ନୂଆଦିଲ୍ଲୀ,୧୩ା୪: ନିୟନ୍ତ୍ରଣ ରେଖା ଆରପଟେ ଥିବା କେରନ ସେକ୍ଟରରେ ଭାରତୀୟ ସେନା ପକ୍ଷରୁ ଶୁକ୍ରବାର ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏଥିରେ ୮ ଆତଙ୍କବାଦୀ ଏବଂ ୧୫ ପାକ୍ ସୈନ୍ୟ ନିହତ ହୋଇଥିବା ସାମରିକ ବାହିନୀ ସୂତ୍ରରୁ ଜଣାପଡ଼ିଛି। ଏହା ପାକିସ୍ତାନ ପାଇଁ ଏକ ବଡ଼ ବାର୍ତ୍ତା ବୋଲି ଜଣେ ସୁରକ୍ଷା ଅଧିକାରୀ କହିଛନ୍ତି। ପାକ୍ ସେନାର ଅସ୍ତ୍ରବିରତି ଉଲ୍ଲଂଘନର ଠିକଣା ଜବାବ ଦେବାକୁ ଯାଇ ଭାରତୀୟ ଯବାନମାନେ କିଷନଗଙ୍ଗା ନଦୀକୂଳରେ ଥିବା ଦୁଧନିଆଲ ସହରକୁ ଟାର୍ଗେଟ କରିଥିଲେ।
ଗତ ୫ ତାରିଖରେ ସେନାର ଏକ ସ୍ବତନ୍ତ୍ର ବାହିନୀ ଉକ୍ତ ଅଞ୍ଚଳର ୫ ଆତଙ୍କବାଦୀଙ୍କୁ ନିପାତ କରିଥିଲା। ସେମାନଙ୍କ ମଧ୍ୟରୁ ୩ ଜଣ ଜମ୍ମୁ-କଶ୍ମୀରର ହୋଇଥିବାବେଳେ ଅନ୍ୟ ୨ ଜଣ ଜୈଶ୍-ଇ-ମହମ୍ମଦ ସଂଗଠନରେ ତାଲିମ ନେଉଥିଲେ। ଭାରତୀୟ ସେନା ଶାର୍ଦା, ଦୁଧନିଆଲ, ଶାହକୋଟ ସେକ୍ଟରକୁ ଟାର୍ଗେଟ କରି ଗୁଳିମାଡ଼ କରିଥିବା ପାକିସ୍ତାନ ସ୍ବୀକାର କରିଛି। ଏହି ଗୁଳିମାଡ଼ରେ ଜଣେ ନାବାଳିକା ସମେତ ୪ ଜଣ ସାଧାରଣ ନାଗରିକ ଗୁରୁତର ଆହତ ହୋଇଥିବା ଇସ୍ଲାମାବାଦ କହିଛି।
ଗୋଇନ୍ଦା ରିପୋର୍ଟ ଅନୁଯାୟୀ ୧୦ ତାରିଖରେ ସେନା କାର୍ଯ୍ୟାନୁଷ୍ଠାନରେ କେରନ ସେକ୍ଟରରେ ୮ ଆତଙ୍କବାଦୀ ଓ ୧୫ ପାକ୍ ସୈନ୍ୟ ନିହତ ହୋଇଛନ୍ତି। ଏଥିସହିତ ଦୁଧନିଆଲ ସହରର କେତେକ ଦୋକାନ କ୍ଷତିଗ୍ରସ୍ତ ହୋଇଛି। କେରନ ସେକ୍ଟରରେ ଥିବା ଲଞ୍ଚ୍ ପ୍ୟାଡ୍ଗୁଡ଼ିକୁ ଭାରତୀୟ ସେନା ଟାର୍ଗେଟ କରିଥିଲା। ଏହି ଲଞ୍ଚ୍ପ୍ୟାଡ୍ଗୁଡ଼ିକରେ ପାଖାପାଖି ୧୬୦ ଆତଙ୍କବାଦୀ କଶ୍ମୀରରେ ଅନୁପ୍ରବେଶ ଲାଗି ଅପେକ୍ଷା କରି ରହିଥିବା ଜଣାପଡ଼ିଛି। ସେହିପରି ରାଜୌରୀ ଓ ଜମ୍ମୁ ସେକ୍ଟରରେ ଅନୁପ୍ରବେଶ କରିବା ଲାଗି ସୀମାରେ ୭୦ ଜୈଶ୍ ଆତଙ୍କବାଦୀ ସୁଯୋଗ ଅପେକ୍ଷାରେ ଥିବା ଗୋଇନ୍ଦା ରିପୋର୍ଟରୁ ଜଣାପଡ଼ିଛି।
