ନୂଆଦିଲ୍ଲୀ,୨-୧୧: ମାନ୍ଦାବସ୍ଥା ଯୋଗୁ ଦେଶର ଅଟୋମୋବାଇଲ କମ୍ପାନୀଙ୍କ ବିକ୍ରି ଅକ୍ଟୋବରରେ ବିଶେଷ ହ୍ରାସ ହୋଇଥିବା ଦେଖାଯାଇଛି। ଏହି ସମୟରେ ପ୍ରମୁଖ ଯାନ ନିର୍ମାତା ଅଶୋକ ଲେଲାଣ୍ଡର ବିକ୍ରି ୩୫% ଖସିଛି। ଏହି କମ୍ପାନୀ ୯,୮୫୭ ୟୁନିଟ ଯାନ ବିକ୍ରି କରିଛି। ହିନ୍ଦୁଜା ଗ୍ରୁପର ଉକ୍ତ ଫାର୍ମ ଗତ ବର୍ଷ ସମାନ ସମୟରେ ୧୫,୧୪୯ ୟୁନିଟ ଯାନ ବିକ୍ରି କରିବାକୁ ସକ୍ଷମ ହୋଇଥିଲା। ସେହିଭଳି ଟିଭିଏସ୍ର ବିକ୍ରି ୧୮.୮% କମିଛି। ୨୦୧୯ ଅକ୍ଟୋବରରେ କମ୍ପାନୀ ୩.୨୩ ଲକ୍ଷ ୟୁନିଟ ଯାନ ବିକ୍ରି କରିଛି। ଏହା ଗତ ବର୍ଷ ସମାନ ସମୟରେ ୩.୯୮ ଲକ୍ଷ ୟୁନିଟ ରହିଥିଲା। ମହିନ୍ଦ୍ରା ଆଣ୍ଡ ମହିନ୍ଦ୍ରା (ଏମ୍ ଆଣ୍ଡ ଏମ୍)ର ଟ୍ରାକ୍ଟର ବିକ୍ରି ୪% କମି ୪୭,୩୭୬ ୟୁନିଟ ରହିଛି। ଗତ ବର୍ଷ ସମାନ ମାସରେ କମ୍ପାନୀ ଏହି ବର୍ଗରେ ୪୫,୪୩୩ ୟୁନିଟ ଯାନ ବିକି ଥିଲା। ମହିନ୍ଦ୍ରାର ମୋଟ ବିକ୍ରି ୧୧% ଖସି ୫୧,୮୯୬ ୟୁନିଟ ରହିଛି। ଗତ ବର୍ଷ ଏହା ୫୮,୪୧୬ ୟୁନିଟ ରହିଥିଲା। ଏହାବାଦ ଟୟୋଟା କିର୍ଲୋସ୍କାର ମୋଟର୍ସ ବିକ୍ରି ୫% କମ୍ ରହିଛି। କମ୍ପାନୀ ୧୨,୬୧୦ ୟୁନିଟ ଯାନ ବିକ୍ରି କରିଛି। ଏହା ଗତ ବର୍ଷ ୧୩,୨୪୫ ୟୁନିଟ ରହିଥିଲା। ଭଲଭୋ ଗ୍ରୁପ ଏବଂ ଏଚର ମୋଟର୍ସର ଯୌଥ କମ୍ପାନୀ ଭିଇ କମର୍ସିଆଲ ଭେଇକିଲର ବିକ୍ରି ୩୭% ଖସି ୩,୭୫୫ ୟୁନିଟ ଯାନ ରହିଛି। ଗତ ବର୍ଷ ଏହି ସମୟରେ କମ୍ପାନୀ ୫,୯୮୦ ୟୁନିଟ ଯାନ ବିକ୍ରି କରିଥିବା କହିଛି। ଏହାବାଦ ବଜାଜ ଅଟୋ ଲିମିଟେଡର ବିକ୍ରି ୯% କମି ୪.୬୩ ଲକ୍ଷ ୟୁନିଟ ରହିଛି। ସୁଜୁକି ମୋଟର ସାଇକେଲ ବିକ୍ର ୧୪ ବଢିଥିବା ବେଳେ ହୋଣ୍ଡା କାର୍ସ ବିକ୍ରି ୨୯% ଖସିଥିବା କମ୍ପାନୀ ପକ୍ଷରୁ କୁହାଯାଇଛି।
ମାରୁତି ସୁଜୁକି ବିକ୍ରି ୪.୫% ବୃଦ୍ଧି
ଚଳିତ ବର୍ଷ ଅକ୍ଟୋବରରେ ମାରୁତି ସୁଜୁକି ଇଣ୍ଡିଆ ଲିମିଟେଡ (ଏମ୍ଏସ୍ଆଇ)ର ଯାନ ବିକ୍ରି ୪.୫% ବଢିଛି। ଏହି ସମୟରେ କମ୍ପାନୀ ମୋଟ ୧.୫୩ ଲକ୍ଷ ୟୁନିଟ ଯାନ ବିକ୍ରି କରିବାକୁ ସକ୍ଷମ ହୋଇଥିବା ଶୁକ୍ରବାର ସୂଚନା ଦେଇଛି। ଗତ ବର୍ଷ ଏହି ସମୟରେ କମ୍ପାନୀର ବିକ୍ରି ୧.୪୬ ଲକ୍ଷ ୟୁନିଟ ଥିଲା। ଏହି ସମୟରେ ମହିନ୍ଦ୍ରା ଆଣ୍ଡ ମହିନ୍ଦ୍ର ଏବଂ ଟୟୋଟା ଭଳି କମ୍ପାନୀଗୁଡିକ ସେମାନଙ୍କର ପରଫରମାନ୍ସରେ ଉନ୍ନତି ଆଣି ପାରିଥିବା ସୂଚନା ରହିଛି। ଅକ୍ଟୋବରରେ ଏମ୍ଜି ମୋଟର୍ସ ୩,୫୩୬ ୟୁନିଟ ଏସ୍ୟୁଭି ବିକ୍ରି କରିଛି।
