ଭୁବନେଶ୍ୱର,୨୪।୯(ବ୍ୟୁରୋ): ଚାକିରିରେ ଯୋଗ ଦେବାର ୭ ବର୍ଷ ମଧ୍ୟରେ ଯଦି କୌଣସି ସରକାରୀ କର୍ମଚାରୀଙ୍କର ମୃତ୍ୟୁ ହୁଏ ତେବେ ତାଙ୍କର ନିକଟ ସମ୍ପର୍କୀୟଙ୍କୁ ଶେଷ ଦରମାର ବର୍ଦ୍ଧିତ ୫୦ ପ୍ରତିଶତ ହାରରେ ୧୦ ବର୍ଷ ପର୍ଯ୍ୟନ୍ତ ପାରିବାରିକ ପେନସନ ଆକାରରେ ପ୍ରଦାନ କରାଯିବ। ଏ ନେଇ କେନ୍ଦ୍ର ସରକାର କେନ୍ଦ୍ରୀୟ ପ୍ରଶାସନିକ ସେବା(ପେନସନ) ନିୟମାବଳୀ-୧୯୭୨ର ସେକ୍ସନ ୫୪ରେ ପରିବର୍ତ୍ତନ କରିଛନ୍ତି।
ପେନସନ ରୁଲ୍ ଅନୁଯାୟୀ କର୍ମଚାରୀ ୭ ବର୍ଷ ପୂରଣ କରିଥିଲେ ତାଙ୍କ ନିକଟ ସମ୍ପର୍କୀୟଙ୍କୁ ଶେଷ ଦରମାର ୫୦ ପ୍ରତିଶତ ୧୦ ବର୍ଷ ପର୍ଯ୍ୟନ୍ତ ଦିଆଯାଇଥାଏ। ଏହା ପରେ ୩୦ ପ୍ରତିଶତ ହାରରେ ପେନସନ ଦେବାର ବ୍ୟବସ୍ଥା ରହିଛି। ତେବେ ଚାକିରି କରିବାର ୭ ବର୍ଷ ମଧ୍ୟରେ ମୃତ୍ୟୁ ହେଲେ ଶେଷ ଦରମାର ୩୦ ପ୍ରତିଶତ ପାରିବାରିକ ପେନସନ ଆକାରରେ ମଳିଥାଏ। ଏହି ପରିପ୍ରେକ୍ଷୀରେ ମୃତ କର୍ମଚାରୀଙ୍କ ସମ୍ପର୍କୀୟ ବର୍ଦ୍ଧିତ ଶେଷ ଦରମାର ୫୦ ପ୍ରତିଶତ ହାରରେ ପେନସନ ପାଇବାକୁ ଯୋଗ୍ୟ ବିବେଚିତ ହୋଇ ନ ଥାଆନ୍ତି। କେନ୍ଦ୍ର ସରକାର ହୃଦ୍ବୋଧ କରିଛନ୍ତି ଯେ ଜଣେ ବ୍ୟକ୍ତି ଚାକିରି ଆରମ୍ଭରେ କମ୍ ଦରମା ପାଇଥାଆନ୍ତି। ସେଥିପାଇଁ ମୃତ କର୍ମଚାରୀଙ୍କ ପରିବାରକୁ ବର୍ଦ୍ଧିତ ଆକାରରେ ପାରିବାରିକ ପେନସନ ଦେବାର ଆବଶ୍ୟକତା ରହିଛି। ଏହି ନୂତନ ପେନସନ ବ୍ୟବସ୍ଥା ଆସନ୍ତା ଅକ୍ଟୋବର ୧ରୁ ଲାଗୁ କରାଯିବ। ଏହି ତାରିଖର ୧୦ ବର୍ଷ ପୂର୍ବରୁ ଚାକିରିକାଳ ୭ ବର୍ଷ ପୂରଣ କରି ପାରି ନ ଥିବା ମୃତ କର୍ମଚାରୀଙ୍କ ପରିବାରଙ୍କୁ ମଧ୍ୟ ୧୦ ବର୍ଷ ଲାଗି ବର୍ଦ୍ଧିତ ହାରରେ ପାରିବାରିକ ପେନସନ ମିଳିବ । ତେବେ ଏହି ସୁବିଧା ସମ୍ପୃକ୍ତ ପରିବାର ୨୦୧୯ ଅକ୍ଟୋବର ପହିଲାରୁ ପାଇ ପାରିବେ। ଚାକିରିରେ ଯୋଗ ଦେବାର ୭ ବର୍ଷ ମଧ୍ୟରେ ଦୁର୍ଭାଗ୍ୟଜନକ ଭାବେ ମୃତ୍ୟୁବରଣ କରୁଥିବା କେନ୍ଦ୍ରୀୟ ସଶସ୍ତ୍ର ଆରକ୍ଷୀ ବାହିନୀ(ସିଏପିଏଫ) କର୍ମଚାରୀଙ୍କ ସମେତ ସମସ୍ତ କର୍ମଚାରୀଙ୍କ ପରିବାର ଏହି ନୂତନ ସଂଶୋଧିତ ନିୟମ ଅନୁଯାୟୀ ପେନସନ ପାଇବେ।
