ଢେଙ୍କାନାଳ ଅଫିସ, ୮।୯ – ସାରା ରାଜ୍ୟରେ ଲାଗୁ ହୋଇଛି ସଂଶୋଧିତ ମୋଟର ଯାନ ଆଇନ। ନିୟମ ଉଲ୍ଲଂଘନକାରୀଙ୍କଠାରୁ ମୋଟା ରକମର ଜରିମାନା ଆଦାୟ କରାଯାଉଛି। ଏହାକୁ ନେଇ ବିଭିନ୍ନ ସ୍ଥାନରେ ଅପ୍ରୀତିମୂଳକ ପରିସ୍ଥିତି ସୃଷ୍ଟି ହେଉଛି। ହେଲେ ଢେଙ୍କାନାଳ ଜିଲାରେ ସ୍ଥାନ, କାଳ ଦେଖି ବଦଳୁଛି ନିୟମ। ବାଇକ୍ ଆରୋହୀ, ଜନସାଧାରଣ, କଲେଜ ଛାତ୍ରୀଛାତ୍ରଙ୍କ ପାଇଁ କଡ଼ାକଡ଼ି କରାଯାଉଥିବାବେଳେ ସରକାରୀ ବାବୁଙ୍କ ପାଇଁ ପୂରା କୋହଳ। ଏପରି ଫୁଲାଫାଙ୍କିଆ ବ୍ୟବସ୍ଥାକୁ ନେଇ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଜିଲାରେ ସରକାରୀ ବାବୁ ଟ୍ରାଫିକ୍ ନିୟମ ମାନୁ ନ ଥିବା ଅଭିଯୋଗ ହେଉଛି। ସେମାନେ ବିନା ହେଲମେଟ୍, ସିଟ୍ବେଲ୍ଟ ବାନ୍ଧି ଗାଡ଼ି ଚଢୁଛନ୍ତି। ଏପରି ବ୍ୟବସ୍ଥା ସମ୍ପର୍କରେ ପ୍ରଶ୍ନ କଲେ ଅଜବ ଉତ୍ତର ମିଳୁଛି। ସରକାରୀ ବାବୁମାନେ ଯାଉଥିବା ଗାଡ଼ିକୁ ଛାଡ଼ିଦେବାକୁ ଉପରୁ ନିର୍ଦ୍ଦେଶ ଥିବା ଟ୍ରାଫିକ ପରିଚାଳନା ଦାୟିତ୍ୱରେ ଥିବା କର୍ମଚାରୀ ଖୋଲାଖୋଲି କହୁଛନ୍ତି, ଯାହାକୁ ନାପସନ୍ଦ କରିଛନ୍ତି ବୁଦ୍ଧିଜୀବୀ।
ଅପରପକ୍ଷେ ସହରର ଟ୍ରାଫିକ୍ ବ୍ୟବସ୍ଥା ପୋଲିସ କର୍ମଚାରୀଙ୍କ ମନମର୍ଜିରେ ଚାଲିଛି। ଏହାର ଏକ ଉଦାହରଣ ଶନିବାର ଦେଖିବାକୁ ମିଳିଛି। ସ୍ଥାନୀୟ ଦକ୍ଷିଣକାଳୀ ରୋଡ୍ସ୍ଥିତ ଏକ ହୋଟେଲ ନିକଟରେ ୱାନ୍ ୱେ ଟ୍ରାଫିକ ବ୍ୟବସ୍ଥା କରାଯାଇଛି। ଯାନବାହନ ଗତି ମନ୍ଥର କରିବାକୁ ସେଠାରେ ସ୍ପିଡ୍ବ୍ରେକର ମଧ୍ୟ ରଖାଯାଇଛି। ଶନିବାର ଅପରାହ୍ନ ସାଢ଼େ ୧ଟାରେ ଉକ୍ତ ରାସ୍ତାରେ ପଛକୁ ପଛ ୨ଟି ସରକାରୀ ଗାଡ଼ି ଆସୁଥିଲା। ଏହା ପଛରେ ଜଣେ ବ୍ୟକ୍ତି ନିଜ କାର୍ ନେଇ ଆସୁଥିଲେ। ସେଠାରେ ଟ୍ରାଫିକ୍ ପରିଚାଳନା ଦାୟିତ୍ୱରେ ଥିବା ଜଣେ କର୍ମଚାରୀ ଉଭୟ ସରକାରୀ ଗାଡ଼ିକୁ ବେନିୟମ ଭାବେ ନୋ ଏଣ୍ଟ୍ରିରେ ଛାଡ଼ି ଦେଇଥିଲେ। ହେଲେ ପଛରେ ଆସୁଥିବା ବ୍ୟକ୍ତିଙ୍କୁ ନିୟମ ଅନୁଯାୟୀ ରାସ୍ତାରେ ଯିବାକୁ ଆଇନ ପାଠ ପଢ଼ାଇଥିଲେ। ସେ ଏହାର ପ୍ରତିବାଦ କରିବାରୁ ପୋଲିସ କର୍ମଚାରୀ ଜଣକ କହିଲେ, ସରକାରୀ ଗାଡ଼ି ଛାଡିଦେବାକୁ ଉପରୁ ନିର୍ଦ୍ଦେଶ ଅଛି। ତେଣୁ ଅନ୍ୟ ଗାଡ଼ିଗୁଡ଼ିକୁ ଧରିବୁ।
ସରକାରୀ କର୍ମଚାରୀଙ୍କୁ ଟ୍ରାଫିକ୍ ନିୟମ ପ୍ରତି ସଚେତନ କରିବାକୁ ଜିଲା ସଡ଼କ ସୁରକ୍ଷା କମିଟି ବୈଠକରେ ନିଷ୍ପତ୍ତି ହୋଇଥିଲା। ଏ ନେଇ ବିଭିନ୍ନ ବିଭାଗକୁ ଚିଠି ମାଧ୍ୟମରେ ଜଣାଇବାକୁ ନିଷ୍ପତ୍ତି ନିଆଯାଇଥିଲା। ଏହାସତ୍ତ୍ୱେ ସରକାରୀ ବାବୁମାନେ ଏହାକୁ ଖୋଲାଖୋଲି ଉଲ୍ଲଂଘନ କରୁଛନ୍ତି। ଏଥିପ୍ରତି ଏସ୍ପି, ଜିଲାପାଳ ଦୃଷ୍ଟି ଦେବାକୁ ଦାବି ହେଉଛି।
ଏ ସଂକ୍ରାନ୍ତରେ ସଦର ଏସ୍ଡିପିଓ ଶ୍ରୀହର୍ଷ ମିଶ୍ର କୁହନ୍ତି, ଟ୍ରାଫିକ ଆଇନ ସମସ୍ତଙ୍କ ପାଇଁ ସମାନ। ଏଥିରେ ବ୍ୟତିକ୍ରମ କିପରି ହୋଇଛି ସେ ନେଇ ପଚାରି ବୁଝିବା ପରେ ହିଁ କହିହେବ ବୋଲି ସେ କହିଥିଲେ।
