ଉପେନ୍ଦ୍ର ରାଉତ
ବଅଁରପାଳ,୧୫ା୩ – ନିଜେ ଉଚ୍ଚଶିକ୍ଷିତ। ହେଲେ ଚାକିରି ନ କରି ଅନ୍ୟମାନଙ୍କୁ କିପରି ଚାକିରି ଦେଇପାରିବେ ସେ ଦିଗରେ ପ୍ରଚେଷ୍ଟା ଅନୁଗୋଳ ଜିଲା ବଅଁରପାଳ ବ୍ଲକ ବଳରାମପ୍ରସାଦର ସତ୍ୟବ୍ରତ ପ୍ରଧାନ (୨୬)ଙ୍କୁ ପ୍ରତିଷ୍ଠା ଦେଇପାରିଛି। ମାତ୍ର ୨୬ ବର୍ଷ ବୟସରେ ସେ ଧୂପକାଠି କାରଖାନା କରି ଆଖପାଖ ଅଞ୍ଚଳର ଯୁବତୀ ଯୁବକ, ମହିଳା ଓ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)କୁ ମିଶାଇ ମୋଟ୍ ୭୨ ପରିବାରକୁ ରୋଜଗାର ଦେଇପାରିଛନ୍ତି। ବର୍ତ୍ତମାନ ୧୦ ଜଣ ମହିଳା କର୍ମଚାରୀ ତାଙ୍କ କାରଖାନାରେ ନିୟମିତ କାମ କରୁଥିବା ବେଳେ ଆଗାମୀ ଦିନରେ ସେହି ସଂଖ୍ୟାକୁ ୧୦୦ରେ ପହଞ୍ଚାଇବାକୁ ସତ୍ୟବ୍ରତ ଲକ୍ଷ୍ୟ ରଖିଥିବା କହିଛନ୍ତି।
ସତ୍ୟବ୍ରତଙ୍କ ବ୍ୟତୀତ ତାଙ୍କ ପରିବାରରେ ମା’ ବାପା ଓ ବଡ଼ଭାଇ ଅଛନ୍ତି। ଅନୁଗୋଳସ୍ଥିତ ଆଦର୍ଶ ଇଞ୍ଜିନିୟରିଂ କଲେଜରୁ ଡିପ୍ଲୋମା ପାସ୍ କରିବା ପରେ ସେ ଚାକିରି ପରିବର୍ତ୍ତେ ନିଜେ କିପରି ଆତ୍ମନିର୍ଭରଶୀଳ ହୋଇପାରିବେ ସେ ନେଇ ଚିନ୍ତା କରିଥିଲେ। ଏହାବ୍ୟତୀତ ଅନ୍ୟମାନଙ୍କ ପାଇଁ ନିଯୁକ୍ତି ସୃଷ୍ଟି କରିବା ଅନ୍ୟତମ ଲକ୍ଷ୍ୟ ଥିଲା, ଯାହା ତାଙ୍କୁ ଉଦ୍ୟୋଗୀ କରାଇପାରିଛି। ୨୦୧୬ରେ ନିଜ ଘରେ ସଂସାର ଏଣ୍ଟରପ୍ରାଇଜେସ୍ ନାମରେ ଏକ ଧୂପକାଠି କାରଖାନା ଆରମ୍ଭ କରିଥିଲେ। ପ୍ରଥମେ ଅଳ୍ପ କେତୋଟି ମେଶିନ ମୁମ୍ବାଇରୁ ମଗାଇ ଧୂପକାଠି ତିଆରି କରି ବ୍ୟବସାୟ କଲେ। ବର୍ତ୍ତମାନ ପ୍ରାୟ ୫୦ଟି ମେଶିନ ତାଙ୍କ କାରଖାନାରେ କାର୍ଯ୍ୟକ୍ଷମ ରହିଛି। ସତ୍ୟବ୍ରତ କହିଛନ୍ତି, ଧୂପକାଠି ତିଆରି ପାଇଁ ଆବଶ୍ୟକ କୋଇଲା, ଲାଖ ଓ କାଠଗୁଣ୍ଡ ସଂଗ୍ରହ କରି ପ୍ରଥମେ ସେଥିରେ ପାଉଡର ତିଆରି କରାଯାଉଛି। ପରେ ମେଶିନ ମାଧ୍ୟମରେ ଝୁଣା, କଳାବତି, ମସଲାବତି, ଅଗରବତି ଆଦି ସେଣ୍ଟେଡ୍ ଧୂପକାଠି ପ୍ରସ୍ତୁତି ସହ ବ୍ୟବସାୟୀଙ୍କୁ ଯୋଗାଇ ଦିଆଯାଉଛି। ଆଖପାଖ ଅଞ୍ଚଳ ସହ ଢେଙ୍କାନାଳ, ତାଳଚେର, ପାଲଲହଡ଼ା, ହିନ୍ଦୋଳ, ଆଠମଲ୍ଲିକ, ବଇଣ୍ଡା, ଅନୁଗୋଳର ବହୁ ଯୁବତୀ ଯୁବକ, ମହିଳା ଗୋଷ୍ଠୀ ତାଙ୍କ କାରଖାନାରେ ତାଲିମ ନେଉଛନ୍ତି। ଏପରିକି ତାଙ୍କ ଠାରୁ ମେଶିନ ନେଇ ସେମାନେ ଘରେ ଧୂପକାଠି ତିଆରି କରି କାରଖାନାକୁ ଯୋଗାଇ ଦେବା ପରେ ତାହାକୁ ବିକ୍ରି କରାଯାଇ ପାରିଶ୍ରମିକ ଦିଆଯାଉଛି। ଏପରି ଭାବେ ୭୨ ପରିବାର ତାଙ୍କ ଦ୍ୱାରା ରୋଜଗାରକ୍ଷମ ହୋଇପାରିଥିବା ସତ୍ୟବ୍ରତ ପ୍ରକାଶ କରିଛନ୍ତି।
