କୋମନା, ୧୪।୩ (ଡି.ଏନ୍.ଏ.)-
ରାଏଜ୍ ସରକାର ଅସାହା, ଗରିବ ଦୁଖି, ଭିନ୍ନକ୍ଷମମାନକୁ ଭିନେ ଭିନେ ଯୋଜନାରେ ସୁବିଧା ସୁଯୋଗ ଯୁଗେଇ ଦେଉଛନ୍। ହେଲେ ସରକାରୀ ଅଧ୍କାରୀ, କରମ୍ଚାରୀକଁର ଖାମ୍ଖିଆଲି ମନଭାବ ଲାଗି ଅନେକ ଜାଗାରେ ହକ୍ଦାର ହିତାଧିକାରୀ ସରକାରକଁର ଇ ମହତ୍ ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଘଟନା ଦେଖ୍ବାକେ ମିଲିଛେ ନୂଆପଡ଼ା ଜିଲା କୋମନା ବ୍ଲକ ନୂଆଗଁା ପଁଚେତ୍ କାଲିମାଟି ଗଁାରେ।
ସୂଚନା ଅନ୍ସାରେ କାଲିମାଟି ଗଁାର ରଘୁନାଥ ହାତୀ(୬୦)। ପରିବାର କହେଲେ ମାଏକିନା ଲାଲଦେଈ(୫୫), ତିନ୍ ପୁଓ ପୀତାମ୍ବର, କ୍ଷୀରସିନ୍ଧୁ, ଚିତ୍ତରଞ୍ଜନ ଆର ଦୁଇ ଝି’ ଗୋଲାପୀ(୩୨), ଭାଗ୍ୟବତୀ(୧୫)କୁଁ ନେଇ ସଁସାର। ରଘୁନାଥ ଦୁଖ୍ସୁଖ କରି ସବୁ ଝି’ପୁଓକୁଁ ଥାନୀଅ ସ୍କୁଲରେ ପାଠ୍ ପଢ଼ଉଥିଲେ। ହେଲେ ୨୦୦୫-୦୬ ସାଲେ ହଠାତ୍ ବଡ଼ପୁଓ ପୀତାମ୍ବର ଆର ବଡ଼ ଝି’ ଗୋଲାପୀକଁର ଦିହିପା ଖରାପ ହେଲା। ଦୁଇ ଝି’ପୁଓକେ ରଘୁନାଥ ନୂଆପଡ଼ା ଜିଲା ମୁଖିଆ ଡାକ୍ତରଖାନାରେ ଭରତି କରିଥିଲେ। ସେଠାନେ ଡାକ୍ତର ଦିନାକେତେ ଚିକିଛା କଲା ଉତାରୁ କଟକ ବଡ଼ ଡାକ୍ତରଖାନା ନେବାକେ ପରାମଶ ଦେଇଥିଲେ। କଟକ ବଡ଼ ଡାକ୍ତରଖାନାରେ ରଘୁନାଥ ଝି’ପୁଓକେ ରଖି ୨୩ ଦିନ ଧରି ଚିକିଛା କରେଇଥିଲେ। ହେଲେ ତାକର ଦିହିପାରେ କିଛି ଫରକ୍ ନାଇଁ ପଡ଼ଲା। ଇଆଡ଼େ ଟଁକା ପଏସା ଅଭାବୁ ରଘୁନାଥ ଝି’ପୁଓକେ ଧରି ଘରକେ ଫିରି ଆଏଲେ। ସେଦିନ୍ଠାନୁ ଦୁଇ ଝି’ପୁଓ ଚିକିଛା ଅଭାବୁ ଘରେ ଭିନ୍ନକ୍ଷମ ଜୀବନ୍ ବିତଉଛନ୍। ଇଆଡ଼େ ଉନିଅଁା ଦୁଇ ପୁଓକଁରନେ ବି ଏନ୍ତା ସବୁ ଲକ୍ଷନ ଦେଖା ଦେଉଥିବାରକେ ନେଇ ରଘୁନାଥ ଭାଂଗି ପଡ଼ିଛନ୍। ପୀତାମ୍ବର ଆର ଗୋଲାପୀକଁର ଚିକିଛା ଲାଗି ଲକ୍ଷାଧିକ୍ ଟଁକା ଦରକାର ପଡ଼ୁଥିଲାବେଲେ ରଘୁନାଥ ମୁଖ୍ୟମନ୍ତ୍ରୀ, ପ୍ରଧାନମନ୍ତ୍ରୀକୁଁ ଚିଠି ଲେଖି ସାହାଯ୍ ଆଶ୍ରେ ରହିଛନ୍। ଇଆଡ଼େ ମା’ବାପ୍ ଦୁଇ ଭିନ୍ନକ୍ଷମ ଝି’ପୁଓର ସେବାଯତନ ଲାଗି କାହିଁ ଯାଇଆସି ନାଇଁପାରବାର। ଏନ୍ତା କି ରଘୁନାଥ ନିଜର ୩ ଏକର ଜମିକେ ଚାଷ କରି ନାଇଁପାରବାର। ଦୁଇ ଦିବ୍ୟାଙ୍ଗ ଭାଇବହେନ୍ ମାସିକ ୫ଶହ ଟଁକା ଲେଖେଁ ଭତା ପାଉଥିଲାବେଲେ ବାକି ସବୁ ପରକାର ସରକାରୀ ସୁବିଧାରୁ ବଁଚିତ୍ ହେଇ ରହିଛନ୍। ୨୦୧୪ ସାଲେ ରଘୁନାଥ ୭୫ ହଜାର ଟଁକାର ଗୁଟେ ଇନ୍ଦିରା ଆବାସ ଘର ପାଇଥିଲେ। ହେଲେ ଟଁକା ପଏସା ଅଭାବୁ ଏହେଦେ ବି ଘରଟା ଦରଖଁଡ଼ିଆ ହେଇ ପଡ଼ିଛେ। ଏନ୍ତାଥି ଉପେ ଶୂଇନ୍ ମା’ବାପ୍ ଗଣମାଧ୍ୟମ ଜରିଆରେ ଝି’ପୁଓକେ ଚିକିଛା ସାହାଯ୍ ସଂଗେ ସବୁ ପରକାର ସରକାରୀ ସୁବିଧା ଯୁଗେଇ ଦେବାକେ ଜିଲା ପରଶାସନକେ ଗୁହାରି କରିଛନ୍। ଇ ବାବ୍ଦେ କୋମନା ବିଡିଓ ଶ୍ୟାମଳ କୁମାର ରୟକୁଁ ପଚ୍ରାଲାରୁ ମୁଇଁ ୬ ମାସ ଭିତରେ ଦୁଇ ଥର କାଳିମାଟି ଗଁାକେ ଯାଇଛେଁ। ଇ ଭାଇବହେନ୍ର ସମସିଆ ପଚାରି ବୁଝିଛେଁ। ସେମାନକୁ ସରକାରୀ ସୁବିଧା ସୁଯୋଗ ଦେବାର ଦିଗେ ପଦକ୍ଷେପ ନିଆଯାଉଛେ ବଲି ସେ କହିଥିଲେ।
