ଅନୁଗୋଳ ଅଫିସ, ୧୭।୬
ଚିକିତ୍ସାରେ ସହଯୋଗ ସହ ଚିକିତ୍ସାଳୟର ମାନ ବଢ଼ାଇବାକୁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ହେଲ୍ପ ଡେସ୍କ ବ୍ୟବସ୍ଥା କାର୍ଯ୍ୟକାରୀ ହୋଇଥିଲା। ତେବେ ଦୀର୍ଘ ୫ ମାସ ହେବ ଏହି ହେଲ୍ପ ଡେସ୍କ ଏକପ୍ରକାର କୋମା ଅବସ୍ଥାକୁ ଚାଲିଯାଇଥିଲା। ଏ ନେଇ ଗତ ୧୪ ତାରିଖରେ ‘କୋମାରେ ହେଲ୍ପ ଡେସ୍କ’ ଶୀର୍ଷକ ଖବର ‘ଧରିତ୍ରୀ’ରେ ପ୍ରକାଶ ପରେ ଅନୁଗୋଳର ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଥିଲା। କେତେଜଣ ବୁଦ୍ଧିଜୀବୀ ମୁଖ୍ୟମନ୍ତ୍ରୀ, ସ୍ବାସ୍ଥ୍ୟମନ୍ତ୍ରୀ, ସ୍ବାସ୍ଥ୍ୟ ବିଭାଗ ଓ ଜିଲା ପ୍ରଶାସନକୁ ଟୁଇଟ୍ କରିଥିଲେ। ତେବେ ମଙ୍ଗଳବାର ମେଡିକାଲ କାର୍ଯ୍ୟାଳୟ ଖୋଲିବା ପରେ ଏଡିଏମ୍ଓ ଏହାର ତନାଘନା କରିଥିଲେ। ଏହାପରେ ହେଲ୍ପ ଡେସ୍କ ମ୍ୟାନେଜରଙ୍କୁ ଡାକି ତାଗିଦ୍ କରିଥିଲେ। ତୁରନ୍ତ ହେଲ୍ପ ଡେସ୍କ ମ୍ୟାନେଜରଙ୍କ ସହ ଭଲ୍ୟୁଣ୍ଟରମାନେ ବିଭିନ୍ନ ୱାର୍ଡ ବୁଲି ରୋଗୀଙ୍କ ପାଖରୁ ମତାମତ ସଂଗ୍ରହ କରିଥିବା ଦେଖାଯାଇଥିଲା। ଏପରି କି ବହିର୍ବିଭାଗକୁ ଆସୁଥିବା ରୋଗୀମାନଙ୍କ ପଞ୍ଜୀକରଣ କରିବା ସହ ସ୍ବାସ୍ଥ୍ୟସେବାରେ କେତେ ସନ୍ତୁଷ୍ଟ ଅଛନ୍ତି ସେ ନେଇ ଫିଡ୍ ବ୍ୟାକ୍ ମଧ୍ୟ ସଂଗ୍ରହ କରାଯାଇଥିବା ଦେଖିବାକୁ ମିଳିଥିଲା। ପ୍ରତ୍ୟେକ ଦିନ ରାଜ୍ୟ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଏବଂ ୫-ଟି ବିଭାଗକୁ କାର୍ଯ୍ୟ ସମ୍ପର୍କରେ ଅବଗତ କରାଯିବ ବୋଲି ମେଡିକାଲ ପକ୍ଷରୁ ସୂଚନା ମିଳିଛି।
