ଭୁବନେଶ୍ୱର, ୨୧।୭(ବ୍ୟୁରୋ): ମନୋରଞ୍ଜନ ଯୋଗାଉଥିବା ଜୀ ସାର୍ଥକ ଆଉ ଏକ ନୂଆ ମେଗା ଧାରାବାହିକ ଆରମ୍ଭ କରିବାକୁ ଯାଉଛି। ଆସନ୍ତା ୨୨ ତାରିଖରୁ ଆରମ୍ଭ ହେବାକୁ ଥିବା ଏହି ଧାରାବାହିକର ନାମ ହେଉଛି ‘ସୌଭାଗ୍ୟବତୀ’। ସପ୍ତାହରେ ପ୍ରତି ସୋମବାରରୁ ଶନିବାର ରାତି ୯ଟାରେ ଏହାର ପ୍ରସାରଣ ହେବ। ଦୁର୍ଭାଗ୍ୟର ଶିକୁଳିରେ ବନ୍ଧା ସମ୍ପର୍କର ସମାହାରକୁ ମୁକୁଳାଇବା ପାଇଁ ସୌଭାଗ୍ୟ ନେଇ ଆସିଥିବା ସ୍ତ୍ରୀର କାହାଣୀ ହେଉଛି ‘ସୌଭାଗ୍ୟବତୀ’। ଏଥିରେ ନାୟିକା ଭୂମିକାରେ ଦେବସ୍ମିତା ଥିବାବେଳେ ନାୟକ ଭୂମିକାରେ ଆଶିଷ ରହିଛନ୍ତି। ଶିଶୁ କଳାକାର ପ୍ରସିଦ୍ଧିଙ୍କୁ ଏଥିରେ ଏକ ବିଶେଷ ଭୂମିକାରେ ଦେଖିବାକୁ ମିଳିବ। ଅଶ୍ରୁମୋଚନ, ଜର୍ଜ ତିଆଡ଼ି, ଇଶା, ବିରାଜ ଦାସ, ପିଙ୍କି, ସ୍ମରଣିକା ମଧ୍ୟ ପ୍ରମୁଖ ଭୂମିକାରେ ଅଭିନୟ କରିଛନ୍ତି। ‘ଓମ୍ ସାଇ ପ୍ରଡ଼କ୍ସନ’ ବ୍ୟାନରରେ ବରିଷ୍ଠ ପ୍ରଯୋଜକ ପ୍ରଦ୍ୟୁମ୍ନ ଲେଙ୍କା ଏହି ଧାରାବାହିକର ପ୍ରଯୋଜନା କରିଛନ୍ତି। ଏହି ଧାରାବାହିକଟି ମନୋରମ କାହାଣୀ ଏବଂ ଏହା ପ୍ରସାରଣ ହେବା ପରେ ଓଡ଼ିଆ ପରିବାରର ପ୍ରତିବିମ୍ବ ଏହାକୁ ଜନାଦୃତ କରିବ ବୋଲି ଜୀ ସାର୍ଥକ କର୍ତ୍ତୃପକ୍ଷ ଆଶା ପ୍ରକାଶ କରିଛନ୍ତି।
