ବଅଁରପାଳ,୯ା୨(ଡି.ଏନ.ଏ.) – ସ୍ଥାନୀୟ ଲୋକକଳା ତଥା ପ୍ରତିଭାର ବିକାଶ ପାଇଁ ପ୍ରତି ବ୍ଲକସ୍ତରରେ ଆୟୋଜନ ହେଉଛି ବ୍ଲକ ମହୋତ୍ସବ। କିନ୍ତୁ ଅନୁଗୋଳ ଜିଲା ବଅଁରପାଳ ବ୍ଲକରେ ଏଥିରେ ବ୍ୟତିକ୍ରମ ଦେଖାଯାଇଛି। ବର୍ଷେ କି ଦୁଇ ବର୍ଷ ନୁହେଁ, ଦୀର୍ଘ ୬ ବର୍ଷ ହେଲା ଏଠାରେ ବ୍ଲକ ମହୋତ୍ସବର ଆୟୋଜନ କରାଯାଇନାହିଁ। ଏହାକୁ ନେଇ ବ୍ଲକର କଳାକାରମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ପ୍ରଶାସନର ଇଚ୍ଛାଶକ୍ତି ଓ ଆନ୍ତରିକତା ଅଭାବ ଯୋଗୁ ମହୋତ୍ସବ ଆୟୋଜନ ହୋଇପାରୁ ନ ଥିବା ସେମାନେ ଅଭିଯୋଗ କରିଛନ୍ତି।
ଆସନ୍ତା ୧୧ ତାରିଖରୁ ୩ ଦିନ ଧରି ଜିଲାସ୍ତରୀୟ ମହୋତ୍ସବ ପାଳନ ହେବ। ଏହା ପୂର୍ବରୁ ଜିଲାର ବିଭିନ୍ନ ବ୍ଲକରେ ଆୟୋଜିତ ବ୍ଲକ ମହୋତ୍ସବରୁ ବଛା ବଛା କଳାକାର ଜିଲାସ୍ତରରେ ପ୍ରତିଭା ପ୍ରଦର୍ଶନ ପାଇଁ ମନୋନୀତ ହୋଇଛନ୍ତି। ହେଲେ ବଅଁରପାଳ ବ୍ଲକରେ ୬ବର୍ଷ ଧରି ମହୋତ୍ସବ ପାଳନ କରାଯାଉ ନ ଥିବାରୁ ପୂର୍ବବର୍ଷଗୁଡ଼ିକ ପରି ଚଳିତବର୍ଷ ମଧ୍ୟ ଜିଲା ମହୋତ୍ସବରେ ସ୍ଥାନୀୟ ପ୍ରତିଭାମାନେ କଳା ପ୍ରଦର୍ଶନରୁ ବଞ୍ଚିତ ହେବାକୁ ଯାଉଥିବା ସେମାନେ ପ୍ରକାଶ କରିଛନ୍ତି। ବଅଁରପାଳ ବ୍ଲକ ପ୍ରଶାସନ ସ୍ଥାନୀୟ କଳା, ସଂସ୍କୃତିର ବିକାଶ ଦିଗ ପ୍ରତି ଆଦୌ ଗୁରୁତ୍ୱ ଦେଉ ନ ଥିବାରୁ ୩୫ଟି ପଞ୍ଚାୟତର ଦଣ୍ଡପାଲା, ଦାସକାଠିଆ, ପାଇକଆଖଡା, ନାମ ସଂକୀର୍ତ୍ତନ ଆଦିର ୪ ଶହରୁ ଊର୍ଦ୍ଧ୍ୱ କଳାକାର ସେମାନଙ୍କ କଳା ପ୍ରଦର୍ଶନରୁ ବଞ୍ଚିତ ହେଇଥିବା ଅଭିଯୋଗ ହୋଇଛି। ଏଥିଯୋଗୁ କଳାକାରମାନଙ୍କ ମଧ୍ୟରେ ନୈରାଶ୍ୟଭାବ ଦେଖାଦେଇଛି।
ଏ ସମ୍ପର୍କରେ କୁଲାଡ଼ ଗ୍ରାମର ପୁରୁଣା ଦଣ୍ଡ କଳାକାର ବାମଦେବ ସେଠ କୁହନ୍ତି, ପ୍ରଥମେ ବ୍ଲକ ମହୋତ୍ସବରେ ଅଂଶଗ୍ରହଣ କରିବା ପରେ ଜିଲା ମହୋତ୍ସବକୁ ମନୋନୀତ ହୋଇଥିଲି। ହେଲେ ୬ ବର୍ଷ ହେଲା ଆଉ ମହୋତ୍ସବ ହେଉ ନ ଥିବାରୁ ଅଞ୍ଚଳର ବହୁ କଳାକାର ସୁଯୋଗରୁ ବଞ୍ଚିତ ହେଉଛନ୍ତି। ଗିରାଙ୍ଗ ଗ୍ରାମର ପାଲା ଗାୟକ ମାନସ କର କୁହନ୍ତି, ସବୁ ବ୍ଲକରେ ମହୋତ୍ସବ କରାଯାଉଥିବାବେଳେ ବଅଁରପାଳରେ ଏହା ଆୟୋଜନ କରା ନ ଯିବା ଦୁର୍ଭାଗ୍ୟଜନକ। ଏଥିଯୋଗୁ କଳାକାର ନିରୁତ୍ସାହିତ ହେଉଛନ୍ତି। ଦଣ୍ଡ କଳାକାର ଯିଶୁ ବାରିକ କୁହନ୍ତି, ଏହି କାର୍ଯ୍ୟକ୍ରମ ବନ୍ଦ ହୋଇଯାଇଥିବା ଯୋଗୁ କଳାକାରମାନେ ଦୁଃଖିତ। ମହୋତ୍ସବ ପୁନର୍ବାର ଆୟୋଜନ କରାଗଲେ ସେମାନେ ପ୍ରତିଭା ପ୍ରଦର୍ଶନ କରିପାରନ୍ତେ।
ଏ ସମ୍ପର୍କରେ ବଅଁରପାଳ ବ୍ଲକର ପୂର୍ବତନ ବିଡିଓ ଡ. ସ୍ବରୂପା ନନ୍ଦ ସାହୁ କହିଛନ୍ତି, ମହୋତ୍ସବ ପାଇଁ ପ୍ରଶାସନ ପକ୍ଷରୁ ୨୫ ହଜାର ଟଙ୍କା ପ୍ରଦାନ କରାଯାଉଛି। କିନ୍ତୁ କାର୍ଯ୍ୟକ୍ରମ ଆୟୋଜନ ପାଇଁ ଅତି କମ୍ରେ ୧ ଲକ୍ଷ ଟଙ୍କା ଖର୍ଚ୍ଚ ହେବ। ଅର୍ଥାଭାବରୁ ମହୋତ୍ସବ କରାଯାଇପାରୁ ନାହିଁ। କିନ୍ତୁ ଜିଲାସ୍ତରକୁ କଳାକାର ଚୟନ କରାଯାଇ ପଠାଯାଉଛି। ବର୍ତ୍ତମାନର ବିଡିଓ ଏଲିଜା ମିଶ୍ର କୁହନ୍ତି, ନୂତନ ଭାବେ କାର୍ଯ୍ୟରେ ଯୋଗ ଦେଇଛି। ଏ ବିଷୟରେ ଜାଣିନାହିଁ। ତଥାପି କଳାକାରଙ୍କ ବିକାଶ ଦିଗରେ ଧ୍ୟାନ ଦେବି।
