ବାରିପଦା ଅଫିସ,୨ା୧୨:ମୟୂରଭଞ୍ଜ ଜିଲା କୁଳିଅଣା ବ୍ଲକ ଅଞ୍ଚଳରୁ ଉଦ୍ଧାର ହୋଇଥିବା ଏକ ବିରାଟକାୟ ଅଜଗରକୁ ଧରି ସାପ ଧରାଳି ବଜାର ବୁଲିବା ଘଟଣା ଚର୍ଚ୍ଚାର ବିଷୟ ହୋଇଛି। ବିଲୁପ୍ତ ପ୍ରାୟ ପ୍ରାଣୀ ଉଦ୍ଧାର ନିୟମର ଉଲ୍ଲଂଘନ କରି ଜନଗହଳିପୂର୍ଣ୍ଣ ଅଞ୍ଚଳରେ ପ୍ରଦର୍ଶନ କରିବା ଘଟଣାକୁ ବିଭିନ୍ନ ମହଲରେ ସମାଲୋଚନା କରାଯାଇଛି। ଏନେଇ ସାଧାରଣରେ ପ୍ରତିକ୍ରିୟା ପ୍ରକାଶ ପାଇବା ସହ କାର୍ଯ୍ୟାନୁଷ୍ଠାନ ଦାବି କରାଯାଇଛି।
ସୂଚନାଯୋଗ୍ୟ, ଦେଉଳି ରେଞ୍ଜ ଅଧୀନ କୁଳିଅଣା ଥାନା ସରପଙ୍ଖା ଗ୍ରାମର ନେତ୍ରା ନାଏକ ବୁଢ଼ାବଳଙ୍ଗ ନଦୀରେ ମାଛ ଧରିବା ପାଇଁ ଜାଲ ବିଛାଇଥିଲେ। ଗୁରୁବାର ସକାଳେ ଜାଲରେ ଏକ ବିରାଟ ଅଜଗର ଲାଗିଥିବା ଦେଖି ସେ ଗ୍ରାମବାସୀଙ୍କୁ ଜଣାଇଥିଲେ। ଅଜଗରକୁ ଉଦ୍ଧାର କରିବା ପାଇଁ ଭଞ୍ଜପୁରସ୍ଥିତ ଜଣେ ସାପ ଧରାଳୀଙ୍କୁ ଖବର ଦିଆଯାଇଥିଲା। ସାପ ଧରାଳି ପରିବାରର ମା’, ବାପା ଓ ଝିଅ ମିଶି ଅଜଗରକୁ ଉଦ୍ଧାର କରିଥିଲେ। ପରେ ସେମାନେ କୁଳିଅଣା ବଜାରରେ ଦୀର୍ଘ ସମୟ ଧରି ଅଟକି ରହିବା ସହ ବାଇକ୍ରେ ସାପ ଧରି ଜନଗହଳିପୂର୍ଣ୍ଣ ଅଞ୍ଚଳରେ ପହଞ୍ଚତ୍ ସାପ ଦେଖାଇଥିଲେ। ବାଇକ୍ରେ ସାପକୁ ଧରି ବାଟରେ ଯାଉଥିବା ବେଳେ ଲୋକେ ମୋବାଇଲରେ ଫଟୋ ଓ ଭିଡିଓ ଉତ୍ତୋଳନ କରିଥିଲେ। ସହରର ଭଞ୍ଜପୁର, ସତ୍ୟସାଇ ଛକ ଓ ବଜାର ମଧ୍ୟରେ ସାପକୁ ଦେଖାଇ ସେମାନେ ପ୍ରଶଂସା ସାଉଁଟିବାକୁ ଉଦ୍ୟମ କରିଥିଲେ।
ତେବେ ବିଲୁପ୍ତପ୍ରାୟ ବା ସିଡ୍ୟୁଲ୍ଡ-୧ ପ୍ରଜାତିର ପ୍ରାଣୀ ମଧ୍ୟରେ ବାଘ, ହାତୀ, ଅଜଗର ଆଦି ରହୁଥିବାରୁ ସେମାନଙ୍କୁ ସ୍ଥାନୀୟ ରେଞ୍ଜ୍ ଅଫିସ୍ର କର୍ମଚାରୀଙ୍କ ଉପସ୍ଥିତିରେ ଉଦ୍ଧାର କରିବାର ନିୟମ ରହିଛି। କୁଳିଅଣା ବଜାରଠାରୁ ୫୦୦ ମିଟର ଦୂରରେ ଥିବା ରେଞ୍ଜ ଅଫିସରଙ୍କ ସହ ଯୋଗାଯୋଗ ନ କରି କିପରି ସାପ ଉଦ୍ଧାର କରାଗଲା ତାହା ସମସ୍ତଙ୍କୁ ଚକିତ କରିଛି। ଉଦ୍ଧାର ପରେ ସାପକୁ ନେବା ପାଇଁ କୌଣସି ବ୍ୟାଗ କିମ୍ବା ଥଳି ବ୍ୟବହାର ନ କରି ଖୁଲମଖୁଲା ଧରି ବଜାର ବୁଲିବା ଘଟଣାକୁ ନେଇ ବନ୍ୟପ୍ରାଣୀ ପ୍ରେମୀ ବିରୋଧ କରିଛନ୍ତି ା ଏ ସମ୍ପର୍କରେ ପ୍ରାକ୍ତନ ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଭାନୁମିତ୍ର ଆଚାର୍ଯ୍ୟ କୁହନ୍ତି, ଘଟଣା ନଜରକୁ ଆସିବା ପରେ ଅଜଗର ଭଳି ବିରଳପ୍ରାୟ ପ୍ରଜାତିର ଜୀବକୁ ସୁରକ୍ଷା ଦେବାକୁ ବିଭାଗ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ଆବଶ୍ୟକ ରହିଛି। ସାପ ଧରାଳି ତାଙ୍କ ପ୍ରତିକ୍ରିୟାରେ କହିଛନ୍ତି, ସ୍ନେକ ରେସ୍କ୍ୟୁ କ୍ଲବର ସଦସ୍ୟ ଭାବେ ରହି ସାପ ଧରିବା ସହ ଆମେ ଜଙ୍ଗଲରେ ଛାଡ଼ିଥାଉ ା ଉଦ୍ଧାର ପରେ ଅଜଗରକୁ ବନ ବିଭାଗକୁ ହସ୍ତାନ୍ତର କରିବାକୁ ଯାଉଥିଲୁ। ମାତ୍ର ବାଟରେ ଲୋକେ ଫଟୋ, ଭିଡିଓ ଉତ୍ତୋଳନ କରିଥିଲେ। ଏ ସଂକ୍ରାନ୍ତରେ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଟି.ଅଶୋକ କୁମାରଙ୍କୁ ପଚାରିବାରୁ ଏ ସମ୍ପର୍କରେ କୌଣସି ସୂଚନା ମିଳିନାହିଁ ଓ ଏଭଳି ଘଟଣାରେ ଜଡିତ ଥିବା ପରିବାର ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି। ଉଲ୍ଲେଖଯୋଗ୍ୟ, ଉଦ୍ଧାର ଅଜଗରଟି ୨ ବର୍ଷର ହୋଇଥିବା ବେଳେ ଏହାର ଲମ୍ବ ୧୧ ଫୁଟ ଏବଂ ଓଜନ ପ୍ରାୟ ୧୭ କେଜି ହେବ ବୋଲି ସୂଚନା ମିଳିଛି।
