୬ ଘଣ୍ଟା ରାଇକିଆ-ଜି.ଉଦୟଗିରି ରାସ୍ତା ଅବରୋଧ
7:51 amDecember 17, 2019 / 21

ରାଇକିଆ,୧୭ା୧୨(ଡ଼ି.ଏନ.ଏ.)-ରାଇକିଆ ସାପ୍ତାହିକ ହାଟକୁ ନେଇ ୨ ପଞ୍ଚାୟତ ମଧ୍ୟରେ ଳାଗି ରହିଥିବା ବିବାଦ ଥମୁନି। କ୍ରମାଗତ ଦ୍ୱିତୀୟ ଥର ପାଇଁ ସୋମବାର ହାଟରେ ବାଧା ସୃଷ୍ଟି ହୋଇଛି। ଉଭୟ ପଞ୍ଚାୟତରେ ହାଟ ପାଇଁ ରାସ୍ତାରୋକୋ ଯୋଗୁ ରାଇକିଆ-ଜି.ଉଦୟଗିରି ରାସ୍ତା ୬ଘଣ୍ଟା ଧରି ଅବରୋଧ ହୋଇଥିଲା। କାୈଣସି ଯାନବାହନ ଚଳାଚଳ ହୋଇପାରି ନ ଥିଲା। ପୂର୍ବ ସପ୍ତାହ ନିଷ୍ଫତ୍ତି ପ୍ରକାରେ ରାଇକିଆ ଚୂନପଲ୍ଲୀରେ ହାଟକୁ ଯିବା ପାଇଁ ବ୍ୟବସାୟୀଙ୍କୁ କୁହାଯିବା ପରେ ବେରେଡ଼ାକିଆରେ ସରପଞ୍ଚ ରଶ୍ମିତା ପ୍ରଧାନଙ୍କ ଉପସ୍ଥିତିରେ ସ୍ଥାନୀୟ ଲୋକ ଏବଂ ବ୍ୟବସାୟୀଙ୍କ ତରଫରୁ ରାସ୍ତାରୋକୋ କରାଯାଇଥିଲା। କିଛି ଘଣ୍ଟାର ପରେ ପୁଣି ଥରେ ପୁରୁଣା ସ୍ଥାନରେ ହାଟ ଆରମ୍ଭ ହୋଇଥିଲା। ପୁଣି ଥରେ ପୁରୁଣା ସ୍ଥାନରେ ହାଟ ଖୋଲାଯିବାର ପ୍ରତିବାଦରେ ରାଇକିଆ ଚୂନପଲ୍ଲୀରେ ସରପଞ୍ଚ ପଞ୍ଚୁ ପ୍ରଧାନ, ସମିତି ସଭ୍ୟା ମିନି ନାୟକ ଓ କେତେକ ଓ୍ବାର୍ଡ଼ ମେମ୍ବରଙ୍କ ଉପସ୍ଥିତିରେ ରାସ୍ତା ଅବରୋଧ କରାଯାଇଥିଲା। ଫଳରେ ସେଠାରେ ମଧ୍ୟ ଯାନବାହନ ଚଳାଚଳ ବନ୍ଦ ରହିଥିଲା। ଲୋକେ ଟାୟାର ଜାଳି ରାସ୍ତା ଅବରୋଧ କରିଥିଲେ। ଏହା ଅପରାହ୍ନ ୪ ଟା ପର୍ଯ୍ୟନ୍ତ ଚାଲିଥିଲା। ରାଇକିଆ ବିଡ଼ିଓ ପ୍ରବୀଣ କୁମାର ବାଣୁଆ, ଥାନା ଅଧିକାରୀ ଅଲେଖ ଗରଡ଼ିଆ ପହଞ୍ଚି ଲୋକଙ୍କୁ ବୁଝାଶୁଝା କରିଥିଲେ ମଧ୍ୟ ସମାଧାନର ରାସ୍ତା ବାହାରିପାରି ନ ଥିଲା। ଲୋକଙ୍କ ସ୍ବାର୍ଥ ଦଷ୍ଟିିରୁ ଏବଂ ହାଟ ଯୋଗୁ ମୁଖ୍ୟ ରାସ୍ତା ଜାମ ହେଉଥିବା, ଟ୍ରାଫିକ ସମସ୍ୟା ସୃଷ୍ଟି ହେଉଥିବାରୁ ଏହାକୁ ଦୃଷ୍ଟିରେ ରଖି ହାଟ ଘୁଞ୍ଚା ଯାଇଥିବା ବେଳେ ଏଥିରେ ବାରମ୍ବାର ସମସ୍ୟା ସୃଷ୍ଟି କରାଯାଉଥିବାରୁ ଏହାର ସ୍ଥାୟୀ ସମାଧାନ ପାଇଁ ସ୍ଥାନୀୟ ଲୋକେ ଦାବି କରିଥିଲେ। ଆସନ୍ତା ସୋମବାର ସୁଦ୍ଧା ହାଟ ଘୁଞ୍ଚାଇବା ସହ ସମସ୍ତ ପ୍ରକାର ବ୍ୟବସ୍ଥା କରାଯିବ ବୋଲି ପ୍ରଶାସନ ତରଫରୁ ପ୍ରତଶ୍ରୁତି ଦିଆଯିବାପରେ ଆନ୍ଦୋଳନ ହଟିଥିଲା। ଅନ୍ୟ ପକ୍ଷରେ ପ୍ରଶାସନ ତରଫରୁ ଏ ଦିଗରେ ତ୍ୱରିତ ପଦକ୍ଷେପ ନିଆଯାଉ ନ ଥିବାରୁ ବିଶୃଙ୍ଖଳା ବଢିବାରେ ଲାଗିଛି। ପ୍ରତ୍ୟକ ହାଟ ପାଳିରେ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖିନ ହେଉଛନ୍ତି। ବିଶେଷ କରି ବାଲିଗୁଡ଼ା, ବ୍ରହ୍ମପୁର, ଫୁଲବାଣୀ ଭଳି ଦୂରଦୂରାନ୍ତରୁ ବ୍ୟବସାୟୀମାନେ ଆସୁଥିଲେ ମଧ୍ୟ ରାସ୍ତା ଅବରୋଧ, ଆନ୍ଦୋଳନ, ଅବ୍ୟବସ୍ଥା ଯୋଗୁ ନିରାଶ ହୋଇ ଫେରୁଛନ୍ତିି।
ସୂଚନାଯୋଗ୍ୟ, ରାଇକିଆରେ ଜିଲାର ଅନ୍ୟତମ ବୃହତ ହାଟ ହୋଇଥାଏ। ପ୍ରତ୍ୟକ ସୋମାବର ଏଠାକୁ ହଜାର ହଜାର ଲୋକ ଆସିଥାନ୍ତି।