଷତି ସହିବାକୁ ପଡ଼ୁଛି। କଞ୍ଚା ମାଲ୍ ରହିଯିବା କାରଣରୁ ପାଟର୍ସ ତିଆରି କରୁଥିବା କମ୍ପାନୀଗୁଡ଼ିକ ଦର ହ୍ରାସ କରିବାକୁ ବାଧ୍ୟ ହେବେ। ଯାହାର ଫଳସ୍ବରୂପ ଲଘୁ ଉଦ୍ୟୋଗରେ କାମ କରୁଥିବା ଲକ୍ଷ ଲକ୍ଷ ସଂଖ୍ୟାରେ କର୍ମଚାରୀ ନିଯୁକ୍ତି ହରାଇବେ।
