ଚଣ୍ଡିଗଡ଼,୧୩ା୪(ପି.ଟି.): କରୋନା ସଂକ୍ରମଣକୁ ପ୍ରତିହତ କରିବା ପାଇଁ ସାରା ଦେଶରେ ଲକ୍ଡାଉନ ଘୋଷଣା କରାଯାଇଛି। ଏହି ସମୟରେ ସାଧାରଣ ଯାତାୟାତ ଉପରେ କଟକଣା ଜାରି ହୋଇଛି। ଜରୁରୀ କାର୍ଯ୍ୟ ଥିଲେ ଅନୁମତି ପତ୍ର କିମ୍ବା ପାସ୍ ଦେଖାଇ ଛଡ଼ାଯାଉଛି। ଏଭଳି ସ୍ଥିତିରେ ପାସ୍ ଦେଖାଇବା ପାଇଁ ଗାଡ଼ି ଅଟକାଇବାରୁ ଶିଖ୍ ସମ୍ପ୍ରଦାୟର କେତେଜଣ ଲୋକ ପୋଲିସ ଉପରେ ଆକ୍ରମଣ କରିଛନ୍ତି। ସେମାନେ ଖଣ୍ଡାରେ ଜଣେ ଏଏସ୍ଆଇଙ୍କ ହାତ କାଟି ଅଲଗା କରିଦେବା ସହ ଅନ୍ୟ ଦୁଇଜଣଙ୍କୁ ଆହତ କରିଛନ୍ତି। ପଞ୍ଜାବ ପଟିଆଲା ଜିଲାର ସନଉର୍ ସହରରେ ଥିବା ଏକ ପରିବା ବଜାରରେ ରବିବାର ସକାଳେ ଏହି ଆକ୍ରମଣ ହୋଇଛି।
ଖସି ପଳାଇଯାଇ ଏକ ଗୁରୁଦ୍ୱାରାରେ ଆଶ୍ରୟ ନେଇଥିବା ଆକ୍ରମଣକାରୀଙ୍କ ସହ ପୋଲିସର ଗୁଳି ବିନିମୟ ହୋଇଥିଲା। ପୋଲିସ ୫ ଆକ୍ରମଣକାରୀଙ୍କ ସମେତ ୮ ଜଣଙ୍କୁ ଗୁରୁଦ୍ୱାରା ଭିତରୁ ଗିରଫ କରିଛି। ସୋସିଆଲ ମିଡିଆରେ ପ୍ରସାରିତ ଭିଡିଓରେ ଏଏସ୍ଆଇ ହର୍ଜିତ ସିଂ ସହାୟତା ପାଇଁ ଚିତ୍କାର କରୁଥିବାବେଳେ ଜଣେ ଲୋକ କଟାହାତ ତାଙ୍କୁ ଦେଉଥିବା ଦେଖାଯାଇଛି। ପରେ ଏଏସ୍ଆଇଙ୍କୁ ମୋଟର ସାଇକେଲରେ ନେଇ ନିକଟସ୍ଥ ରାଜୀନ୍ଦ୍ର ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରୁ ତାଙ୍କୁ ଚଣ୍ଡିଗଡ଼ସ୍ଥିତ ପିଜିଆଇଏମ୍ଇଆର୍କୁ ନିଆଯାଇ ଅସ୍ତ୍ରୋପଚାର କରାଯାଇଛି।
ପଟିଆଲାର ଉକ୍ତ ଅଞ୍ଚଳରେ ଲକ୍ଡାଉନ କଟକଣା କଡ଼ାକଡ଼ି ପାଳନ ହେଉଥିବାବେଳେ ଏକ ଏସ୍ୟୁଭିରେ ଆସିଥିବା ଶିଖ୍ (ନିହାଙ୍ଗ) ସମ୍ପ୍ରଦାୟର କିଛି ଲୋକଙ୍କୁ ପୋଲିସ ଅଟକାଇ କର୍ଫ୍ୟୁ ପାସ୍ ଦେଖାଇବାକୁ କହିଥିଲା। ସେମାନେ ଗାଡ଼ିକୁ ବାରିକେଡ୍ରେ ମାଡ଼ କରିବା ସହ ପୋଲିସ ଉପରେ ଆକ୍ରମଣ କରିଦେଇଥିଲେ। ଆକ୍ରମଣ କରିସାରିବା ପରେ ସେମାନେ ସେଠାରୁ ୨୫ କିଲୋମିଟର ଦୂର ବାଲବେରା ଗ୍ରାମରେ ଥିବା ଗୁରୁଦ୍ୱାରା ଖିଚରି ସାହିବକୁ ପଳାଇଥିଲେ। ଆଇଜି ଯତୀନ୍ଦ୍ର ସିଂ ଔଲାଖଙ୍କ ନେତୃତ୍ୱରେ ପୋଲିସ ଟିମ୍ ଉକ୍ତ ଗୁରୁଦ୍ୱାରାକୁ ଚାରିପଟୁ ଘେରିନେଇ ଚଢ଼ାଉ ଆରମ୍ଭ କରିଥିଲା। ଆକ୍ରମଣକାରୀଙ୍କଠାରୁ ୩ ପିସ୍ତଲ, ପେଟ୍ରୋଲ ବୋମା, ଖଣ୍ଡା, ଏଲ୍ପିଜି ସିଲିଣ୍ଡର ଆଦି ଜବତ ହୋଇଛି।
ଡ୍ୟୁଟିରେ ଥିବା ପୋଲିସ ଅଧିକାରୀଙ୍କ ହାତ ହାଣିଦେଇଥିବା ଶିଖ୍ ସଦସ୍ୟମାନଙ୍କ ବିରୋଧରେ ଦୃଷ୍ଟାନ୍ତମୂଳକ ଦଣ୍ଡବିଧାନ ପାଇଁ କେନ୍ଦ୍ରମନ୍ତ୍ରୀ ହରଦୀପ ସିଂ ପୁରୀ ଦାବି କରିଛନ୍ତି। ଏଭଳି ଅମାନବୀୟ ଆକ୍ରମଣ ଘଟଣାକୁ ପୁରୀ ତୀବ୍ର ନିନ୍ଦା କରିଛନ୍ତି। ତୁରନ୍ତ ସେମାନଙ୍କୁ ଆଇନର କାଠଗଡ଼ା ମଧ୍ୟକୁ ନେଇ ଦଣ୍ଡବିଧାନ କରାଯିବା ଉଚିତ ବୋଲି କେନ୍ଦ୍ର ସହରାଞ୍ଚଳ ବ୍ୟାପାର ମନ୍ତ୍ରୀ କହିଛନ୍ତି। ଏଭଳି ଆକ୍ରମଣ ଦୁର୍ଭାଗ୍ୟଜନକ ବୋଲି ପଞ୍ଜାବ ପୋଲିସ ମହାନିର୍ଦ୍ଦେଶକ ଦିନ୍କର ଗୁପ୍ତା କହିଛନ୍ତି।
