ବଅଁରପାଳ, ୨୮ା୫(ଡି.ଏନ.ଏ.)ବଅଁରପାଳ ବ୍ଲକର ଚାଷୀଙ୍କୁ ମିଳୁନି ଧାନ ବିହନ। ଜମିରେ ଚାଷ ଆରମ୍ଭ ହୋଇଥିଲେ ମଧ୍ୟ ବିହନ ଅଭାବ ସେମାନଙ୍କ ଚିନ୍ତା ବଢାଇଛି। ବ୍ଲକ ଅଧୀନରେ ମୋଟ ୧୩ଟି କୃଷି ସମବାୟ ସମିତି ଥିଲେ ମଧ୍ୟ ୯ଟିରେ ଚାଷୀଙ୍କୁ ଧାନ ବିହନ ଯୋଗାଯାଉନାହିଁ। ଫଳରେ ବହୁ ଜମିରେ ଚାଷ କାର୍ଯ୍ୟ ଆଗେଇ ପାରୁ ନ ଥିବା ଅଭିଯୋଗ ହୋଇଛି।
ଚଳିତ ବର୍ଷ ବ୍ଲକରେ ୧୦ ହଜାର ୯୪୫ ହେକ୍ଟରରେ ଧାନ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ହେଲେ ଚାଷୀମାନଙ୍କୁ ବିହନ ଯୋଗାଯାଉ ନ ଥିବାରୁ ବହୁ ଜମିରେ ଚାଷ ଆରମ୍ଭ ହୋଇପାରିନାହିଁ। କୃଷି ସମବାୟ ସମିତି ଜରିଆରେ ସେମାନଙ୍କୁ ବିହନ ଯୋଗାଯିବା କଥା। ଚାଷୀ ବାରମ୍ବାର ସମିତି ଯାଉଥିଲେ ହେଁ ନିରାଶ ହୋଇ ଫେରୁଛନ୍ତି। ଏହି ବ୍ଲକ ଅଧୀନରେ ୧୩ଟି କୃଷି ସମବାୟ ସମିତି ରହିଛି। ବର୍ତ୍ତମାନ ସୁଦ୍ଧା କେବଳ ବନ୍ଦା, ନୂଆହତା, କୁଇଓ ଓ ବଳରାମପ୍ରାସଦ ସମିତିରେ ବିହନ ମିଳୁଥିବାବେଳେ ବଡ଼କେରେଜାଙ୍ଗ, ଜରାସିଂହା, ତୁବେ, ତୁରଙ୍ଗ, ରଙ୍କସିଂହା, ବୁଢାପଙ୍କ, ଗଡସନ୍ତ୍ରୀ ତଳମୂଳ ଓ ଫୁଲୁପଡ଼ା ଆଦି ସମିତିରେ ବିହନ ମହଜୁଦ ନାହିଁ। ବଅଁରପାଳ ବ୍ଲକ ପାଇଁ ବିହନ ନିଗମକୁ ୧୩୩୭ କୁଇଣ୍ଟାଲ ଧାନ ବିହନ ଯୋଗାଇ ଦିଆଯାଇଛି। ସମବାୟ ସମିତିଗୁଡିକ ବିହନ ନିଗମରେ ଡ୍ରାଫ ଜାମ କରି ବିହନ ଉଠାଇବା କଥା। ହେଲେ ଏ ପର୍ଯ୍ୟନ୍ତ ବହୁ ସମିତି ବିହନ ନିଗମରେ ଡ୍ରାଫ ଜମା କରି ନ ଥିବା ଜଣାପଡିଛି। ସେହିପରି ସମିତିରେ ବିହନ ମିଳୁ ନ ଥିବାରୁ କେତେଜଣ ଚାଷୀ ଘରେ ସାଇତି ରଖିଥିବା ପୁରୁଣା ବିହନ ଓ ବଜାରରୁ ଅଧିକ ଦରରେ ବିହନ କିଣି ଚାଷ କାର୍ଯ୍ୟ ଆରମ୍ଭ କରିଥିବା ଜଣାପଡଛି। ଶୀଘ୍ର ବିହନ ନ ମିଳିଲେ ଧାର୍ଯ୍ୟ ଲକ୍ଷ୍ୟ ପୂରଣ ନ ହେବା ନେଇ ଆଶଙ୍କା ସୃଷ୍ଟି ହୋଇଛି।
ଏ ସମ୍ପର୍କରେ ବଅଁରପାଳ ସହକାରୀ କୃଷି ଅଧିକାରୀ ସୁମନ୍ତ ନାୟକ କୁହନ୍ତି, ବର୍ତ୍ତମାନ ସୁଦ୍ଧା ୪ଟି କୃଷି ସମବାୟ ସମିତିରେ ଧାନ ବିହନ ମହଜୁଦ ରହିଛି। ଅନ୍ୟ ୯ଟି ସମିତିରେ ଖୁବ୍ଶୀଘ୍ର ବିହନ ମହଜୁଦ ରହିବ। ସେଥିପାଇଁ ଧୀରେ ଧୀରେ ସମସ୍ତ ସମିତି ବିହନ ନିଗମରେ ଡ୍ରାଫ ଜମା କରି ବିହନ ଉଠାଇବେ।
