ବ୍ରହ୍ମପୁର ଅଫିସ୍,୧୫ା୭-ଚଳିତବର୍ଷର ଯୁକ୍ତ ୨ ନାମଲେଖା ଚାଲୁ ରହିଛି। ପ୍ରଥମ ପର୍ଯ୍ୟାୟ ନାମଲେଖା ସରିଥିବା ବେଳେ ଦ୍ୱିତୀୟ ପର୍ଯ୍ୟାୟ ପାଇଁ ଶନିବାର କଟ୍ଅଫ୍ ମାର୍କ ପ୍ରକାଶ ପାଇବା ସହ ଯୋଗ୍ୟ ଛାତ୍ରୀଛାତ୍ରଙ୍କ ତାଲିକା ମଧ୍ୟ ପ୍ରକାଶ ପାଇଛି। ସୋମବାରଠାରୁ ବୁଧବାର ପର୍ଯ୍ୟନ୍ତ ଛାତ୍ରୀଛାତ୍ରମାନେ ନାମ ଲେଖାଇବେ। ପ୍ରଥମ ପର୍ଯ୍ୟାୟ ନାମଲେଖା ପରେ ଗଞ୍ଜାମ ଜିଲାରେ ଆହୁରି ୧୫ହଜାର ୭୧୩ ସିଟ୍ ଖାଲି ପଡ଼ିଛି। ଏହାକୁ ନେଇ କଲେଜ କର୍ତ୍ତୃପକ୍ଷ ଚିନ୍ତାରେ ପଡ଼ିଛନ୍ତି କଲେଜ ସଂଖ୍ୟା ବଢ଼ୁଥିବା ବେଳେ ଛାତ୍ରୀଛାତ୍ରଙ୍କ ସଂଖ୍ୟା କମୁଛି। ଏପରିକି ଜିଲାରେ ୨୦ କଲେଜରେ ଦ୍ୱିତୀୟ ପର୍ଯ୍ୟାୟରେ ନାମ ଲେଖାଇବା ପାଇଁ କେହି ଜଣେ ହେଲେ ଛାତ୍ରୀଛାତ୍ର ନାହାନ୍ତି, ଯାହା କଲେଜ କର୍ତ୍ତୃପକ୍ଷଙ୍କ ମୁଣ୍ଡବଥା ବଢ଼ାଇ ଦେଇଛି।
ଜିଲାର ୧୩୧ ଉଚ୍ଚ ମାଧ୍ୟମିକ ବିଦ୍ୟାଳୟ(କଲେଜ) ପାଇଁ ଚଳିତ ବର୍ଷ ନାମଲେଖା ଚାଲିଛି।
ଏସବୁ କଲେଜଗୁଡ଼ିକରେ ମୋଟ ୪୨ହଜାର ୬୯୦ ସିଟ୍ ରହିଛି। ପ୍ରଥମ ପର୍ଯ୍ୟାୟରେ ୨୬ହଜାର ୯୭୭ ସିଟ୍ ପୂରଣ ହୋଇଛି। କଳାରେ ୧୯ହଜାର ୭୭୭ ସିଟ୍ ଥିବା ବେଳେ ୧୬ହଜାର ୩୪୧ ପୂରଣ ହୋଇଛି। ୩ହଜାର ୪୩୬ ସିଟ୍ ଖାଲି ପଡ଼ିଛି। ବିଜ୍ଞାନରେ ୧୬ହଜାର ୯୨୯ ସିଟ୍ ଥିବା ବେଳେ ୮ହଜାର ୨୧୭ ସିଟ୍ ପୂରଣ ହୋଇଛି।
୮ହଜାର ୭୧୨ ସିଟ୍ ଖାଲି ପଡ଼ିଛି।
ବାଣିଜ୍ୟରେ ୫ହଜାର ୧୮୪ ସିଟ୍ରୁ ୨ହଜାର ୯୨ ସିଟ୍ ପୂରଣ ଏବଂ ୩ହଜାର ୯୨ ସିଟ୍ ଖାଲି ପଡ଼ିଛି। ସଂସ୍କୃତରେ ୩୨୦ ସିଟ୍ରୁ ୧୬୭ ପୂରଣ ଏବଂ ୧୫୩ ସିଟ୍ ଖାଲିପଡ଼ିଛି।
ଧନ୍ଦାମୂଳକ ଶିକ୍ଷାରେ ୪୮୦ ସିଟ୍ରୁ ୧୬୦ ପୂରଣ ଏବଂ ୩୨୦ ସିଟ୍ ଖାଲିପଡ଼ିଛି। ତେବେ ଖାଲି ପଡ଼ିଥିବା ସିଟ୍ଗୁଡ଼ିକ ପାଇଁ ଶନିବାର ଦ୍ୱିତୀୟ ପର୍ଯ୍ୟାୟ ଯୋଗ୍ୟ ଛାତ୍ରୀଛାତ୍ରଙ୍କ ତାଲିକା ପ୍ରକାଶ ପାଇଛି। ତେବେ ଅନେକ କଲେଜର ମେଧା ତାଲିକା ପ୍ରକାଶ ପାଇ ନ ଥିବା ଦେଖାଯାଇଛି। କାରଣ ଦ୍ୱିତୀୟ ପର୍ଯ୍ୟାୟରେ ସଂପୃକ୍ତ କଲେଜଗୁଡ଼ିକରେ ନାମ ଲେଖାଇବା ପାଇଁ କେହି ଜଣେ ହେଲେ ଛାତ୍ରୀଛାତ୍ର ନାହାନ୍ତି। ଯେତିକି ଛାତ୍ରୀଛାତ୍ର ନାମ ଲେଖାଇବା ପାଇଁ ଅନ୍ଲାଇନ୍ରେ ଆବେଦନ କରିଥିଲେ, ପ୍ରଥମ ପର୍ଯ୍ୟାୟରେ ସେମାନେ ନାମ ଲେଖାଇବା ପରେ ଦ୍ୱିତୀୟ ପର୍ଯ୍ୟାୟ ପାଇଁ ଆଉ କେହି ନାହାନ୍ତି। ମୋଟ୍ ସିଟ୍ ଠାରୁ ଆବେଦନକାରୀଙ୍କ ସଂଖ୍ୟା ଢ଼େର୍ କମ୍ ଥିବା ଯୋଗୁ ଏଭଳି ସ୍ଥିତି ଦେଖାଦେଇଛି। ବହୁତ ସିଟ୍ ଖାଲି ପଡ଼ିଛି।
ଉଦାହରଣ ସ୍ବରୂପ ଆସିକା ବିଜ୍ଞାନ କଲେଜ। ଏହି କଲେଜରେ ଯୁକ୍ତ ୨ ବିଜ୍ଞାନ ବିଭାଗରେ ରହିଛି ୨୫୬ ସିଟ୍।
ପ୍ରଥମ ପର୍ଯ୍ୟାୟରେ ୯୯ଜଣ ନାମ ଲେଖାଇଛନ୍ତି। ଆହୁରି ୧୫୭ ସିଟ୍ ଖାଲି ପଡ଼ିଛି। କିନ୍ତୁ ଦ୍ୱିତୀୟ ପର୍ଯ୍ୟାୟରେ ନାମ ଲେଖାଇବା ପାଇଁ ଆଉ କେହି ଆବେଦନକାରୀ ଛାତ୍ରୀଛାତ୍ର ନାହାନ୍ତି।
ଜିଲାରେ ଏଭଳି ୨୦ କଲେଜ ଅଛି, ଯେଉଁ କଲେଜଗୁଡ଼ିକରେ ନାମ ଲେଖାଇବା ପାଇଁ ଏବେ ଜଣେ ହେଲେ ଆବେଦନକାରୀ ନାହାନ୍ତି। ସେହିପରି ୮୫ କଲେଜରେ କଳା ବିଷୟ ରହିଛି।
ହେଲେ ୧୧ କଲେଜରେ କଳା ବିଷୟରେ ନାମ ଲେଖାଇବା ପାଇଁ କେହି ଛାତ୍ରୀଛାତ୍ର ନାହାନ୍ତି। ୯୨ କଲେଜରେ ବିଜ୍ଞାନ ବିଷୟ ରହିଛି। ଏଥିରୁ ୩୯ କଲେଜରେ ବିଜ୍ଞାନରେ ନାମଲେଖାଇବା ପାଇଁ କେହି ଛାତ୍ରୀଛାତ୍ର ନାହାନ୍ତି। ୩୫ କଲେଜରେ ବାଣିଜ୍ୟ ବିଷୟ ରହିଛି।
ସେଥିରୁ ୨୧ କଲେଜରେ ବାଣିଜ୍ୟରେ ନାମ ଲେଖାଇବା ପାଇଁ କେହି ଛାତ୍ରୀଛାତ୍ର ନାହାନ୍ତି।
ପର୍ଯ୍ୟାୟରେ ଅଳ୍ପ କେତେକ ସିଟ୍ ପୂରଣ ହୋଇଥିବା ବେଳେ ଏସବୁ କଲେଜଗୁଡ଼ିକରେ ବହୁତ ସିଟ୍ ଖାଲି ପଡ଼ିଛି। ଏଥିରେ ଅଧିକାଂଶ ଘରୋଇ କଲେଜ ରହିଛି।
ବହୁ ଟଙ୍କା ଖର୍ଚ୍ଚ କରି କଲେଜ ଖୋଲିବା ପରେ କେହି ଛାତ୍ରୀଛାତ୍ର ପାଠ ପଢ଼ିବା ପାଇଁ ଆଗ୍ରହ ପ୍ରକାଶ ନ କରିବା, କଲେଜଗୁଡ଼ିକରେ ଶିକ୍ଷାଦାନ ବ୍ୟବସ୍ଥାକୁ ପଦାରେ ପକାଉଛି ବୋଲି ସାଧାରଣରେ ଆଲୋଚନା ହେଉଛି।
