ବଇଣ୍ଡା,୨୦।୧୨(ଡି.ଏନ.ଏ.)-ରାସ୍ତାରେ ଯାଉଥିବା ବାଟୋଇଙ୍କୁ ମାଗଣାରେ ବିଶ୍ରାମ ସୁବିଧା ଯୋଗାଇଦେବା ଲକ୍ଷ୍ୟରେ ରାଜ୍ୟ ସରକାର ପ୍ରତ୍ୟେକ ବ୍ଲକର ମୁଖ୍ୟରାସ୍ତା ପାର୍ଶ୍ୱରେ ପଥପ୍ରାନ୍ତ ସୁବିଧା କେନ୍ଦ୍ର ସ୍ଥାପନ କରିଛନ୍ତି। ହେଲେ ଅନୁଗୋଳ ଜିଲା କିଶୋରନଗର ବ୍ଲକ ନାକିଚିଠାରେ ଥିବା ପଥପ୍ରାନ୍ତ ସୁବିଧା କେନ୍ଦ୍ରରେ ନିୟୋଜିତ କର୍ମଚାରୀଙ୍କୁ ୩ ମାସ ହେବ ଦରମା ଦିଆଯାଇ ନ ଥିବା ଯୋଗୁ ସେମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ଏପରି କି ସମ୍ପୃକ୍ତ କର୍ମଚାରୀମାନେ ସୋମବାରଠାରୁ କେନ୍ଦ୍ରରେ ତାଲା ପକାଇ ଧର୍ମଘଟରେ ବସିଛନ୍ତି। ଫଳରେ ପଥଯାତ୍ରୀ ଓ ନାକିଚି ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଘଟଣାରୁ ଜଣାପଡ଼ିଛି, ପୂର୍ତ୍ତ ବିଭାଗ ଅଧୀନରେ ଏହି ପଥପ୍ରାନ୍ତ ସୁବିଧା କେନ୍ଦ୍ର ରହିଛି। ଏଠାରେ ୧୩ ଜଣ କର୍ମଚାରୀ ବିଭିନ୍ନ ଦାୟିତ୍ୱ ପାଇଁ ନିଯୁକ୍ତି ହୋଇଛନ୍ତି। ୫୫ନଂ. ଜାତୀୟ ରାଜପଥ ଦେଇଯାଉଥିବା ପଥଯାତ୍ରୀଙ୍କୁ ଏଠାରେ ମାଗଣାରେ ଜଳପାନ, ଶୌଚାଳୟ, ପାର୍କିଂ, ଶିଶୁ ଉଦ୍ୟାନ, ଅତ୍ୟାବଶ୍ୟକ ସାମଗ୍ରୀ ଯୋଗାଇ ଦିଆଯାଇଥାଏ। ହେଲେ ନିଯୁକ୍ତି ହୋଇଥିବା ୧୩ ଜଣ କର୍ମଚାରୀଙ୍କୁ ସେପ୍ଟେମ୍ବର ୨୦୧୯ ମାସଠାରୁ ଦରମା ଦିଆଯାଇ ନାହିଁ। ଏକ ଘରୋଇ ଠିକାସଂସ୍ଥା ପକ୍ଷରୁ ଏମାନଙ୍କୁ ନିଯୁକ୍ତି କରାଯାଇଥିବାବେଳେ ଦରମା ଦିଆଯାଉ ନ ଥିବାରୁ ପରିବାର ଚଳିବାରେ କଷ୍ଟକର ହେଉଥିବା କର୍ମଚାରୀମାନେ ପ୍ରକାଶ କରିଛନ୍ତି। ତୁରନ୍ତ ଏଥିପ୍ରତି ଜିଲାପାଳ ଦୃଷ୍ଟି ଦେଇ କର୍ମଚାରୀଙ୍କୁ ଦରମା ପ୍ରଦାନର ବ୍ୟବସ୍ଥା କରିବାକୁ ଦାବି ହୋଇଛି। ଏ ନେଇ ପୂର୍ତ୍ତ ବିଭାଗ କନିଷ୍ଟ ଯନ୍ତ୍ରୀ ହିମାଂଶୁ ମହାଳିକ କହିଛନ୍ତି, ପଥପ୍ରାନ୍ତ ସୁବିଧାକେନ୍ଦ୍ରର କର୍ମଚାରୀମାନଙ୍କୁ ଏକ ଠିକାସଂସ୍ଥା ନିଯୁକ୍ତ କରିଛି। ଉକ୍ତ ଠିକା ସଂସ୍ଥା ପୂର୍ତ୍ତ ବିଭାଗରୁ ପ୍ରତ୍ୟେକ ମାସରେ ବିଲ୍ ନେଇଯାଉଛି। କ’ଣ ପାଇଁ କର୍ମଚାରୀଙ୍କୁ ଦରମା ଯୋଗାଇ ଦିଆଯାଉନି ସେ ସମ୍ପର୍କରେ ଅନୁଧ୍ୟାନ କରାଯିବ।
